പുതുവത്സര ദിനത്തില്‍ ബെംഗളൂരില്‍ മധ്യവയസ്‌ക്കനെ കാറില്‍ വെടിയേറ്റ് മരിച്ച നിലയില്‍ കണ്ടെത്തി. പ്രദീപ്.എസ് (47) എന്നയാളാണ് മരിച്ചത്. ബി.ജെ.പി എം.എല്‍.എ അരവിന്ദ് ലിംബാവലിയും മറ്റ് അഞ്ച് പേരും ചേര്‍ന്ന് തന്നെ വഞ്ചിച്ചതായി ആത്മഹത്യാ കുറിപ്പില്‍ പ്രദീപ് എഴുതിയിരുന്നു.
വൈറ്റ്ഫീല്‍ഡിലെ അംബാലിപുര സ്വദേശിയായ പ്രദീപ് ഭാര്യയുടെ കുടുംബത്തോടൊപ്പം പോയ കഗ്ഗലിപുരയ്ക്കടുത്തുള്ള വുഡ്റോസ് റിസോര്‍ട്ടില്‍ നിന്ന് വൈകീട്ട് 5.30ഓടെ തിരികെ വരുമ്പോഴാണ് തന്റെ ലൈസന്‍സുള്ള തോക്ക് ഉപയോഗിച്ച് സ്വയം വെടിവച്ചത്. ഭാര്യ നമിത ബന്ധുവിന്റെ കാറിലായിരുന്നുവെന്ന് കഗ്ഗലിപുര പോലീസ് പറഞ്ഞു.
ബെംഗളൂരുവില്‍ നിന്ന് 32 കിലോമീറ്റര്‍ അകലെ നെറ്റിഗെരെയില്‍ വച്ചാണ് പ്രദീപ് കാറിനുള്ളില്‍ വെടിയുതിര്‍ത്തതെന്ന് പൊലീസ് പറഞ്ഞു. എട്ട് പേജുള്ള ആത്മഹത്യാ കുറിപ്പ് പ്രദീപ് കാറില്‍ ഉപേക്ഷിച്ച രീതിയില്‍ കണ്ടെത്തി. ഇതില്‍ ചിലരുടെ പേരും ഫോണ്‍ നമ്പറുകളും എഴുതിവച്ചിട്ടുണ്ടെന്ന് പൊലീസ് പറഞ്ഞു.