വസ്തു നികുതി നിര്‍ണയിച്ച ശേഷം കെട്ടിടത്തിലെ തറ വിസ്തൃതിയില്‍ ഉള്‍പ്പെടെ മാറ്റം വരുത്തുന്നത് അറിയിക്കാനുള്ള തീയതി നാളെ അവസാനിരിക്കെ ഭൂരിഭാഗം പേര്‍ക്കും അവസരം ലഭിച്ചില്ല. തദ്ദേശ വകുപ്പുകള്‍ക്ക് ഇത് സംബന്ധിച്ച് വ്യക്തതയില്ലാത്തതും മാറ്റത്തിനുള്ള 9 ബി ഫോറം വൈകി ലഭിച്ചതുമാണ് കാരണം.
നിര്‍ദ്ദേശം സംബന്ധിച്ച് ഭൂരിഭാഗം ജനത്തിനും അറിവില്ലാത്തത് ഭാവിയില്‍ പിഴയടക്കം ശിക്ഷ നടപടികള്‍ക്ക് വഴിയൊരുക്കിയേക്കും. മാര്‍ച്ച് അവസാനമാണ് വസ്തു നികുതി നിര്‍ണയിക്കപ്പെട്ട ശേഷം കെട്ടിടത്തിന്റെ മാറ്റം തദ്ദേശ സെക്രട്ടറിയെ അറിയിക്കണമെന്ന ഉത്തരവ് സര്‍ക്കാര്‍ പുറത്തിറക്കിയത്.
ഇത് സംബന്ധിച്ച് ചട്ടങ്ങളും രീതികളും ഒരുപാട് നിലനില്‍ക്കെ തന്നെ ഉദ്യോഗസ്ഥര്‍ക്ക് പോലും ഇതിനെക്കുറിച്ച് കൃത്യമായ ഒരു ധാരണയില്ലാത്തത് വലിയ വെല്ലുവിളി ഉയര്‍ത്തുന്നുണ്ട്.