ഡല്‍ഹി: എയര്‍ ഇന്ത്യ വിമാനത്തില്‍ ഭീകരന്‍ ഉണ്ടെന്ന് പറഞ്ഞ് ബഹളം വച്ച ആള്‍ അറസ്റ്റില്‍. ഡല്‍ഹി-ഗോവ വിമാനത്തിലാണ് സംഭവം. ഡല്‍ഹി ജാമിയ നഗര്‍ സ്വദേശി സിയാ ഉള്‍ ഹക്കാണ് അറസ്റ്റിലായത്. മാനസികാസ്വാസ്ഥ്യമുള്ള വ്യക്തിയാണ് ഇദ്ദേഹമെന്ന് ബന്ധുക്കള്‍ പറഞ്ഞു.
ഇന്നലെ വൈകീട്ട് 3.15നാണ് AI 883 എന്ന വിമാനത്തില്‍ ഈ നാടകീയ സംഭവം അരങ്ങേറുന്നത്. ഈ വിമാനത്തില്‍ ഭീകരവാദിയുണ്ടെന്നും താന്‍ സ്‌പെഷ്യല്‍ സെല്‍ ഉദ്യോഗസ്ഥനാണെന്നും പറഞ്ഞാണ് സിയ ബഹളം വച്ചത്.
ബഹളത്തെ തുടര്‍ന്ന് ക്യാപ്റ്റന്‍ കപില്‍ റെയ്‌ന ഗോവ എടിസിയില്‍ വിവരം അറിയിച്ചു. തുടര്‍ന്ന് എടിസി സുരക്ഷാ ജീവനക്കാര്‍ക്ക് നിര്‍ദേശം നല്‍കുകയും സിയയെ വിമാനമിറങ്ങിയ ഉടന്‍ പൊലീസിന് കൈമാറുകയുമായിരുന്നു.