ബെര്‍ലിന്‍: മുന്‍ ജര്‍മന്‍ ഫുട്‌ബോള്‍ താരം മിഷേല്‍ ബല്ലാക്കിന്റെ മകന്‍ എമിലിയോ ബല്ലാക്ക് വാഹനാപകടത്തില്‍ മരിച്ചു. ക്വാഡ് ബൈക്കില്‍ അപകടരമായ രീതിയില്‍ റെയ്ഡ് ചെയ്യുന്നതിനിടെ ബൈക്ക് മറിഞ്ഞു വീഴുകയായിരുന്നു. വ്യാഴാഴ്ച പുലര്‍ച്ചെ രണ്ടു മണിക്കാണ് സംഭവം. പതിനെട്ടുകാരനായ എമിലിയോ പോര്‍ച്ചുഗലിലുള്ള ബല്ലാക്കിന്റെ ഒഴിവുകാല വസതിക്ക് സമീപത്തു വച്ച് നടന്ന അപകടത്തിലാണ് മരിച്ചത്.
രക്ഷാപ്രവര്‍ത്തകര്‍ സംഭവസ്ഥലത്ത് എത്തിയെങ്കിലും എമിലിയോയെ രക്ഷിക്കാനായില്ല. മുന്‍താരത്തിന്റെ മകന്റെ മരണത്തില്‍ ഇംഗ്ലീഷ് പ്രീമിയര്‍ ലീഗ് ക്ലബ്ബ് ചെല്‍സി അനുശോചനം രേഖപ്പെടുത്തി.
മിഷേല്‍ ബല്ലാക്കിന്റേയും സിമോണ്‍ ലാംബെയുടേയും മകനായി 2002ലാണ് എമിലിയോയുടെ ജനനം. ലാംബെയുമായുള്ള ബന്ധത്തില്‍ ബല്ലാക്കിന് രണ്ട് ആണ്‍മക്കള്‍ കൂടിയുണ്ട്.