ക്രിസ്റ്റ്യാനോ റൊണാള്‍ഡോ ഇഷ്ടതാരമായതിനാല്‍ കോപ്പ അമേരിക്ക ഫൈനല്‍ വേദിയില്‍ ലയണല്‍ മെസ്സിയെ അവഗണിച്ചുവെന്ന വാദങ്ങള്‍ തള്ളി അര്‍ജന്റീനന്‍ യുവ താരം അലജാന്‍ഡ്രോ ഗര്‍നാച്ചോ. കോപ്പ അമേരിക്ക ഫൈനല്‍ വിജയത്തിന് ശേഷം മെസ്സിക്ക് ഒപ്പം ആഘോഷങ്ങളില്‍ പങ്കെടുക്കാന്‍ ക്രിസ്റ്റ്യാനോ റൊണാള്‍ഡോയുടെ ആരാധകനായ ഗര്‍നാച്ചോ മടിച്ചുവെന്നാണ് വീഡിയോ സഹിതം ഒരു വിഭാഗം ആരാധകര്‍ ചൂണ്ടിക്കാട്ടിയത്.
മത്സരത്തിനിടെ പരിക്കേറ്റ ലയണല്‍ മെസ്സി ഡഗ്ഔട്ടില്‍ മടങ്ങിയെത്തിയപ്പോള്‍ ഗര്‍നാച്ചോ സൂപ്പര്‍താരത്തെ അവഗണിച്ചതായും ആരാധകര്‍ ചൂണ്ടിക്കാട്ടി. എന്നാല്‍ താനും മെസ്സിയും പരസ്പരം ആലിംഗനം ചെയ്യുന്ന ചിത്രങ്ങള്‍ പങ്കുവെച്ച് താരം ആരാധകന് വായടപ്പന്‍ മറുപടി നല്‍കി. ഇമോജികളിലൂടെ അര്‍ജന്റീനന്‍ യുവതാരം തന്റെ പ്രതിഷേധം പങ്കുവെയ്ക്കുകയും ചെയ്തു.
ഇംഗ്ലീഷ് പ്രീമിയര്‍ ലീഗില്‍ മാഞ്ചസ്റ്റര്‍ യുണൈറ്റഡിന്റെയും മിന്നും താരമാണ് ഗര്‍നാച്ചോ. മുമ്പ് പലതവണ ഗോള്‍നേട്ടത്തിന് ശേഷം അര്‍ജന്റീനന്‍ താരം ക്രിസ്റ്റ്യാനോ റൊണാള്‍ഡോയെ അനുകരിച്ച് ഗോള്‍ ആഘോഷിച്ചിരുന്നു. പിന്നാലെ ക്രിസ്റ്റ്യാനോയെ അനുകരിക്കുന്നത് നിര്‍ത്തണമെന്ന് ആവശ്യപ്പെട്ട് അര്‍ജന്റീനന്‍ ഇതിഹാസമായ എയ്ഞ്ചല്‍ ഡി മരിയ രംഗത്തെത്തിയിരുന്നു. എന്നാല്‍ തന്റെ ആരാധകപുരുഷനെ അനുകരിക്കുന്നത് നിര്‍ത്താന്‍ ഗര്‍നാച്ചോ തയ്യാറായില്ല.