ദോഹ: അല്‍ജനൂബ് സ്‌റ്റേഡിയത്തില്‍ ഡെന്മാര്‍ക്കിനെ എറിഞ്ഞിട്ട് ആസ്‌ട്രേലിയന്‍ പടയോട്ടം. നിര്‍ണായക മത്സരത്തില്‍ ഡാനിഷ് പടയെ നേരിട്ട സോക്കറൂസ് എതിരില്ലാത്ത ഗോള്‍ നേടി വിജയം ഉറപ്പിക്കുകയായിരുന്നു. 2006 ലാണ് ആദ്യമായും അവസാനമായും ആസ്‌ട്രേലിയ ലോകകപ്പ് ഗ്രൂപ്പ് ഘട്ടം കടന്നത്.
64ാം മിനിറ്റിലാണ് സോക്കറൂസ് എതിരാളിയുടെ വല കുലുക്കിയിട്ടത്. ഗോളി ഷി മൈക്കല്‍ ഒരു നിമിഷം സ്തംഭിച്ചു നിന്നു. ഗോള്‍ വീണതോടെ പ്രതിരോധം പൊളിച്ച് ഓടിക്കയറാന്‍ ഡെന്മാര്‍ക്ക് ശ്രമിച്ചെങ്കിലും ഫലമൊന്നും നേടാനായില്ല. പ്രത്യാഘാതം മണത്ത കംഗാരുക്കള്‍ പോസ്റ്റിനു മുന്നില്‍ കോട്ട കെട്ടിനിന്നു. കളിയുടെ സിംഹഭാഗവും പന്ത് കൈവശം വെച്ചിട്ടും ലക്ഷ്യത്തിലേക്ക് കൂടുതല്‍ ഷോട്ടുതിര്‍ത്തിട്ടും ഗോളൊന്നും നേടാതെയാണ് ഡാനിഷുകാര്‍ മത്സരം പൂര്‍ത്തിയാക്കിയത്.