മുംബൈ: ലോകകപ്പില്‍ തപ്പിതടയുന്ന ചാമ്പ്യന്മാരായ ഇംഗ്ലണ്ടിനെ തേടി ശുഭവാര്‍ത്ത. പരുക്ക് കാരണം ഇത് വരെ ലോകകപ്പില്‍ ഒരു മല്‍സരവും കളിക്കാന്‍ കഴിയാതിരുന്ന ഓള്‍റൗണ്ടര്‍ ബെന്‍ സ്റ്റോക്സ് തിരികെ വരുന്നു.
ഇതിനകം മൂന്ന് മല്‍സരങ്ങളാണ് ചാമ്പ്യന്മാര്‍ ലോകകപ്പില്‍ കളിച്ചത്. ഇതില്‍ ആകെ ഒരു വിജയം മാത്രമാണ് സമ്പാദിക്കാനായത്. ഉദ്ഘാടന മല്‍സരത്തില്‍ ന്യുസിലന്‍ഡിന് മുന്നില്‍ അടിയറവ് പറഞ്ഞ ഇംഗ്ലണ്ട് അവസാന മല്‍സരത്തില്‍ അഫ്ഗാനിസ്താന് മുന്നിലും തല താഴ്ത്തിയിരുന്നു. സെമി സാധ്യത നിലനിര്‍ത്താന്‍ ഇനിയുള്ള എല്ലാ മല്‍സരങ്ങളിലും വിജയം നിര്‍ബന്ധമായിരിക്കെയാണ് താന്‍ ആരോഗ്യം വീണ്ടെടുത്തതായി സ്റ്റോക്സ് വ്യക്തമാക്കിയത്. ഇന്നലെ മുംബൈ വാംഖഡെ സ്റ്റേഡിയത്തില്‍ ഇംഗ്ലീഷ് ടീമിനൊപ്പം അദ്ദേഹം പരിശീലനം നടത്തി. കരുത്തരായ ദക്ഷിണാഫ്രിക്കയാണ് ഇംഗ്ലണ്ടിന്റെ അടുത്ത പ്രതിയോഗികള്‍.