മുംബൈ: പ്രധാനമന്ത്രി നരേന്ദ്രമോദിയെ രാഷ്ട്രപിതാവെന്ന് വിശേഷിപ്പിച്ച് മഹാരാഷ്ട്ര മുഖ്യമന്ത്രി ദേവേന്ദ്ര ഫഡ്‌നാവിസിന്റെ ഭാര്യ വിവാദത്തില്‍. മോദിക്ക് ജന്മദിനാശംസകള്‍ നേര്‍ന്ന് ട്വിറ്ററിലൂടെയാണ് അമൃത ഫഡ്‌നാവിസ് മോദിയെ ഫാദര്‍ ഓഫ് അവര്‍ കണ്‍ട്രി എന്ന് വിശേഷിപ്പിച്ചത്. രാഷ്ട്രപിതാവ് മഹാത്മാഗാന്ധിയാണെന്ന് ചൂണ്ടിക്കാണിച്ച് ഒട്ടേറെപേര്‍ രംഗത്തെത്തിയതോടെ അമൃതയുടെ ട്വീറ്റ് വിവാദമാവുകയായിരുന്നു.
മഹാത്മഗാന്ധി മാത്രമാണ് ഇന്ത്യയുടെ രാഷ്ട്രപിതാവെന്നായിരുന്നു ട്വിറ്റുകള്‍. മോദിയെ മഹത്വവല്‍ക്കരിക്കാനുള്ള മനഃപൂര്‍വമായ ശ്രമമാണെന്നായിരുന്നു സമൂഹ മാധ്യമങ്ങളിലെ വിമര്‍ശനം. നരേന്ദ്രമോദിക്ക് ജന്മദിനാശംസകള്‍ നേരുന്ന വീഡിയോയോട് ചേര്‍ത്താണ് അമൃത ഫഡ്‌നാവിസ് വിവാദ ട്വീറ്റ് ചെയ്തത്. നേരത്തെയും വിവാദ ട്വിറ്റുകളുടെ പേരില്‍ ഇവര്‍ വാര്‍ത്തകളില്‍ ഇടം പിടിച്ചിരുന്നു.