പാറ്റ്‌ന:നിയമസഭാ തെരഞ്ഞെടുപ്പ് മുന്നില്‍ കണ്ട് ജോലി രാജിവെച്ച ബിഹാര്‍ മുന്‍ ഡിജിപി മത്സരിക്കാന്‍ ആഗ്രഹിച്ച സീറ്റ് കോണ്‍സ്റ്റബിള്‍ കൊണ്ടുപോയി. മുന്‍ ഡിജിപി ഗുപ്‌തേശ്വര്‍ പാണ്ഡെയാണ് രാഷ്ട്രീയ പ്രവേശനം മുന്നില്‍ കണ്ട് ജോലി രാജിവെച്ചത്. എന്നാല്‍ സീറ്റ് വിഭജനം കഴിഞ്ഞപ്പോള്‍ ഡിജിപിക്ക് ജോലി പോയത് മാത്രമാണ് മിച്ചം.
ബക്‌സര്‍ സീറ്റില്‍ ജനതാദള്‍ യുണൈറ്റഡ് സ്ഥാനാര്‍ത്ഥിയായി മത്സരിക്കാനായിരുന്നു പാണ്ഡെയുടെ ആഗ്രഹം. എന്നാല്‍ ഈ സീറ്റില്‍ ബിജെപിയാണ് മത്സരിക്കുന്നത്. ബിജെപി സ്ഥാനാര്‍ത്ഥിയും ഒരു മുന്‍ പൊലീസുകാരനാണ്. മുന്‍ പൊലീസ് കോണ്‍സ്റ്റബിള്‍ പരശുറാം ചതുര്‍വേദിയാണ് ബക്‌സറിലെ എന്‍ഡിഎ സ്ഥാനാര്‍ത്ഥി.
ഡിജിപി തന്റെ സഹോദരനെപ്പോലെയാണെന്നും അദ്ദേഹത്തിന്റെ കാലുതൊട്ട് അനുഗ്രഹം വാങ്ങിയാണ് തെരഞ്ഞെടുപ്പ് ഗോദയിലിറങ്ങിയതെന്നും എന്‍ഡിഎ സ്ഥാനാര്‍ത്ഥി പരശുറാം ചതുര്‍വേദി പറഞ്ഞു.