കൈക്കൂലി വാങ്ങുന്നതിനിടെ കൃഷി ഓഫീസര്‍ വിജിലന്‍സിന്റെ പിടിയിലായി തൃശൂര്‍ എരുമപ്പെട്ടി കൃഷി ഓഫീസര്‍ ഉണ്ണികൃഷ്ണപിള്ള എസ് ആണ് വിജിലന്‍സിന്റെ പിടിയിലായത്. എരുമപ്പെട്ടി കൃഷി ഭവന്റെ പരിധിയിലുള്ള സ്ത്രീയുടെ കയ്യിൽ നിന്നും ഭൂമി തരം മാറ്റല്‍ പൂര്‍ത്തിയാക്കാന്‍ 25,000 രൂപ വാങ്ങുകയായിരുന്നു.കൈക്കൂലിയായി വാങ്ങിയ 25,000 രൂപയും ഇയാളില്‍ നിന്നും കണ്ടെടുത്തു.
കൈക്കൂലി ആവശ്യപ്പെട്ട വിവരം സ്ത്രീ വിജിലന്‍സില്‍ അറിയിക്കുകയായിരുന്നു. വിജിലന്‍സ് സംഘം നല്‍കിയ നോട്ടുകളുമായി പരാതിക്കാരി കൃഷി ഓഫീസിലെത്തുകയും ഉണ്ണികൃഷ്ണപിള്ളക്ക് കൈമാറുകയുമായിരുന്നു. ഇതിനിടെയാണ് വിജിലന്‍സ് സംഘം കൃഷി ഓഫീസറെ പിടികൂടിയത് . വിജിലന്‍സ് ഡിവൈഎസ്പി ജിം പോളിന്റെ നേതൃത്ത്വത്തിലുള്ള സംഘമാണ് കൃഷി ഓഫീസറെ പിടികൂടിയത്.