കോഴിക്കോട്: ബിബിസി ഡോക്യുമെന്ററി പ്രദര്‍ശിപ്പിക്കാന്‍ ശ്രമിച്ച വിദ്യാര്‍ഥികളെ എസ് ഡി പി ഐക്കാരെന്ന് വിളിച്ചെന്ന് പരാതി. കോഴിക്കോട് മെഡിക്കല്‍ കോളേജ് സി ഐ ക്കെതിരെ മെഡിക്കല്‍ കോളജ് വിദ്യാര്‍ഥികള്‍ പരാതി നല്‍കി. ഡോക്യുമെന്ററി പ്രദര്‍ശിപ്പിക്കുന്നതിനെതിരെ പ്രതിഷേധിച്ച യുവമോര്‍ച്ച പ്രവര്‍ത്തകരെ മാറ്റാതെ പ്രദര്‍ശനം തടയുകയാണ് സി ഐ ചെയ്തതെന്നും പരാതിയില്‍ പറയുന്നുണ്ട്.
മെഡിക്കല്‍ കോളജ് സി.ഐ ബെന്നി ലാലുവിനെതിരെയാണ് വിദ്യാര്‍ഥികള്‍ പരാതി നല്‍കിയത്.റിപ്പബ്ലിക് ദിനത്തില്‍ കോളജ് യൂണിയന്റെ നേതൃത്വത്തിലാണ് കോഴിക്കോട് മെഡിക്കല്‍ കോളജില്‍ ബി.ബി.സി ഡോക്യുമെന്ററി പ്രദര്‍ശിപ്പിക്കാന്‍ തീരുമാനിച്ചിരുന്നത്. ഇത് തടയാനായി യുവമോര്‍ച്ചാ പ്രവര്‍ത്തകരെത്തിയതും സംഘര്‍ഷ സാധ്യതയുണ്ടെന്ന് പറഞ്ഞ് ഡോക്യുമെന്ററി പ്രദര്‍ശനം പൊലീസ് തടയുകയായിരുന്നു. എസ്.ഡി.പി.ഐ ക്കാരെന്ന് വിളിച്ച്‌ വിദ്യാര്‍ഥികളോട് സി.ഐ മോശമായി പെരുമാറിയെന്ന് വിദ്യാര്‍ഥികള്‍ പറയുന്നു.