കൊച്ചി: ആക്രമിക്കപ്പെട്ട നടിയുടെ പേര് പരാമര്‍ശിച്ച കേസില്‍ ഒത്തുതീര്‍പ്പാക്കാന്‍ കഴിയില്ലെന്ന് ഹൈക്കോടതി. കേസില്‍ അജുവര്‍ഗ്ഗീസിനെതിരെ രജിസ്റ്റര്‍ ചെയ്ത എഫ്.ഐ.ആര്‍ റദ്ദാക്കാനാകില്ലെന്ന് ഹൈക്കോടതി പറഞ്ഞു. തനിക്കെതിരെയുള്ള കേസ് റദ്ദുചെയ്യാന്‍ ആവശ്യപ്പെട്ട അജു നല്‍കിയ ഹര്‍ജിയിലാണ് കോടതി നിലപാട് അറിയിച്ചത്.
അജുവര്‍ഗ്ഗീസ് തന്റെ സുഹൃത്താണെന്നും ദുരുദ്ദേശപരമായല്ല പേര് പറഞ്ഞതെന്നും വിശദീകരിക്കുന്ന ആക്രമിക്കപ്പെട്ട നടിയുടെ സത്യവാങ്മൂലവും അജുവര്‍ഗ്ഗീസ് സമര്‍പ്പിച്ചിരുന്നു. എന്നാല്‍ നടിയുമായി ഒത്തുതീര്‍പ്പാക്കിയെന്നതിന്റെ പേരില്‍ ക്രിമിനല്‍ കേസിന്റെ പരിധിയില്‍ വരുന്ന ഈ കേസിലെ എഫ്.ഐ.ആര്‍ റദ്ദുചെയ്യാനാകില്ലെന്ന് കോടതി വ്യക്തമാക്കുകയായിരുന്നു. തുടര്‍ന്ന് കോടതി ഹര്‍ജി തള്ളി.
ഫേസ്ബുക്കിലൂടെയാണ് താരം നടിയുടെ പേര് വെളിപ്പെടുത്തിയത്. ദിലീപിനെതിരെ ഉയര്‍ന്ന ആരോപണങ്ങളുടെ പശ്ചാത്തലത്തിലാണ് ദിലീപിനെ ന്യായീകരിച്ചുള്ള പോസ്റ്റില്‍ നടിയുടെ പേര് പറഞ്ഞത്. എന്നാല്‍ ഇത് തെറ്റാണെന്ന് തിരുത്തി അജു വര്‍ഗ്ഗീസ് മാപ്പ് ചോദിച്ചിരുന്നു. പിന്നീട് കളമശ്ശേരി സ്വദേശി ഗിരീഷ് ബാബു നല്‍കിയ പരാതിയിലാണ് അജുവര്‍ഗ്ഗീസിനെതിരെ പോലീസ് കേസെടുക്കുന്നത്. അജുവര്‍ഗ്ഗീസ് തന്റെ സുഹൃത്താണെന്നും ദുരുദ്ദേശപരമായല്ല പേര് പരാമര്‍ശിച്ചതെന്നും നടിയുടെ സത്യവാങ്മൂലത്തില്‍ പറയുന്നുണ്ട്. കേസ് റദ്ദാക്കുന്നതില്‍ എതിര്‍പ്പില്ലെന്നും ആക്രമിക്കപ്പെട്ട നടി പറഞ്ഞിരുന്നു.