വാസുദേവന്‍ കുപ്പാട്ട്
ആരാണ് വല്യേട്ടന്‍ എന്ന ചോദ്യത്തിന് മറുപടി പറയാന്‍ സമയം മെനക്കെടുത്താറില്ലെങ്കിലും സി.പി.ഐ വല്യേട്ടനായി എന്നും അവരോധിക്കാറുള്ളത് സി.പി.എമ്മിനെയാണ്. കമ്യൂണിസ്റ്റ് പാര്‍ട്ടി പിളര്‍ന്ന് മാര്‍ക്‌സിസ്റ്റ് എന്ന ബ്രേക്കറ്റോടെ സി. പി.ഐ.എം വന്നതോടെ മാതൃസംഘടനയായ സി.പി.ഐക്ക് കഷ്ടകാലം തുടങ്ങി എന്നാണ് കമ്യൂണിസ്റ്റ് രാഷ്ട്രീയത്തെപ്പറ്റി അറിയുന്നവര്‍ പറയുന്നത്. സി.പി.എം വലിയ പാര്‍ട്ടിയായി മാറിയിരുന്നുവെങ്കിലും ബുദ്ധിരാക്ഷസന്മാരും താത്വികാചാര്യന്മാരും സി.പി.ഐയില്‍ തന്നെയാണ് നിലയുറപ്പിച്ചിരുന്നത്. എങ്കിലെന്ത്? അത്യാവശ്യത്തിന് മാത്രമെ വായ തുറക്കുകയുള്ളു. എപ്പോഴും പിടികിട്ടാത്ത ആദര്‍ശങ്ങളെപ്പറ്റി ആലോചിച്ച് സമയം കളയും. സോവിയറ്റ് യൂണിയനില്‍നിന്ന് അയച്ചുകിട്ടുന്ന സാഹിത്യം വള്ളിപുള്ളി വിടാതെ വായിക്കും. ഇതെല്ലാം കഴിഞ്ഞും ബാക്കി കിട്ടിയാല്‍ പാര്‍ട്ടി ഓഫീസിലെ കൂജയില്‍ സൂക്ഷിച്ച പച്ചവെള്ളം ചവച്ചു കുടിക്കും. ഇതായിരുന്നു രീതി. ജനങ്ങള്‍ എന്നു പറയുന്ന ഒരു വിഭാഗം പുറത്തുണ്ട് എന്ന് ഇക്കാലയളവിലൊന്നും ചിന്തിച്ചില്ല. തെരഞ്ഞെടുപ്പിന്റെ കാഹളം ഉയരുമ്പോഴും സ്ഥിതി വ്യത്യസ്തമായിരുന്നില്ല. തിരിഞ്ഞുമറിഞ്ഞ് ഇടതുമുന്നണി എന്നൊരു സംഭവവികാസം ഉണ്ടായതോടെ പലതും മറന്നു വല്യേട്ടന്റെ കൂടെനില്‍ക്കാന്‍ തീരുമാനിച്ചു. അന്നുമുതല്‍ വല്യേട്ടന്‍ ഒരു അരിക്കാക്കാന്‍ നോക്കുകയാണെന്ന് സമാധാനപ്രിയരായ സി.പി.ഐ സഖാക്കള്‍ അടക്കം പറയാറുണ്ട്. പഞ്ചായത്തില്‍ 15 സീറ്റ് സി.പി.എം നേടുമ്പോള്‍ ഒന്നോ രണ്ടോ സി.പി.ഐക്ക് കിട്ടും. ഇതാണ് പതിവ്. മന്ത്രിസഭയിലെ സ്ഥിതിയും ആശാവഹമായിരുന്നില്ല. റവന്യൂ, വനം തുടങ്ങിയ വകുപ്പുകളാണ് കിട്ടാറുള്ളത്. അത്യാവശ്യത്തിന് മാനഹാനി വരുത്താന്‍ കെല്‍പുള്ളവര്‍ മന്ത്രിമാരാകുമ്പോള്‍ നാട്ടുകാരെ കൊണ്ട് പറയിപ്പിക്കുന്നതും പതിവാണ്. സിവില്‍ സപ്ലൈസില്‍ കൈയിട്ടു വാരിയതിന്റെ പരാതി ഇനിയും അവസാനിച്ചിട്ടില്ല. കാര്യങ്ങള്‍ ഇങ്ങനെയൊക്കെയാണെങ്കിലും വല്യേട്ടനെ എതിര്‍ത്ത് നല്ല നാലു വര്‍ത്തമാനം പറയാന്‍ സി.പി.ഐ നേതാക്കള്‍ക്ക് കഴിയാറില്ല. സംശുദ്ധമായ പൊതുജീവിതം കാത്തുസൂക്ഷിക്കുന്ന തിരക്കില്‍ ആരും അതിന് തുനിയാറില്ല എന്നതാണ് വസ്തുത.
സി. അച്യുതമേനോനും പി.കെ.വിയും വെളിയം ഭാര്‍ഗവനും എന്‍.ഇ ബാലറാമും മറ്റും വലതു കമ്യൂണിസ്റ്റ് പാര്‍ട്ടിയെ നയിച്ച ഒരു കാലം പലരുടെയും മനസ്സിലുണ്ടാവും. ഡാങ്കേയുടെ ആശയാഭിലാഷങ്ങള്‍ നടപ്പാക്കാന്‍ എന്തൊരു വ്യഗ്രതയായിരുന്നു അന്ന്. ആ നേതാക്കള്‍ ചരിത്രവും ഭൂമിശാസ്ത്രവും മാത്രമല്ല വൈരുധ്യാത്മക ഭൗതികവാദവും പഠിച്ചു. ഉയര്‍ന്ന ചിന്ത, എളിമയുള്ള ജീവിതം അതായിരുന്നു മുഖമുദ്ര. ഇന്ന് കാലം കഴിഞ്ഞു. കേന്ദ്രത്തില്‍ സുധാകര റെഡ്ഢി അധികാരമൊഴിഞ്ഞു. കാര്യമായ പണിയൊന്നും ഉണ്ടായിരുന്നില്ല എന്നാണ് ശത്രുക്കള്‍ പറയുന്നത്. ഡി. രാജയാണ് പകരം വന്നത്. ഏതെങ്കിലും നിവൃത്തിയുണ്ടെങ്കില്‍ ഏതെങ്കിലും തെരഞ്ഞെടുപ്പുകളില്‍ നാലു സീറ്റ് നേടണം എന്നൊക്കെ കണക്കകൂട്ടുന്നുണ്ട്. അതിനിടെയാണ് കേരളത്തില്‍ വല്യേട്ടന്‍ വെടിപൊട്ടിച്ചത്. എവിടെയാണ് വെടിയേറ്റത് സി.പി. ഐയുടെ എം.എല്‍.എയുടെ മുഖത്ത്! എല്‍ദോ എം.എല്‍.എയുടെ ഇടതുകൈ ഒടിഞ്ഞു. ഏതായാലും ഒരു കാര്യത്തില്‍ സന്തോഷമുണ്ട്. ഒടിക്കുകയാണെങ്കില്‍ അത് ഇടതുകൈ തന്നെ വേണം എന്ന് പൊലീസിന് തോന്നിയല്ലോ. വലതുകൈ ആയിരുന്നെങ്കില്‍ ഇടതുപക്ഷത്തിന് ആകെ നാണക്കേടാകുമായിരുന്നു. എന്തായിരുന്നു പൊലീസിന് എം.എല്‍.എയെ തല്ലാനുള്ള പ്രകോപനം? ചുമ്മാ അങ്ങ് തല്ലുമോ? പൊതുവെ പൊലീസിന് ഇത് നല്ല സമയമല്ല. കസ്റ്റഡി മരണം, കസ്റ്റഡി മര്‍ദ്ദനം, ആളു മാറി മര്‍ദ്ദനം, കേസെടുക്കല്‍ തുടങ്ങിയ കലാപരിപാടികള്‍ കാരണം കാക്കിക്കുള്ളിലെ കലാകാരന്മാര്‍ക്ക് എവിടെയും രക്ഷയില്ല. മുഖ്യമന്ത്രി പിണറായി വിജയന്‍ ആവശ്യത്തിന് കൊടുക്കുന്നത് വേറെയും. അതിനിടയിലാണ് എല്‍ദോ ഒരു പുണ്യവാളനെപ്പോലെ സമരമുഖത്ത് പ്രത്യക്ഷപ്പെട്ടു കളഞ്ഞത്. എസ്.എഫ്.ഐയും കെ.എസ്.ടി.എയും മറ്റും സമരം നടത്തും. അവര്‍ ധര്‍ണ, പിക്കറ്റിങ് എന്നൊക്കെ പറഞ്ഞ് ഇറങ്ങും. അവരെ പൊലീസ് ലാത്തി പോയിട്ട് കൈകൊണ്ട് തൊടില്ല. അതുപോലെയാണോ സി.പി. ഐക്കാര്‍?
എന്തായിരുന്നു സി.പി.ഐ നടത്തിയ ഡി.ഐ. ജി ഓഫീസ് മാര്‍ച്ചിന്റെ പൊരുള്‍. വൈപ്പിന്‍ കോളജിലെ അക്രമവുമായി ബന്ധപ്പെട്ട് ഡി.വൈ.എഫ്.ഐ-എസ്.എഫ്.ഐ പ്രവര്‍ത്തകര്‍ക്കെതിരെ നടപടിയെടുക്കാതെ ഒത്താശ ചെയ്ത ഞാറയ്ക്കല്‍ സി.ഐയെ സസ്‌പെന്റ് ചെയ്യണം എന്ന ന്യായമായ ആവശ്യം മാത്രമേ സി.പി.ഐക്ക് ഉണ്ടായിരുന്നുള്ളു. പ്രധാന ഘടകകക്ഷി എന്ന സ്വാതന്ത്ര്യം ഉപയോഗിച്ചാണ് പൊലീസിന്റെ ബാരിക്കേഡ് തള്ളി നിലത്തിടാന്‍ ശ്രമിച്ചത്. പൊലീസിന്റെ ഭാഗത്തുനിന്ന് പക്ഷേ ഘടകകക്ഷിക്ക് കിട്ടേണ്ട മര്യാദ കിട്ടിയില്ല. സി.പി.ഐ ജില്ലാ സെക്രട്ടറി പി. രാജുവിനും കിട്ടി തല്ല്. കെ.എന്‍ സുഗതന്റെ കൈക്കും പരിക്കേറ്റു.
കാര്യങ്ങള്‍ ഇങ്ങനെ കൈവിട്ടുപോകുമ്പോഴും സി.പി.ഐ സംസ്ഥാന സെക്രട്ടറി കാനം രാജേന്ദ്രന്‍ മൗനം തുടരുകയാണ്. ഇനി ഞാന്‍ പറഞ്ഞിട്ട് കുട്ടികള്‍ക്ക് രണ്ടു തല്ല്കൂടി കിട്ടേണ്ട എന്ന സദുദ്ദേശ്യം മാത്രമാണ് സെക്രട്ടറിക്കുള്ളത്. എന്നാല്‍, പാര്‍ട്ടിയിലെ ചുണക്കുട്ടികള്‍ക്ക് അത് മനസ്സിലാവുന്നില്ല. എന്തുകൊണ്ട് വല്യേട്ടനോട് ഏറ്റെതിര്‍ക്കാന്‍ തയാറാവുന്നില്ല എന്നാണ് അണികളുടെ ചോദ്യം. പൊലീസിനെയും സി.പി.എമ്മിനെയും അതിരൂക്ഷമായ ഭാഷയില്‍ വിമര്‍ശിക്കാന്‍ സി.പി.ഐ എറണാകുളം ജില്ലാ സെക്രട്ടറി ധൈര്യം കാണിക്കുമ്പോള്‍ കാനത്തിന്റെ മൗനം ചര്‍ച്ചയാവുകയാണ്. ഇനി എപ്പോഴാണ് സഖാവിന് പ്രതികരണശേഷി ഉണ്ടാവുക എന്നാണ് അണികള്‍ ചോദിക്കുന്നത്.
കാര്യങ്ങള്‍ ഇങ്ങനെയൊക്കെ സംഭവിച്ചുവെങ്കിലും സി.പി.എം നേതൃത്വത്തിന് നല്ല മനസ്താപമുണ്ട്. എം.എല്‍.എയെ പൊലീസ് തല്ലിയത് ശരിയായില്ല എന്ന് പിണറായി വിജയനും കോടിയേരി ബാലകൃഷ്ണനും ഒരേ സ്വരത്തില്‍ പറഞ്ഞു. സംഭവത്തെ നിര്‍ഭാഗ്യകരം എന്ന് വിശേഷിപ്പിക്കാനുള്ള ആര്‍ജ്ജവവും പിണറായിയുടെ ഭാഗത്തുനിന്നുണ്ടായി. മുന്നണിയിലെ ഘടകകക്ഷികള്‍ തമ്മില്‍ ഈ വിധത്തില്‍ പ്രശ്‌നങ്ങള്‍ ഉണ്ടാവരുതായിരുന്നു എന്ന് മനസ്സ് തുറക്കാന്‍ കോടിയേരി ശ്രമിച്ചതും കേരളം കണ്ടു. എന്നിട്ടും സംഭവത്തെ അപലപിക്കാന്‍ കാനത്തിന് സമയമായിട്ടില്ല എന്നത് സി.പി.ഐക്കാരെ രോഷം കൊള്ളിക്കുകയാണ്. ഏതായാലും നേതാക്കള്‍ ഇടപെട്ടില്ലെങ്കില്‍ കാര്യങ്ങള്‍ കൂടുതല്‍ അപകടത്തിലേക്ക് പോകുമെന്ന് സി.പി.എം മനസ്സിലാക്കികഴിഞ്ഞു. അതുകൊണ്ടാണ് നേതാക്കള്‍ മൃദുവായി സി.പി.ഐയെ തലോടാന്‍ തുടങ്ങിയത്. എന്നാല്‍ സി.പി. ഐ അണികളുടെ രോഷം തണുപ്പിക്കാന്‍ അത് ഉപകരിക്കുമോ എന്നാണ് ഇനി അറിയാനുള്ളത്. മുന്നണി ബന്ധം ഉലയുന്ന അവസ്ഥയിലേക്ക് കാര്യങ്ങള്‍ എത്തുമോ എന്നറിയാന്‍ രാഷ്ട്രീയ നിരീക്ഷകര്‍ ബ്രേക്കറ്റ് ഉള്ളതും ഇല്ലാത്തതുമായ കമ്യൂണിസ്റ്റ് പാര്‍ട്ടികളിലേക്ക് കണ്‍ പാര്‍ക്കുന്ന മുഹൂര്‍ത്തം കൂടിയാണിത്.