ഇറ്റാനഗര്‍: കാലുമാറ്റത്തിലൂടെ അരുണാചല്‍പ്രദേശ് ഭരണം പിടിച്ച ബി.ജെ.പി കുതിരക്കച്ചവടം വഴി ഇറ്റാനഗര്‍ മുനിസിപ്പാലിറ്റി ഭരണവും കൈപ്പിടിയിലാക്കി. ഇറ്റാനഗര്‍ മുനിസിപ്പല്‍ കൗണ്‍സിലിലെ 25 കോണ്‍ഗ്രസ് കൗണ്‍സിലര്‍മാരില്‍ 23 പേരും ബി.ജെ.പിയില്‍ ചേര്‍ന്നു. മുഖ്യമന്ത്രി പേമ ഖണ്ഡുവിന്റെയും ബി.ജെ.പി സംസ്ഥാന അധ്യക്ഷന്‍ താപിര്‍ ഗോയുടേയും സാന്നിധ്യത്തിലാണ് കൗണ്‍സിലര്‍മാര്‍ ബി.ജെ.പിയില്‍ ചേക്കേറിയത്. 30 അംഗ കൗണ്‍സില്‍ ഭരണം ഇതോടെ ബി.ജെ.പിക്ക് ലഭിക്കും. 26 കൗണ്‍സിലര്‍മാരാണ് കോണ്‍ഗ്രസിനുണ്ടായിരുന്നത്.
ഇതില്‍ ഒരാളെ പാര്‍ട്ടി വിരുദ്ധ പ്രവര്‍ത്തനത്തിന് നേരത്തെ പുറത്താക്കി. ബി.ജെ.പി അംഗത്വമെടുത്ത ചടങ്ങില്‍ ചീഫ് കൗണ്‍സിലര്‍ കിപ കാകുവിന്റെ നേതൃത്വത്തിലുള്ള 20 കൗണ്‍സിലര്‍മാരും സന്നിഹിതരായിരുന്നു. മറ്റ് മൂന്നുപേരും തങ്ങള്‍ക്കൊപ്പമുണ്ടെന്നും അസൗകര്യം മൂലമാണ് എത്തിച്ചേരാത്തതെന്നുമാണ് കിപ കാകു പറഞ്ഞു. ഷിംല മുനിസിപ്പല്‍ കോര്‍പറേഷന്‍ തിരഞ്ഞെടുപ്പിന് തൊട്ടുമുമ്പായി മുന്‍ കൗണ്‍സിലര്‍മാര്‍ ഉള്‍പ്പടെ 65 കോണ്‍ഗ്രസ് നേതാക്കള്‍ ബി.ജെ.പിയില്‍ ചേര്‍ന്നിരുന്നു. .ഇതിന് പിന്നാലെയാണ് ഇറ്റാനഗറിലെ ചേരിമാറ്റം.