ആലപ്പുഴ എസ്ഡിപിഐ സംസ്ഥാന നേതാവ് ഷാനിന്റെ വധത്തില്‍ പ്രതികളുടെ അറസ്റ്റ് രേഖപ്പെടുത്തി. കേസില്‍ നേരിട്ട് പങ്കുള്ള 5 പേരുടെ അറസ്റ്റാണ് രേഖപ്പെടുത്തിയത്. പ്രതികളെ ഒളിക്കാന്‍ സഹായിച്ച 2 പേരും ഗൂഡാലോചന നടത്തിയ ഒരാളെയും അറസ്റ്റ് ചെയ്തിട്ടുണ്ട്. ഇതോടെ കേസില്‍ അറസ്റ്റിലായവര്‍ 13 ആയി ഉയര്‍ന്നു.
അതുല്‍, വിഷ്ണു, അഭിമന്യു, സാനന്ത്, ജിഷ്ണു തുടങ്ങിയവര്‍ കൊലപാതകത്തില്‍ നേരിട്ട് പങ്കുള്ളവരാണ്. ചാലക്കുടി സ്വദേശികളായ സുരേഷ്, ഉമേഷ് എന്നിവരെയാണ് പൊലീസ് പിടികൂടിയത്. പ്രതികളെ ഒളിവില്‍ താമസിപ്പിച്ചതിനാണ് ഇവരെ പൊലീസ് പിടികൂടിയത്. ഗൂഢാലോചനയുടെ ഭാഗമായതിന് ധനേഷിനെയും പൊലീസ് പിടികൂടിയിട്ടുണ്ട്. ആര്‍എസ്എസിന്റെ സജീവ പ്രവര്‍ത്തകരാണ് ഇവരെല്ലാവരും. കേസില്‍ നിര്‍ണായകമായത് സേവാഭാരതിയുടെ ആംബുലന്‍സ് ഉപയോഗിച്ച് പ്രതികളെ രക്ഷപ്പെടുത്തിയ അഖിലിന്റെ അറസ്റ്റാണ്.
അതേസമയം, ബിജെപി സംസ്ഥാന നേതാവ് രണ്‍ജീത്തിന്റെ വധത്തിലെ പ്രധാന പ്രതികളെ ഇതുവരെ പൊലീസിന് പിടികൂടാന്‍ സാധിച്ചിട്ടില്ല. ഇവരെ പിടികൂടാനായി അന്വേഷണം സംസ്ഥാനത്തിന് പുറത്തും സജീവമാണ്.