സി.പി സൈതലവി
പാങ്ങിലെ കേസ് അന്നു കോടതിയില്‍ അവസാനത്തേതായിരുന്നു. മലപ്പുറം ജില്ല നിലവില്‍ വന്നിരുന്നുവെങ്കിലും ജില്ലാ സെഷന്‍സ് കോടതി, കോഴിക്കോട് ജില്ലാ കോടതിയുടെ അനുബന്ധമായി തുടരുകയാണ്. 1970 ഓക്ടോബര്‍- എട്ട് വ്യാഴാഴ്ച; വിചാരണ തീരുമ്പോള്‍ വൈകുന്നേരം അഞ്ചുമണിയായി. ബെഞ്ച് ക്ലാര്‍ക്ക് പ്രതികളുടെ ഒപ്പിന്നായി ഓരോരുത്തരെ വിളിച്ചു. ആദ്യം ഒപ്പിട്ട ഒന്നാം പ്രതി കുറുവ പഞ്ചായത്ത് പ്രസിഡന്റ് പി.കെ അഹമ്മദ് എന്ന ബാപ്പുട്ടിയുടെ പേന ക്ലാര്‍ക്ക്‌വാങ്ങി മറ്റുള്ളവര്‍ക്ക് ഒപ്പുവെക്കാന്‍ കൊടുത്തു. നൂറ്റാണ്ടു പഴക്കമുള്ള ബ്രിട്ടീഷ് നിര്‍മിത കെട്ടിടത്തിന്റെ മുകള്‍ നിലയില്‍ നിന്നും ഗോവണിയിറങ്ങിയ ബാപ്പുട്ടി എല്ലാവരും വന്നിട്ടും പേനകിട്ടാത്തതിനാല്‍ അതുവാങ്ങാന്‍ കാലിനു ജന്മനാലുള്ള തകരാര്‍ ഗൗനിക്കാതെ കോടതി മുറിയിലേക്കുതന്നെ കയറിച്ചെന്നു. സെഷന്‍സ് ജഡ്ജ് ജാനകിയമ്മ ചേംബറിലുണ്ട്. ക്ലാര്‍ക്കിനോട് പേന വാങ്ങി തിരിയുമ്പോഴേക്ക് വാതില്‍മറവില്‍നിന്നു ചാടിവീണ അക്രമി ബാപ്പുട്ടിയുടെ കഴുത്തിന് കുത്തിവീഴ്ത്തി. ഇരട്ടച്ചുരികയാല്‍ കഴുത്തും നെഞ്ചും പിളര്‍ന്ന് നാല്പത്തഞ്ചുകാരനായ ബാപ്പുട്ടി കോടതി മുറിയില്‍ പിടഞ്ഞമര്‍ന്നു. ജഡ്ജിയും പ്രാമാണികരായ അഭിഭാഷകരുമെല്ലാം സാക്ഷി നില്‍ക്കേ.
കേരളം ഒരു ഭരണമാറ്റത്തിന്റെ ആഘോഷപ്പൊലിമയിലായിരിക്കേ, രാവിലെ കോടതിയിലെത്തും മുമ്പ് കോഴിക്കോട് വലിയങ്ങാടിയില്‍ ചെന്ന് ബാഫഖി തങ്ങളുമായി കുശലം പറഞ്ഞുപോയ പി.കെ ബാപ്പുട്ടി നീതിപീഠത്തിനുമുന്നില്‍വീണു രക്തസാക്ഷിയാവുന്നു. കേരളംകണ്ട ഏറ്റവുംമികച്ച സാമൂഹിക പ്രവര്‍ത്തകരിലൊരാള്‍, ഗ്രാമങ്ങളിലെ പട്ടിണിപ്പാവങ്ങള്‍ക്കായി അക്ഷരാര്‍ത്ഥത്തില്‍ ജീവിതം മാറ്റിവെച്ച വികസന നായകന്‍, ഒരു നാടിന്റെ സമ്പൂര്‍ണ വെളിച്ചം അണഞ്ഞുപോയ വാര്‍ത്ത ആദ്യമാര്‍ക്കും വിശ്വസിക്കാനായില്ല. കോടതി മുറിയിലെ കൊലപാതകം ഇന്നും ഏതോ നാട്ടില്‍ മാത്രം കേട്ടുകേള്‍വിയുള്ള അസാധാരണ വാര്‍ത്തയാണ്. അന്നത്തെ ഒന്നാം പേജ് പത്രവാര്‍ത്ത ഇതായിരുന്നു:
‘പി.കെ ബാപ്പുട്ടിയെ കോടതിയില്‍ വെച്ചു കുത്തിക്കൊന്നു’
‘കോഴിക്കോട്, ഒക്‌ടോ: 8- മലപ്പുറം ജില്ലയിലെ പ്രമുഖ മുസ്്‌ലിംലീഗു പ്രവര്‍ത്തകരിലൊരാളും കുറുവ പഞ്ചായത്ത് ബോര്‍ഡിന്റെയും പാങ്ങ് സര്‍വ്വീസ് സഹകരണ ബാങ്കിന്റെയും പ്രസിഡന്റും മങ്കട നിയോജക മണ്ഡലത്തില്‍ മുസ്‌ലിംലീഗിന്റെ ജീവനാഡിയുമായ പി.കെ ബാപ്പുട്ടി ഇന്നു ഇവിടെ മലപ്പുറം ജില്ലാ സെഷന്‍സ് കോടതിയില്‍വെച്ച് ഒരക്രമിയില്‍ നിന്നും അതിദാരുണമാംവിധം കഠാരിക്കുത്തുകളേറ്റതിനാല്‍ മരണപ്പെട്ടവിവരം സവ്യസനം റിപ്പോര്‍ട്ട് ചെയ്യുന്നു. ബാപ്പുട്ടിയ്യുടെ മൃതദേഹം ചേവായൂര്‍ മെഡിക്കല്‍ കോളജ് ആസ്പത്രിയിലേക്കെടുത്തിരിക്കുകയാണ്.
ഇന്നു വൈകുന്നേരം അഞ്ച് മണിക്കു ശേഷം ഇവിടെയുള്ള മലപ്പുറം ജില്ലാ കോടതിയില്‍ വെച്ചാണ് സംഭവമെന്നാണറിയുന്നത്. പ്രസ്തുത കോടതിയില്‍ ഇന്നു വിചാരണ തുടര്‍ന്ന പാങ്ങ് തീവെപ്പു കേസിലെ ഒന്നാം പ്രതിയായ ബാപ്പുട്ടി സാഹിബിനെ പ്രസ്തുത കേസിലെ പ്രോസിക്യൂഷന്‍ വിഭാഗം സാക്ഷികളിലൊരാളായ കൃഷ്ണനാണത്രേ കുത്തിയത്. പ്രസ്തുത കേസിന്നാസ്പദമായ സംഭവത്തില്‍ മരണപ്പെട്ട അറുമുഖന്റെ അനുജനാണ് കൃഷ്ണന്‍. പ്രസ്തുത കേസ്സില്‍ പ്രോസിക്യൂഷന്‍ ഭാഗം സാക്ഷികളുടെ വിസ്താരം ഇന്നാണ് കോടതി പൂര്‍ത്തിയാക്കിയത്. മുപ്പതുപ്രതികളുള്ള പാങ്ങ് തീവെപ്പു കേസ്സിലെ ഇന്നത്തെ വിസ്താരം കഴിഞ്ഞശേഷം പതിവുപോലെ പ്രതികളിലോരോരുത്തരെയായി കോടതി ക്ലാര്‍ക്ക് ഒപ്പുവാങ്ങി അയച്ചുകൊണ്ടിരുന്നുവെന്നും അതിനിടക്കാണ് മുന്‍കൂട്ടി പ്ലാന്‍ ചെയ്ത പോലെ അക്രമി ബാപ്പുട്ടിയുടെ മേല്‍ ചാടിവീണ് ക്ഷണവേഗത്തില്‍ അനേകം തവണ കുത്തിയതെന്നും പറയപ്പെടുന്നു. കുഴുത്തിനും നെഞ്ചിനും പുറത്തും മറ്റും മാരകമായ കത്തിക്കുത്തിന്റെ മുറിവുകളേറ്റ് രക്തത്തില്‍ കുളിച്ചുകിടക്കുന്ന മൃതദേഹം ഏതുശിലാഹൃദയനേയും നടുക്കും.
പാങ്ങില്‍വെച്ച് ഒസ്സാന്‍ മുഹമ്മദ് എന്ന യുവാവിനെ കഠാരികൊണ്ട് കുത്തിപ്പരിക്കേല്‍പ്പിച്ചകേസിലെ ഒന്നാം പ്രതിയായിരുന്നു ആര്.എസ്.എസുകാരനായ കൃഷ്ണനെങ്കിലും പ്രസ്തുതകേസ്സില്‍ കോടതി വിട്ടയക്കുകയാണുണ്ടായത്. ഇന്നത്തെ സംഭവത്തെ തുടര്‍ന്ന് കൃഷ്ണനെ പോലീസ് കസ്റ്റഡിയിലെടുത്തിട്ടുണ്ട്.
ദേഹത്തിന്റെ പലഭാഗത്തും ഭീകരത ജനിപ്പിക്കുന്ന കുത്തുകളാണ് ബാപ്പുട്ടിക്കേറ്റിട്ടുള്ളത്. കഴുത്തിന്റെ വലതുവശത്ത് ഏതാണ്ട് അഞ്ചിഞ്ച് നീളത്തില്‍ ആഴത്തിലുള്ള കുത്തേറ്റതിനെ തുടര്‍ന്ന് കണ്ഠനാളത്തില്‍ ബീഭത്സമായ മുറിവാണേറ്റിട്ടുള്ളത്. നെഞ്ചിന്റെ ഇടതുവശത്ത് വലിച്ചുകീറിയത് പോലെ ഏതാണ്ട് ആറിഞ്ച് നീളത്തിലും മൂന്നിഞ്ച് വീതിയിലും ഉള്ളതാണ് മാരകമായ മറ്റൊരു മുറിവ്. ബാപ്പുട്ടിയുടെ പുറത്ത് ഗുരുതരമായ മറ്റൊരു കുത്തുമേറ്റിട്ടുണ്ട്.
വലതു കൈയിന്റെ മണികണ്ഠത്തിന്റെ രണ്ടു പാര്‍ശ്വങ്ങളില്‍ ഏതാണ്ട് ആറിഞ്ചും നാലിഞ്ചും നീളത്തില്‍ പറ്റിയിട്ടുള്ള മുറിവുകളും, മണികണ്ഠത്തിന്റെ മീതെയായി ഉള്ളില്‍ അത്ര തന്നെ നീളത്തില്‍ പറ്റിയിട്ടുള്ള മുറിവും നിരായുധനായ ബാപ്പുട്ടി അക്രമിയുടെ കുത്തുകള്‍ തണ്ടന്‍കൈകൊണ്ട് തടുത്തപ്പോള്‍ ഏറ്റതാണെന്നു തോന്നിക്കും. വലതുകൈയിന്റെ തള്ളവിരലിലും ചൂണ്ടുവിരലിനുമിടയിലും കഠാരയേറ്റിട്ടുണ്ട്.
ഏതവസ്ഥയിലും മുസ്‌ലിം സമുദായത്തിനുവേണ്ടി എന്തു ത്യാഗത്തിനും തയ്യാറുള്ള ബാപ്പുട്ടിക്കു 45 വയസ്സു പ്രായമുണ്ട്. ‘
മുസ്്‌ലിംലീഗ് സംസ്ഥാന പ്രസിഡന്റ് സയ്യിദ് അബ്ദുറഹിമാന്‍ ബാഫഖി തങ്ങള്‍ നിമിഷങ്ങള്‍ക്കകം കോഴിക്കോട് മെഡിക്കല്‍ കോളജില്‍ മയ്യിത്ത് സന്ദര്‍ശിച്ചു. ആഭ്യന്തര മന്ത്രി സി.എച്ചും എത്തി. സാധാരണക്കാര്‍ക്കിടയില്‍ ഹീറോ ആയി നില്‍ക്കുന്ന ബാപ്പുട്ടിയുടെ കൊലപാതകം സംബന്ധിച്ച വാര്‍ത്ത സമൂഹത്തില്‍ സൃഷ്ടിക്കാനിടയുള്ള ഗുരുതരാവസ്ഥ തിരിച്ചറിഞ്ഞ് ക്ഷമയും സമാധാനവും പാലിക്കാന്‍ ആഹ്വാനം ചെയ്തുകൊണ്ട് സയ്യിദ് അബ്ദുറഹിമാന്‍ ബാഫഖി തങ്ങള്‍ അടിയന്തരമായി പത്രപ്രസ്താവനയിറക്കി. നാട്ടില്‍ അസാമാധാനവും രക്തച്ചൊരിച്ചിലും സൃഷ്ടിക്കാന്‍ ഉദ്ദേശിക്കുന്ന അക്രമികള്‍ക്കു വളംവെച്ചുകൊടുക്കുന്ന വിധത്തിലുള്ള യാതൊരു സംഗതികളിലും ആരും ഏര്‍പ്പെട്ടുപോകരുത് എന്ന തങ്ങളുടെ പ്രസ്താവന പത്രങ്ങള്‍ പ്രാധാന്യ പൂര്‍വം നല്‍കി.
മലപ്പുറം ജില്ലാ മുസ്‌ലിംലീഗ് പ്രസിഡന്റ് പാണക്കാട് പി.എം.എസ്.എ പൂക്കോയ തങ്ങള്‍ നൂറുക്കണക്കിന് പ്രവര്‍ത്തകര്‍ തിങ്ങിനില്‍ക്കെ മെഡിക്കല്‍ കോളജിലെത്തി മയ്യിത്ത് ഏറ്റുവാങ്ങി. ആസ്പത്രി പരിസരത്ത് മയ്യിത്ത് നമസ്‌കാരത്തിന് അദ്ദേഹം നേതൃത്വം നല്‍കി. പൂക്കോയ തങ്ങളുടെ നേതൃത്വത്തില്‍ അനേകം വാഹനങ്ങളുടെ അകമ്പടിയോടെ വിലാപയാത്ര സ്വദേശമായ മലപ്പുറം കുറുവയിലെ പാങ്ങിലേക്കു പുറപ്പെട്ടു. പാങ്ങ് ജുമാമസ്ജിദില്‍ മയ്യിത്ത് നമസ്‌കാരത്തിന് ബാഫഖി തങ്ങള്‍ നേതൃത്വം നല്‍കി.
പ്രഗത്ഭ അഭിഭാഷകനായ അഡ്വ. കെ. കുഞ്ഞിരാമമേനോന്‍ വാദിച്ച കേസ് പി.കെ ബാപ്പുട്ടി, സഹോദരന്‍ പി.കെ കുഞ്ഞു തുടങ്ങി പ്രതിചേര്‍ക്കപ്പെട്ടവരെല്ലാം കുറ്റക്കാരല്ലെന്നു കണ്ടു പിന്നീട് കോടതി വെറുതെ വിട്ടു.
കോടതി മുറിയിലെ കൊലപാതകത്തില്‍ ആര്.എസ്.എസ്സുകാരനായ കൃഷ്ണന്‍ ജീവപര്യന്തം തടവിനു ശിക്ഷിക്കപ്പെട്ടു.
കോടതി ശിക്ഷിച്ചാലും ഈ കേസില്‍ ബാപ്പുട്ടി കുറ്റക്കാരനാണെന്നു നാട്ടിലൊരാളും വിശ്വസിക്കുകയില്ലായിരുന്നു. നാട്ടുമ്പുറത്തെ ഇടുങ്ങിയ ഒറ്റയടിപ്പാതയിലൂടെ വരുമ്പോള്‍ ആരാദ്യം താഴെയിറങ്ങിക്കൊടുക്കണമെന്ന നിലവാരം കുറഞ്ഞ മൂപ്പിളമ തര്‍ക്കം മൂര്‍ച്ഛിച്ചു സംഘര്‍ഷത്തില്‍ കലാശിച്ച ഒരു സംഭവത്തില്‍, പി.കെ ബാപ്പുട്ടി എന്ന മത, ജാതി, രാഷ്ട്രീയ ഭേദമില്ലാതെ ജനങ്ങളെസേവിച്ചു കഴിഞ്ഞഒരാള്‍ കക്ഷിചേരില്ലെന്നു ആര്‍ക്കുമറിയാത്തതല്ല. തൊട്ടുമുമ്പ് നടന്ന അക്രമത്തില്‍ പരിക്കുപറ്റിയ ആളെ സന്ദര്‍ശിക്കാന്‍ പോയ ബാപ്പുട്ടി കേസിനാസ്പദമായ സംഭവസമയം പെരിന്തല്‍മണ്ണ ഗവ. ആസ്പത്രിയിലായിരുന്നുവെന്ന് സാക്ഷിപറയാന്‍ ഉത്തരവാദപ്പെട്ടവര്‍തന്നെ ഏറെയുണ്ടായിരുന്നുതാനും. പക്ഷേ നാട്ടിലെല്ലാവര്‍ക്കും കണ്ണിലുണ്ണിയായിരുന്നുവെങ്കിലും ബാപ്പുട്ടിയുടെ രാഷ്ട്രീയവും ജനപ്രിയതയും കണ്ണിലെ കരടായിമാറിയിരുന്നു മറ്റു ചിലര്‍ക്ക്.
സ്വാതന്ത്ര്യാനന്തരം സംഘ്പരിവാരം ഇന്ത്യയാകെ വര്‍ഗീയ രാഷ്ട്രീയത്തിന്റെ പന്തം കൊളുത്താന്‍ സമരായുധമാക്കിയ ‘മലപ്പുറം ജില്ല’ എന്ന ആശയത്തിന്റെ ഉപജ്ഞാതാവാണ് പി.കെ ബാപ്പുട്ടി. മുസ്‌ലിംലീഗ് സംസ്ഥാന കൗണ്‍സില്‍ അംഗവും പെരിന്തല്‍മണ്ണ താലൂക്ക് മുസ്‌ലിംലീഗ് ജോയിന്റ് സെക്രട്ടറിയും മങ്കട ഫര്‍ക്കാ മുസ്‌ലിംലീഗിന്റെ ആകെത്തുകയുമായിരുന്നു അദ്ദേഹം. മെലിഞ്ഞു പൊക്കം കൂടിയ സുന്ദരനും സുമുഖനുമായ വെള്ളാരം കണ്ണുകളുള്ള, ആദ്യപരിചയത്തില്‍ തന്നെ ആരെയും തന്റെ നിലപാടുകളിലേക്ക് വശീകരിക്കാന്‍ തക്ക സംഭാഷണ ചതുരനായ പി.കെ ബാപ്പുട്ടി താന്‍ ജീവിക്കുന്ന കാലഘട്ടത്തിന്റെ ആവേശനാമമായി മാറി. വേദികളിലല്ലായിരുന്നു; എപ്പോഴും ആള്‍ക്കൂട്ടത്തില്‍ മാത്രം.
പാലപ്ര കൊറ്റോത്ത് കുഞ്ഞിപ്പോക്കരുടെ പുത്രനായി 1925 ജൂലൈ 15 ന് ജനിച്ച അഹമ്മദ് പില്‍ക്കാലം പി.കെ ബാപ്പുട്ടി എന്നു മാത്രമായി അറിയപ്പെട്ടതു തന്നെ ആ ജനസ്‌നേഹ നിമിത്തം. പ്രമാണിയായ പിതാവ് കുഞ്ഞിപ്പോക്കര്‍ പ്രസിദ്ധനായ നാട്ടുമാധ്യസ്ഥന്‍. കൃഷിയും സമ്പത്തുമുള്ള കുടുംബകാര്യങ്ങള്‍ നോക്കാതെ ബാല്യം തൊട്ടേ പാവപ്പെട്ടവരുടെ തോഴനായി ജനകീയ പ്രശ്‌നങ്ങളുടെ തോളില്‍ കയ്യിട്ടു നടന്നു ബാപ്പുട്ടി. വികസനത്തിന്റെ ഒരു തരിമ്പുമെത്താത്ത സ്വന്തം ദേശത്ത് സ്‌കൂളുകളും ആസ്പത്രികളും പാലവും കറന്റും വെള്ളവുമെത്തുന്നത് സ്വപ്‌നംകണ്ടു അതിനുപിന്നാലെ പോയി. ആ യാത്രയില്‍ ദീര്‍ഘകാലം പാങ്ങില്‍ നിന്നുള്ള ഗ്രാമപഞ്ചായത്തംഗമായി. 1963 ല്‍ തെരഞ്ഞെടുപ്പിലൂടെ ആദ്യമായി അധികാരത്തില്‍ വന്ന കുറുവ പഞ്ചായത്ത് ബോര്‍ഡിന്റെ പ്രസിഡന്റുമായി. ഒരു ഡയറിയും കക്ഷത്തുവെച്ച് അതിരാവിലെ വീട്ടില്‍ നിന്നു പുറപ്പെടുന്ന ബാപ്പുട്ടി, റോഡും വാഹനങ്ങളുമൊന്നും യാത്രാസൗകര്യം നല്‍കാത്ത കാലത്ത് കിലോമീറ്ററുകള്‍ കാല്‍നടയായി പോയി അധികാര കേന്ദ്രങ്ങളെ സമീപിച്ചു നാടിനു വികസനം കൊണ്ടുവന്നു. സമ്പന്ന കുടുംബത്തിലെ അംഗമാണെങ്കിലും കയ്യിലൊരു ചില്ലിക്കാശുപോലും കാണില്ല മിക്കപ്പോഴും. ഉള്ളത് അത്യാവശ്യക്കാര്‍ക്കു കൊടുത്താവും യാത്ര.
എത്തിയിടത്ത് കാണാം എന്ന ഈ യാത്രയിലാണ് വള്ളുവനാട്ടില്‍ ചുവപ്പുകോട്ടകള്‍ ഭേദിച്ച് പി.കെ ബാപ്പുട്ടി പച്ചക്കൊടി ഉയര്‍ത്തിയത്. സര്‍വേന്ത്യ മുസ്‌ലിംലീഗ് കാലം തൊട്ടേ സംഘടനയുടെ മുന്‍നിര പ്രവര്‍ത്തകനായി ഓടിനടന്ന ബാപ്പുട്ടി കെ.കെ മുഹമ്മദ് ശാഫി, പി.ടി സൈത് സാഹിബ്, പി.വി.എസ് മുസ്തഫ പൂക്കോയ തങ്ങള്‍, കെ.കെ.എസ് തങ്ങള്‍, കെ.വി എസ് തങ്ങള്‍, വെങ്കിട്ട മുഹമ്മദ് കുഞ്ഞാപ്പ തുടങ്ങിയവര്‍ക്കൊപ്പം പെരിന്തല്‍മണ്ണ താലൂക്കില്‍ മുസ്്‌ലിംലീഗിനെ ബഹുജന ശക്തിയാക്കി മാറ്റി. പി.കെ ബാപ്പുട്ടിയുടെ പ്രവര്‍ത്തനങ്ങളും മങ്കട അബ്ദുല്‍ അസീസിന്റെ പ്രസംഗങ്ങളുമാണ് വള്ളുവനാട്ടിലെ കമ്യൂണിസ്റ്റ് വേരുകള്‍ തകര്‍ത്ത് മുസ്‌ലിംലീഗിനെ സ്ഥാപിച്ചതെന്ന് സി.എച്ച് മുഹമ്മദ് കോയ വിശേഷിപ്പിച്ചു. സഞ്ചാര യോഗ്യമായ റോഡുകളില്ലാത്ത കാലത്ത് പെരിന്തല്‍മണ്ണ താലൂക്കിലുടനീളം കാല്‍നട യാത്ര ചെയ്താണ് ബാപ്പുട്ടി മുസ്‌ലിംലീഗ് സംഘടിപ്പിച്ചത്. താലൂക്കില്‍ പി.കെ ബാപ്പുട്ടിയോളം മറ്റൊരു മേഖലയിലേക്കും നീങ്ങാതെ സമ്പൂര്‍ണമായി സംഘടനാ പ്രവര്‍ത്തനത്തില്‍ മാത്രം ഏര്‍പ്പെട്ട മറ്റൊരു നേതാവുണ്ടാവില്ല.
എന്നും പദയാത്രകള്‍. പാര്‍ട്ടിയില്‍ അംഗങ്ങളെച്ചേര്‍ക്കാനുള്ള പരിശ്രമങ്ങള്‍. തനിക്ക് ഏറെ അടുപ്പമുള്ള ധനാഢ്യനായ ഒരു വ്യക്തിയെ സമീപിച്ച് മുസ്‌ലിംലീഗില്‍ അംഗത്വമെടുക്കാന്‍ സഹപ്രവര്‍ത്തകരോടൊപ്പം ചെന്ന ബാപ്പുട്ടി ആവശ്യപ്പെട്ടു. വേണമെങ്കില്‍ പണംതരാം; മെമ്പര്‍ഷിപ്പ് വേണ്ടെന്നു അദ്ദേഹം നിരസിച്ചു. ജീവിക്കാന്‍ ഗതിയില്ലാതെ സഹായം തേടിയല്ല; ഈ രാജ്യത്തു സമുദായത്തിന് മാന്യമായി നിലനില്‍ക്കാന്‍ മുസ്‌ലിംലീഗ് വേണം. അതിനു ചേരാന്‍ ഒരുക്കമാണോ എന്നറിയാനാണ് വന്നതെന്നു മുഖത്തടിച്ചപോലെ പറഞ്ഞ ബാപ്പുട്ടിക്കു മുന്നില്‍ മൗനിയായ ധനാഢ്യബന്ധു, പില്‍ക്കാലം മുസ്‌ലിംലീഗില്‍ ചേരുകയും ചെയ്തു. നിലപാടുകളിലെ ധീരതയും ലക്ഷ്യം നേടുന്നതിലുള്ള ദൃഢനിശ്ചയവുമായിരുന്നു ബാപ്പുട്ടിയുടെ മുദ്ര. വികസനത്തിന്റെ ഫയല്‍ പാസ്സാക്കാന്‍ ബന്ധപ്പെട്ട ഓഫീസില്‍ ഒരു തവണയേ ബാപ്പുട്ടിക്ക് പോവേണ്ടതുള്ളു. ബാപ്പുട്ടി ഒരു ഓഫീസിലെത്തിയോ ആ പദ്ധതി അനുവദിച്ചുകിട്ടിയിരിക്കും.
പി.കെ ബാപ്പുട്ടിയുമായുള്ള ആത്മ സൗഹൃദത്തിന്റെ സമ്മര്‍ദ്ദം കൂടിയാണ് 1967 ല്‍ മങ്കടയില്‍ മത്സരിക്കാന്‍ സി.എച്ച് താല്‍പര്യമെടുത്തതെന്ന് കേട്ടിട്ടുണ്ട്. സി.എച്ച് ആദ്യമായി മന്ത്രിയായതും മങ്കടയില്‍ നിന്ന് വിജയിച്ചാണ്. റോഡിനും മറ്റുമായി സി.എച്ചിന്റെ ശിപാര്‍ശക്കത്തും വാങ്ങി പൊതുമരാമത്ത് മന്ത്രി ടി.കെ ദിവാകരനെ കാണാന്‍ ബാപ്പുട്ടി ചെല്ലും. സി.എച്ച് തന്നെ ബാപ്പുട്ടിയോട് പിന്നീട് പറഞ്ഞു: ‘ദിവാകരന്‍ മന്ത്രി എന്തുവേണമെങ്കിലും അനുവദിച്ചോളാം; ദയവു ചെയ്ത് ബാപ്പുട്ടിയെ ഇങ്ങോട്ട് അയക്കരുതെന്ന് പറഞ്ഞിട്ടുണ്ട്.’ കാരണം ബാപ്പുട്ടി ചെന്നാല്‍ അന്നു മന്ത്രിക്കു മറ്റൊരു ഫയലും നോക്കാന്‍ നേരം കിട്ടി എന്നു വരില്ല.
ഖബറടക്ക ചടങ്ങ് കഴിഞ്ഞു നില്‍ക്കുമ്പോള്‍ പ്രഥമ കലക്ടര്‍ കെ ഭാസ്‌കരന്‍ നായര്‍ പറഞ്ഞു: ജില്ല നിലവില്‍ വന്ന ഈ പതിനാലു മാസത്തിനകം ഏറ്റവുമധികം തവണ തന്നെ ഓഫീസില്‍ വന്നു കണ്ട് ഏറ്റവുമധികം വികസനം കൊണ്ടു പോയ പഞ്ചായത്ത് പ്രസിഡന്റ് പി.കെ ബാപ്പുട്ടിയാണെന്ന്.
അവിഭക്ത പാലക്കാട് ജില്ലയുടെ ഭാഗമായിരുന്ന കാലത്ത് ജനങ്ങളുടെ ആവലാതികളുമായി കലക്ടറെ കണ്ടു മടങ്ങണമെങ്കില്‍ തന്നെ 180 ല്‍ പരം കിലോമീറ്റര്‍ യാത്ര ചെയ്യേണ്ടിവരുന്ന ദുരനുഭവങ്ങളില്‍ നിന്ന് പി.കെ ബാപ്പുട്ടി എന്ന യുവ പൊതു പ്രവര്‍ത്തകനുണ്ടായ ഉള്‍വിളിയാണ് മലപ്പുറം ജില്ല എന്ന ആശയമായിത്തീര്‍ന്നത്. വികസനം വരണമെങ്കില്‍ റവന്യൂ ഭരണ മേഖലയുടെ വിസ്തൃതി ചുരുക്കിയേ മതിയാവൂ.
1959 ല്‍ പെരിന്തല്‍മണ്ണ കോസ്‌മോ പൊളിറ്റന്‍ ഹാളില്‍ നടന്ന താലൂക്ക് മുസ്‌ലിംലീഗ് വാര്‍ഷിക കൗണ്‍സിലില്‍ കോഴിക്കോട്, പാലക്കാട് ജില്ലകളിലെ അവികസിത പ്രദേശങ്ങള്‍ ചേര്‍ത്ത് മലപ്പുറം ആസ്ഥാനമായി ജില്ല രൂപീകരിക്കണമെന്ന് പി.കെ ബാപ്പുട്ടി പ്രമേയം വഴി ആവശ്യപ്പെട്ടു. അന്നത് ഏറെപേരും അപ്രായോഗികമായ ഒരു ചിന്തയായി കരുതി. സംസ്ഥാനത്തു നിലവിലുണ്ടായിരുന്ന 57 താലൂക്കുകളില്‍ വികസനത്തില്‍ ഏറ്റവും പിന്നിലെ സ്ഥാനത്തുള്ള ഏറനാട് (53), പെരിന്തല്‍മണ്ണ (51), തിരൂര്‍ (50), പൊന്നാനി (49) താലൂക്കുകളെയാണ് മലപ്പുറം ജില്ല വരുമ്പോള്‍ ഉള്‍പ്പെടുത്തിയത്. ഇതനുസരിച്ചുള്ള ഒരു പട്ടിക തയ്യാറാക്കിയായിരുന്നു കൗണ്‍സിലില്‍ ബാപ്പുട്ടി സംസാരിച്ചത്. 1960 ല്‍ മങ്കടയില്‍ മുസ്‌ലിംലീഗ് സ്ഥാനാര്‍ത്ഥിയായി മത്സരിച്ചു വിജയിച്ച അഡ്വ. ആലങ്കോട് പി അബ്ദുല്‍ മജീദിനോടു മലപ്പുറംജില്ല എന്ന ആവശ്യം ഉയര്‍ത്താനുള്ള പ്രേരണ ചെലുത്തിയതും ബാപ്പുട്ടി തന്നെ. 1961 ല്‍ അഡ്വ. അബ്ദുല്‍ മജീദ് സാഹിബ് മലപ്പുറം ആസ്ഥാനമായി ജില്ല രൂപീകരിക്കണം എന്ന ആവശ്യം നിയമസഭയില്‍ ആദ്യമായി ഉന്നയിച്ചു. വ്യക്തമായ സ്ഥിതി വിവരക്കണക്കുകളുടെ അടിസ്ഥാനത്തിലായിരുന്നു ഇത്.
1967 ല്‍ മുസ്‌ലിംലീഗിന് ആദ്യമന്ത്രിസഭാപ്രവേശം ലഭിക്കുമ്പോള്‍ മങ്കടയുടെ ജനപ്രതിനിധിയായിരുന്ന സി.എച്ചിനോടും തന്റെ പ്രിയ സുഹൃത്ത് എം.പി.എം അഹമ്മദ് കുരിക്കളോടും മലപ്പുറം ജില്ലാകാര്യമുണര്‍ത്തി തിരുവനന്തപുരം യാത്ര പലവട്ടം നടത്തി ബാപ്പുട്ടി. മന്ത്രി ബാപ്പു കുരിക്കള്‍ പിന്നാക്ക പ്രദേശങ്ങളുടെ വികസനത്തിന് മലപ്പുറം ജില്ല രൂപീകരിക്കുക എന്നത് ലക്ഷ്യമായി പ്രഖ്യാപിച്ചു. സി.എച്ച് മുന്നില്‍ നിന്നു. സംഘ്പരിവാരം എതിര്‍പ്പിന്റെ കൊടുങ്കാറ്റുയര്‍ത്തി. രാജ്യമെങ്ങും പ്രതിഷേധ സമരങ്ങള്‍ നടത്തി. ആര്.എസ്.എസ് പരമാചാര്യന്‍ ഗോള്‍വാള്‍ക്കര്‍ മുതല്‍ അടല്‍ ബിഹാരി വാജ്‌പേയ്‌വരെ ഈ പ്രക്ഷോഭത്തില്‍ കണ്ണി ചേര്‍ന്നു. 1969 ഫെബ്രു 8 ന് തൃശൂരില്‍ നടന്ന ആര്.എസ്.എസ് സംഗമത്തില്‍ പ്രസംഗിച്ച ഗോള്‍വാള്‍ക്കര്‍ മലപ്പുറം ജില്ല എന്നത് ഒരു ‘മഹാവിപത്ത്’ ആണെന്ന് പ്രഖ്യാപിച്ചു ഹിന്ദുത്വ രാഷ്ട്രീയത്തിനു ചൂടുപകര്‍ന്നു.
ഏപ്രില്‍ 27 ന് മുംബൈയില്‍ നടന്ന ജനസംഘം വാര്‍ഷിക സമ്മേളനം മലപ്പുറം ജില്ലാ വിരുദ്ധ പ്രക്ഷോഭത്തിന് കമ്മിറ്റി രൂപീകരിച്ചു. എ. ബി വാജ്‌പേയ് അധ്യക്ഷനായിരുന്നു. കേരളത്തില്‍ കേളപ്പന്‍ സമരം നയിച്ചു.
കോലാഹലങ്ങളെ കൂസാതെ സപ്ത മുന്നണി സര്‍ക്കാര്‍ മലപ്പുറം ജില്ല പ്രഖ്യാപിച്ചു. 1969 ജൂണ്‍ 16 ന് ജില്ല നിലവില്‍വന്നു. പി.കെ ബാപ്പുട്ടിയുടെ ജീവിതാഭിലാഷം സാഫല്യം നേടി. ഈ ചിന്ത ആദ്യമുണര്‍ത്തിയ ബാപ്പുട്ടി എന്ന ജനകീയ നാമം സംഘ്പരിവാരത്തിന്റെ ഉള്ളില്‍ കനലായി കിടന്നു. മലപ്പുറം ജില്ലാവിരുദ്ധ പ്രക്ഷോഭത്തിന്റെ അനുബന്ധമായിരുന്നു അങ്ങാടിപ്പുറം തളിക്ഷേത്ര പ്രശ്‌നവും. ഇതിന്റെ മറവില്‍ സംഘര്‍ഷം വിതക്കാനുള്ള രാഷ്ട്രീയ ഗൂഢാലോചനക്കെതിരെ ഹൈന്ദവ വിശ്വാസികളെപ്പോലും സജ്ജമാക്കുന്നതില്‍ പി.കെ ബാപ്പുട്ടിയുടെ ജനകീയ തന്ത്രങ്ങള്‍ വിജയിച്ചു. ബാപ്പുട്ടിയുടെ കര്‍മ്മമേഖലയിലെ അങ്ങാടിപ്പുറം ആയിരുന്നു ജില്ലാ വിരുദ്ധ സമരത്തിന്റെയും തളിക്ഷേത്ര പ്രക്ഷോഭത്തിന്റെയും പ്രധാന കേന്ദ്രം. പരിസര പ്രദേശങ്ങളില്‍ വര്‍ഗീയ സംഘര്‍ഷത്തിന് ആര്.എസ്.എസ് മുതിര്‍ന്നു. എല്ലാ ഗൂഢ നീക്കങ്ങളെയും പരാജയപ്പെടുത്തിയ മതഭേദമില്ലാത്ത ജനസ്വാധീനമായിരുന്നു പി.കെ ബാപ്പുട്ടി. 1960കളുടെ അവസാനം മലപ്പുറം ജില്ലാ പ്രദേശത്ത് സംഘ്പരിവാരം വര്‍ഗീയ സംഘര്‍ഷങ്ങള്‍ക്കു പുതുരീതികള്‍ തേടിയപ്പോള്‍ കലാപത്തിന്റെ പ്രഭവകേന്ദ്രമാകുമെന്ന് കരുതിയ പെരിന്തല്‍മണ്ണ താലൂക്കില്‍ അക്രമികളുടെ തന്ത്രങ്ങളെ മത സൗഹാര്‍ദ്ദവും സമാധാന ശ്രമങ്ങളും കൊണ്ട് അടിത്തട്ടില്‍ പ്രതിരോധിച്ച നയതന്ത്രജ്ഞന്‍, മുസ്‌ലിംലീഗ് രാഷ്ട്രീയത്തിന്റെ കരുത്തും കാതലും. ആരോടും സ്‌നേഹത്തോടെ ചിരിച്ചു മാത്രം സംസാരിക്കാറുണ്ടായിരുന്ന ബാപ്പുട്ടിക്ക് ഒരു പങ്കുമില്ലെന്ന് പകല്‍ വെളിച്ചം പോലെ അറിയുന്ന വിഷയത്തിന്റെ പേരില്‍ കൊന്നു തള്ളാന്‍ മാത്രം വിരോധം ആര്.എസ്.എസ്സു കാരനില്‍ ചെലുത്തിയ കാരണം മറ്റെന്തുണ്ട്.