കൊടുങ്ങല്ലൂര്‍: കവി ബാലചന്ദ്രന്‍ ചുള്ളിക്കാടിന്റെ സഹോദരന് ജയചന്ദ്രന്‍(54) അന്തരിച്ചു. റോഡരികില്‍ അവശനിലയില്‍ കണ്ടെത്തിയ ജയചന്ദ്രന്‍ കൊടുങ്ങല്ലൂര്‍ താലൂക്ക് ആസ്പത്രിയില്‍ ചികിത്സയിലായിരുന്നു.
പറവൂരില്‍ റോഡരികില്‍ അവശനിലയില്‍ കിടന്നിരുന്ന ജയചന്ദ്രനെ പൊലീസും ജനപ്രതിനിധികളും സന്നദ്ധപ്രവര്‍ത്തകരും ചേര്‍ന്നു ആസ്പത്രിയില്‍ എത്തിക്കുകയായിരുന്നു. തുടര്‍ന്ന് പറവൂര്‍ നഗരസഭ അധ്യക്ഷന്‍ രമേഷ് കുറുപ്പിന്റെ ആവശ്യപ്രകാരം ജീവകാരുണ്യ പ്രവര്‍ത്തകര്‍ പുല്ലൂറ്റ് വെളിച്ചം അഗതിമന്ദിരത്തില്‍ എത്തിച്ചു. പിന്നീട് താലൂക്ക് ആശുപത്രിയിലേക്ക് മാറ്റി. ക്യാന്‍സര്‍ ബാധിതനായിരുന്നു ജയചന്ദ്രന്‍.
സഹോദരനെക്കുറിച്ചുള്ള വിവരം ബാലചന്ദ്രന്‍ ചുള്ളിക്കാടിനെ അറിയിച്ചെങ്കിലും ആദ്യഘട്ടത്തില്‍ സഹോദരനെ കാണാന്‍ ബാലചന്ദ്രന്‍ ചുള്ളിക്കാട് വിസമ്മതിച്ചു. പിന്നീട് സഹോദരനെ കാണാന്‍ കവി എത്തുകയും ചെയ്തു. പുല്ലൂറ്റ് വെളിച്ചം അഗതി മന്ദിരത്തിലും താലൂക്ക് ആസ്പത്രിയിലും എത്തിയ ബാലചന്ദ്രന്‍ ചുള്ളിക്കാട് സഹോദരന് സഹായവും നല്‍കിയിരുന്നു.