വാഷിങ്ടണ്‍: നിര്‍മിത ബുദ്ധിയുടെ അപകടസാധ്യതകളെ കുറിച്ച് ചര്‍ച്ചകള്‍ പുരോഗമിക്കുന്നതിനിടെ ജനങ്ങളുടെ സുരക്ഷ ഉറപ്പുവരുത്തണമെന്ന് അമേരിക്ക. വൈറ്റ്ഹൗസില്‍ ടെക് മേധാവികളുമായിവിളിച്ചുചേര്‍ത്ത യോഗത്തില്‍ യു.എസ് വൈസ് പ്രസിഡന്റ് കമലാ ഹാരിസാണ് ഇക്കാര്യം ആവശ്യപ്പെട്ടത്.
ഗൂഗിളിന്റെ സിഇഒ സുന്ദര്‍ പിച്ചൈ, മൈക്രോസോഫ്റ്റ് സിഇഒ സത്യ നദെല്ല, ഓപ്പണ്‍ എഐ സിഇഒ സാം ആള്‍ട്ട്മാന്‍ എന്നിവര്‍ യോഗത്തില്‍ പങ്കെടുത്തു. ചാറ്റ് ജിപിടി, ബാര്‍ഡ് എന്നിവ ചെലുത്തുന്ന സ്വാധീനത്തിന്റെ പശ്ചാത്തലത്തിലാണ് യോഗം വിളിച്ചു ചേര്‍ത്തത്. നിര്‍മിത ബുദ്ധിയുടെ അപകട സാധ്യതയില്‍ ജനങ്ങളെ സംരക്ഷിക്കേണ്ട ഉത്തരവാദിത്തം അതിന്റെ നിര്‍മാതാക്കള്‍ക്കുണ്ട്. ജീവിത രീതിയില്‍ മെച്ചപ്പെട്ട മാറ്റങ്ങള്‍ കൊണ്ടവരാന്‍ പുതിയ സാങ്കേതിക വിദ്യകള്‍ക്ക് സാധിക്കും. എന്നാല്‍ ജനങ്ങളുടെ സുരക്ഷ, സ്വകാര്യത, പൗരാവകാശം എന്നിവക്ക് അപകടമുണ്ടാക്കുന്ന സാഹചര്യമുണ്ടാവരുത്, കമലാ ഹാരിസ് പറഞ്ഞു.