യവുന്‍ഡെ:ലിവര്‍പൂളുകാര്‍ ഇന്ന് ആര്‍ക്കൊപ്പമായിരിക്കും….? മുഹമ്മദ് സലാഹിന്റെ ഈജിപ്തിനൊപ്പമോ അതോ സാദിയോ മാനേയുടെ സെനഗലിനൊപ്പമോ…? ആഫ്രിക്കയിലെ ചാമ്പ്യന്‍ രാജ്യത്തെ കണ്ടെത്തുന്ന കലാശ പോരാട്ടം ഇന്ന് രാത്രി 12 ന് കാമറുണ്‍ ആസ്ഥാനത്ത് നടക്കുമ്പോള്‍ കാര്യമായ ആവേശം ആന്‍ഫീല്‍ഡിലാണ്. ലിവറിന്റെ രണ്ട് സൂപ്പര്‍ താരങ്ങള്‍ തമ്മിലുള്ള അങ്കമായാണ് ഫൈനലിനെ ഫുട്‌ബോള്‍ ലോകം വിവക്ഷിക്കുന്നത്. തോല്‍വികള്‍ അറിയാതെയാണ് രണ്ട് രാജ്യങ്ങളും വന്‍കരാ കലാശത്തിനിറങ്ങുന്നത്. ആധികാരികതയില്‍ സെനഗലിനാണ് അല്‍പ്പം മുന്‍ത്തൂക്കം. പക്ഷേ അനുഭവ കരുത്താണ് ഈജിപ്ത്. സലാഹിനെ കേന്ദ്രീകരിച്ചാണ് അവരുടെ നീക്കങ്ങള്‍. സെമിയില്‍ കാമറുണിനെതിരെ കസറാന്‍ സലാഹിനായിരുന്നില്ല. എന്നാല്‍ മാനേ സ്ഥിരത പുലര്‍ത്തുന്നു. കൂട്ടുകാര്‍കക് യഥേഷ്ടം പന്ത് നല്‍കുന്നു. അവരെ കൊണ്ട് ഗോളടിപ്പിക്കുന്നു. സെനഗലിന് ഇന്ന് തലവേദന ഈജിപ്ത് പ്രതിരോധമായിരിക്കും. ചാമ്പ്യന്‍ഷിപ്പിലുടനീളം ഗംഭീരമായിരുന്നു അവര്‍. സലാഹിനെ പ്രതിരോധിക്കുന്നതില്‍ സെനഗല്‍ ഡിഫന്‍സ് ജാഗ്രത പാലിക്കുമ്പോള്‍ മല്‍സരം ഷൂട്ടൗട്ടിലേക്ക് പോവാനാണ് സാധ്യതകള്‍. ഷൂട്ടൗട്ടില്‍ സെനഗലിന്റെ കാവല്‍ക്കാരന്‍ ചെല്‍സിയുടെ മെന്‍ഡിയാണ് എന്നത് അവര്‍ക്ക് മുന്‍ത്തൂക്കം നല്‍കും. മല്‍സരത്തിന്റെ ലൈവ് ടെലകാസ്റ്റ് ഇന്ത്യന്‍ ചാനലുകളില്‍ ഇല്ല. പക്ഷേ ബി.ബി.സി റേഡിയോ ലൈവുണ്ട്.
- 3 years ago
Test User