ബിഹാറിലെ സരൻ ജില്ലയിൽ ബീഫ് കടത്തിയെന്നാരോപിച്ച് ഭിന്നശേഷിക്കാരനായ ട്രക്ക് ഡ്രൈവറെ മർദിച്ച് കൊലപ്പെടുത്തി. മുഹമ്മദ് സഹിറുദ്ദീൻ (55) ആണ് കൊല്ലപ്പെട്ടത്.സംഭവത്തിൽ ഏഴുപേർ അറസ്റ്റിലായി.മെഡിക്കൽ ആവശ്യത്തിനായി മൃഗങ്ങളുടെ എല്ലുകൾ കൊണ്ടുപോയ ട്രക്കാണ് ആക്രമിക്കപ്പെട്ടത്‌.
തകരാറിനെ തുടർന്ന് വാഹനം നിർത്തിയപ്പോഴാണ് സംഭവം. സഹായിയായ ഖുർഷിദ് അലി ഓടി രക്ഷപ്പെട്ടു.
മെഡിക്കൽ ആവശ്യത്തിന്‌ എല്ലുകൾ എത്തിക്കുന്നതുപോലും കൊല്ലാനുള്ള കാരണമായി മാറിയെന്ന്‌ ഭിന്നശേഷി സംഘടനയായ നാഷണൽ പ്ലാറ്റ്‌ഫോം ഫോർ ദ്‌ റൈറ്റ്‌സ്‌ ഓഫ് ദ്‌ ഡിസേബിൾഡ്‌ (എൻപിആർഡി) കുറ്റപ്പെടുത്തി.
മധ്യപ്രദേശിലും കഴിഞ്ഞദിവസം ബീഫ് കടത്തിയെന്നാരോപിച്ച് രണ്ട്‌ മുസ്ലിം യുവാക്കളെ ബജ്‌റംഗദളുകാർ മർദിച്ചു.തങ്ങളുടെ കൈയിലുള്ളത്‌ ആട്ടിറച്ചിയാണെന്ന്‌ പറഞ്ഞെങ്കിലും ബീഫാണെന്ന്‌ ആരോപിച്ചായിരുന്നു മർദനമെന്ന് യുവാക്കൾ പറഞ്ഞു.യുവാക്കളെ മർദിച്ചവർക്കെതിരെയും രസീത്‌ കൈവശമില്ലാതെ മാംസം കൈവശംവച്ചതിന്‌ യുവാക്കൾക്കെതിരെയും പോലീസ് കേസടുത്തു.