ലണ്ടന്‍: കാത്തിരിക്കുക. ഇന്ന് ലണ്ടന്‍ നഗരത്തില്‍ വലിയ യുദ്ധമാണ്. രാത്രിയാണെന്ന് മാത്രം. നഗരത്തിലെ പേര് കേട്ട ക്ലബുകളായ ടോട്ടനവും ചെല്‍സിയും നേര്‍ക്കുനേര്‍. രണ്ട് പേരുടെയും ആസ്ഥാനങ്ങള്‍ തമ്മില്‍ അധികദൂരമില്ല. ടോട്ടനത്തിന്റെ പുതുപുത്തന്‍ വേദിയില്‍ കളിക്കുമ്പോള്‍ മുന്‍ത്തൂക്കം അവര്‍ക്കു തന്നെ. ടേബിളില്‍ നാലാം സ്ഥാനം. 24 കളികളില്‍ 42 പോയിന്റ്. എന്നാല്‍ തപ്പിതടയുകയാണ് തൊട്ടരികിലുളള ചെല്‍സിക്കാര്‍. 23 കളികളില്‍ 31 പോയിന്റുമായി പത്താം സ്ഥാനത്ത്.
ഇന്ന് ടോട്ടനം നിരയില്‍ പ്രശ്‌നങ്ങളൊന്നുമില്ല. ഹാരി കെയിന്‍ സംഘത്തില്‍ എല്ലാവരും ആരോഗ്യവാന്മാര്‍. എന്നാല്‍ ചെല്‍സിക്ക് പ്രശ്‌നമുണ്ട്. നായകന്‍ സെസാര്‍ അസ്പിലിസേറ്റ കളിച്ചേക്കില്ല. നക്കാലേ കാണ്ടേ, കൃസ്റ്റിയന്‍ പുലിസിച്ച് എന്നിവര്‍ ഇന്നലെ പരിശീലനത്തിനുണ്ടായിരുന്നു. പക്ഷേ ഇവര്‍ കളിക്കുമോ എന്ന കാര്യത്തില്‍ കോച്ച് ഉറപ്പ് നല്‍കുന്നില്ല. അര്‍ജന്റീനക്കാരനായ എന്‍സോ ഫെര്‍ണാണ്ടസിനെ പോലുള്ളവര്‍ എത്തിയിട്ടും ലീഗില്‍ ചെല്‍സി തപ്പിതടയുകയാണ്. തോല്‍വികള്‍ മാത്രമാണ് സമ്പാദ്യം. ലണ്ടന്‍ യുദ്ധത്തില്‍ ജയിച്ചാല്‍ അത് ആത്മവിശ്വാസമാവും. കാണാന്‍ മറക്കരുത്. കളി ഇന്ത്യന്‍ സമയം ഏഴ് മണിക്ക്. സ്റ്റാര്‍ ചാനലുകളില്‍ പിന്നെ ഹോട്ട് സ്റ്റാറിലും.