ബൈക്ക് മോഷണം ആരോപിച്ച് പാലക്കാട് ഒലവക്കോട് യുവാവിനെ ആള്‍ക്കൂട്ടം തല്ലിക്കൊന്നു. മലമ്പുഴ കടക്കുന്നം സ്വദേശി റഫീഖ് ക്രൂരമര്‍ദനത്തിന് കൊല്ലപ്പെട്ടത്.
ഇന്നലെ അര്‍ധരാത്രിയോടെയാണ് സംഭവം. സംഭവത്തില്‍ മൂന്നു പേരെ പോലീസ് കസ്റ്റഡിയിലെടുത്തു. ആലത്തൂര്‍ സ്വദേശി മനീഷ്, കൊല്ലംകോട് സ്വദേശി ഗുരുവായൂരപ്പന്‍,പല്ലശ്ശന സ്വദേശി സൂര്യ എന്നിവരെയാണ് പാലക്കാട് നോര്‍ത്ത് പോലീസ് അറസ്റ്റ് ചെയ്തത്.
മദ്യപിക്കാന്‍ ഇവര്‍ മൂന്നുപേരും അടുത്തുള്ള ബാറില്‍ കയറി. തുടര്‍ന്ന് തിരിച്ചറങ്ങിയപ്പോള്‍ ഇവരുടെ ബൈക്ക് കാണാനില്ലായിരുന്നു. സിസിടിവി ദൃശ്യങ്ങള്‍ പരിശോധിച്ചപ്പോള്‍ ബൈക്കുമായി ഒരാള്‍ പോകുന്നത് ശ്രദ്ധയില്‍പ്പെട്ടു. തിരച്ചിലിനിടെ സമാനമായ വസ്ത്രം ധരിച്ച് റഫീഖ് അവിടെ നില്‍ക്കുന്നത് ഇവര്‍ കണ്ടു. തുടര്‍ന്ന് തടഞ്ഞുനിര്‍ത്തി മര്‍ദിക്കുകയായിരുന്നു.
ബൈക്ക് കൊണ്ടുപോയത് റഫീഖ് തന്നെയാണെന്നാണ് പോലീസിന്റെ പ്രാഥമികനിഗമനം. റഫീഖ് നേരത്തെയും ബൈക്ക് മോഷണത്തില്‍ പ്രതിയായിരുന്നു.
എന്നാല്‍ അതേസമയം റഫീഖിനെ മര്‍ദിക്കുമ്പോള്‍ പതിനഞ്ചോളം പേര്‍ കാഴ്ചക്കാരായി നോക്കി നില്‍ക്കുകയായിരുന്നു. പോലീസെത്തിയാണ് പിടിച്ചുമാറ്റി ആശുപത്രിയിലെത്തിച്ചത്. അപ്പോഴേക്കും മരണപ്പെട്ടിരുന്നു.