ദോഹയില്‍ നിന്ന് തിരുവനന്തപുരത്തേക്ക് നാല് പുതിയ സര്‍വീസുകള്‍ എയര്‍ ഇന്ത്യ എക്‌സ്പ്രസ് പ്രഖ്യാപിച്ചു. ശൈത്യകാല ഷെഡ്യൂളിലാണ് ഖത്തറില്‍ നിന്ന് തിരുവനന്തപുരത്തേയ്ക്ക് നാല് പുതിയ നോണ്‍ സ്‌റ്റോപ്പ് സര്‍വീസ് ഉള്‍പ്പെടുത്തിയത്. ഖത്തര്‍ എയര്‍വേയ്‌സ്, ഇന്‍ഡിഗോ, എയര്‍ഇന്ത്യ എക്‌സ്പ്രസ് എന്നീ വിമാനങ്ങളാണ് ഇപ്പോള്‍ ഖത്തറില്‍ നിന്ന് കേരളത്തിലേയ്ക്ക് നേരിട്ട് സര്‍വീസ് നടത്തുന്നത്.
എയര്‍ ഇന്ത്യ എക്‌സ്പ്രസിന്റെ ശൈത്യകാല ഷെഡ്യൂളില്‍ ഉള്‍പ്പെടുത്തിയാണ് ദോഹയില്‍ നിന്നുള്ള നോണ്‍ സ്‌റ്റോപ്പ് സര്‍വിസ് പ്രഖ്യാപിച്ചത്. ദോഹയില്‍ നിന്നും തിരുവനന്തപുരത്തേക്ക് ചൊവ്വ, വ്യാഴം, ശനി, ഞായര്‍ ദിവസങ്ങളിലും തിരുവനന്തപുരത്തുനിന്ന് ദോഹയിലേക്ക് ചൊവ്വ, വ്യാഴം, വെള്ളി, ഞായര്‍ ദിവസങ്ങളിലുമാണ് സര്‍വിസ് ഉണ്ടാകുക.
ദോഹയില്‍ നിന്ന് കേരളത്തിലേക്ക് നേരിട്ടുള്ള വിമാന സര്‍വീസുകള്‍ കുറവാണ്. കണക്ഷന്‍ ഫ്‌ലൈറ്റുകളില്‍ ഏഴ് മണിക്കൂറിലധികം യാത്രയ്ക്കായി ചെലവഴിക്കേണ്ടി വരും. ദോഹയില്‍ നിന്ന് നാല് പുതിയ സര്‍വീസുകള്‍ ആരംഭിക്കുന്നതോടെ കുറഞ്ഞ സമയത്തിനുളളില്‍ പ്രവാസികള്‍ക്ക് നാട്ടിലെത്താം. നിലവില്‍ ഖത്തര്‍ എയര്‍വേസ് മാത്രമാണ് ദോഹയില്‍നിന്ന് തിരുവനന്തപുരത്തേക്ക് നേരിട്ട് സര്‍വിസ് നടത്തുന്നത്.