ബ്രസീലിയ: ബ്രസീലിലെ ആമസോണ്‍ മഴക്കാടുകളിലെ വനനശീകരണം ഒരു വര്‍ഷത്തിനുള്ളില്‍ 22 ശതമാനം ഉയര്‍ന്ന് 2006 ന് ശേഷമുള്ള ഏറ്റവും ഉയര്‍ന്ന നിലയിലെത്തിയതായി റിപ്പോര്‍ട്ടുകള്‍. ലോകത്തിലെ ഏറ്റവും വലിയ മഴക്കാടുകളില്‍ 13,235 ചതുരശ്ര കിലോമീറ്റര്‍ വനനശീകരണം നടന്നതായി ബ്രസീലിന്റെ ബഹിരാകാശ ഗവേഷണ ഏജന്‍സി (ഐ.എന്‍.പി.ഇ) അറിയിച്ചു.
കാലാവസ്ഥാ വ്യതിയാനത്തിനെതിരായ നിര്‍ണായക പ്രതിരോധമായി കണക്കാക്കപ്പെടുന്ന ആമസോണിനെ സംരക്ഷിക്കുന്നതില്‍ തന്റെ സര്‍ക്കാര്‍ ശക്തമായ നടപടികള്‍ സ്വീകരിക്കുന്നുണ്ടെന്ന് പ്രസിഡന്റ് ബോള്‍സൊനാരോ പറയുമ്പോഴും വനനശീകരണം നടക്കുന്നുവെന്നാണ് റിപ്പോര്‍ട്ട് സൂചിപ്പിക്കുന്നത്. ഈ മാസം ഗ്ലാസ്‌ഗോയില്‍ നടന്ന ഐക്യരാഷ്ട്രസഭയുടെ കാലാവസ്ഥാ ഉച്ചകോടിയില്‍ 2028 ഓടെ അനധികൃത വനനശീകരണം അവസാനിപ്പിക്കുമെന്ന് ബ്രസീല്‍ സര്‍ക്കാര്‍ പ്രതിജ്ഞ ചെയ്തിരുന്നു.