കൊച്ചി: ചേരാനല്ലൂരിലെ ബേക്കറിയിലെത്തിയ പെണ്‍കുട്ടിയെ കടയുടമ കയറിപ്പിടിച്ച സംഭവത്തില്‍ പ്രതിയായ കണ്ണനെന്ന ബാബുരാജ് (57) നേരത്തെ മറ്റൊരു പോക്‌സോ കേസിലും പ്രതിയെന്ന് പൊലീസ്. ഇയാളുടെ വീടിനടുത്തുള്ള മറ്റൊരു ആണ്‍കുട്ടിയെ ലൈംഗീകമായി പീഡിപ്പിച്ച കേസിലാണ് ഇയാളുടെ പേരിലുള്ള ആദ്യത്തെ കേസ്.
അതേസമയം ഇയാള്‍ സ്ഥിരം കുറ്റവാളിയാണെന്നും മാതൃകാപരമായ കടുത്ത ശിക്ഷ നല്‍കണമെന്നും പരിസരവാസികള്‍ ആവശ്യപ്പെട്ടു. കഴിഞ്ഞ ബുധനാഴ്ചവൈകിട്ടായിരുന്നു കേസിനാസ്പദമായ സംഭവം നടന്നത്. ചേരാനല്ലൂര്‍- ചിറ്റൂര്‍ റോഡില്‍ ക്ഷേത്രത്തിന് സമീപമായി സ്ഥിതി ചെയ്യുന്ന ബാക്കറിയിലെത്തിയ 13 കാരിയായ പെണ്‍കുട്ടിയെ കടയുടമ ആയ ബാബുരാജ് കയറിപ്പിടിക്കുകയായിരുന്നു.
പെണ്‍കുട്ടി കരഞ്ഞുകൊണ്ട് വീട്ടിലെത്തി വിവരം പറഞ്ഞതനുസരിച്ച് രക്ഷിതാക്കള്‍ ചേരാനല്ലൂര്‍ സ്‌റ്റേഷനിലെത്തി പരാതി നല്‍കുകയും പൊലീസ് കടയുടമക്കെതിരെ കേസെടുത്ത ശേഷം പറഞ്ഞയക്കുകയായിരുന്നുവെന്ന് നാട്ടുകാര്‍ പറയുന്നു. ഇതില്‍ രോഷാകുലനായ പെണ്‍കുട്ടിയുടെ പിതാവ് ബാക്കറിക്ക് തീവെച്ചു. സംഭവം അറിഞ്ഞെത്തിയ പൊലീസ് ഇരുവരേയും കസ്റ്റഡിയിലെടുത്തു. പോക്‌സോ കേസ് ചുമത്തി കോടതിയില്‍ ഹാജരാക്കിയ ബാബുരാജിനെ പിന്നീട് എറണാകുളം ജില്ലാ ജയിലിലേക്ക് റിമാന്റ് ചെയ്തു. കട കത്തിച്ചതിന് പെണ്‍കുട്ടിയുടെ പിതാവിനെതിരേയും കേസെടുത്ത് റിമാന്റ് ചെയ്തു.