നടന്‍ സല്‍മാന്‍ ഖാനും കൊല്ലപ്പെട്ട എന്‍സിപി നേതാവ് ബാബ സിദ്ദീഖിയുടെ മകന്‍ സീഷാന്‍ സിദ്ദിഖി എംഎല്‍എയ്ക്കുമെതിരെ വധഭീഷണി മുഴക്കിയ യുവാവ് അറസ്റ്റില്‍. ഗഫ്റാന്‍ ഖാന്‍ എന്നയാളെയാണ് മുംബൈ പൊലീസ് അറസ്റ്റ് ചെയ്തത്.
വെള്ളിയാഴ്ച വൈകീട്ടാണ് സീഷാന്‍ സിദ്ദീഖിയുടെ ഓഫീസിലേക്ക് ഭീഷണി സന്ദേശം ലഭിച്ചത്. പണം നല്‍കണമെന്നും ഇല്ലെങ്കില്‍ സല്‍മാന്‍ ഖാനെയും സീഷനെയും കൊലപ്പെടുത്തുമെന്നുമായിരുന്നു ഭീഷണി സന്ദേശം. തുടര്‍ന്ന് നല്‍കിയ പരാതിയില്‍ പ്രതിയെ കണ്ടെത്തുകയായിരുന്നു.
നേരത്തെ, മുംബൈ ട്രാഫിക് പൊലീസിന്റെ വാട്‌സ്ആപ്പ് ഹെല്‍പ്പ് ലൈനില്‍ ലഭിച്ച ഭീഷണി സന്ദേശത്തിന്റെ പേരില്‍ ജംഷഡ്പൂരിലെ ഷെയ്ഖ് ഹുസൈന്‍ എന്നയാളെ അറസ്റ്റ് ചെയ്തിരുന്നു. അഞ്ച് കോടി രൂപ ആവശ്യപ്പെട്ടായിരുന്നു ഇയാളുടെ ഭീഷണി സന്ദേശം.
ഏപ്രിലില്‍ സല്‍മാന്‍ ഖാന്റെ ബാന്ദ്രയിലെ വീടിന് പുറത്ത് ബിഷ്‌ണോയ് സംഘത്തിലെ അംഗങ്ങള്‍ എന്ന് സംശയിക്കുന്നവര്‍ വെടിയുതിര്‍ത്തിരുന്നു. ഇതിന് പിന്നാലെയാണ് ബാബ സിദ്ദീഖി കൊല്ലപ്പെടുന്നത്.