ചികിത്സ ലഭിക്കാതെ ആദിവാസി ശിശു മരിച്ച് ആഴ്ചകള്‍ക്കകം വീണ്ടും വയനാട് ഗവ. മെഡിക്കല്‍ കോളേജ് ആശുപത്രിയില്‍ മതിയായ ചികിത്സ ലഭിക്കാതെ രോഗി മരിച്ചതായി ആരോപണം. തരുവണ വിയ്യൂര്‍കുന്ന കോളനിയിലെ രാമനാണ് മരിച്ചത്. മൃതദേഹത്തോട് മെഡിക്കല്‍ കോളേജ് അധികൃതര്‍ അനാദരവ് കാട്ടിയതായും പരാതിയുണ്ട്.
ദേഹാസ്വാസ്ഥ്യവും ഛര്‍ദിയും അനുഭവപ്പെട്ടതിനെ തുടര്‍ന്ന് കഴിഞ്ഞ ദിവസം രാവിലെയാണ് തരുവണ സ്വദേശി രാമനെ ആശുപത്രിയില്‍ പ്രവേശിപ്പിച്ചത്. സ്‌കാനിംഗില്‍ രക്തം കട്ടപിടിച്ചതായി കണ്ടെത്തിയിട്ടും വിദഗ്ധ ചികിത്സ നല്‍കുകയോ ഐസിയുവില്‍ പ്രവേശിപ്പിക്കുകയോ ചെയ്യാതെ രോഗിയെ വാര്‍ഡിലേക്ക് മാറ്റിയെന്ന് ബന്ധുക്കള്‍ ആരോപിച്ചു.