ലക്‌നൗ: കുറ്റവാളിയെ ബൈക്കിന്റെ മുന്നിലിരുത്തി പൊലീസുകാരന്റെ സാഹസിക യാത്രയുടെ ദൃശ്യങ്ങള്‍ പുറത്ത്. തൊട്ടുപുറകില്‍ കാറിലായി യാത്ര ചെയ്യ്തവര്‍ പകര്‍ത്തിയ ദൃശ്യങ്ങള്‍ എക്‌സില്‍ ഇതിനോടകം വ്യാപകമായി പ്രചരിക്കുന്നുണ്ട്. ഉത്തര്‍പ്രദേശിലെ മെയിന്‍പുരിയിലാണ് സംഭവം.
തിരക്കേറിയ റോഡില്‍ സ്പീഡില്‍ ഓടിച്ചുവരുന്ന ബൈക്കിന് പിന്നിലിരിക്കുന്ന യൂണിഫോമും ഒപ്പം ഹെല്‍മെറ്റും ധരിച്ചയാള്‍ ഒരു പൊലീസുകാരനാണ്. മുന്നില്‍ ഇരുന്ന് ഓടിക്കുന്നയാളെ സൂക്ഷിച്ച് നോക്കിയാല്‍ കൈത്തണ്ടയില്‍ കയറുകെട്ടിയിരിക്കുന്നതായി കാണാം. കയറിന്റെ ഒരറ്റം പൊലീസുകാരന്റെ കയ്യിലാണ്. അറസ്റ്റ് ചെയ്ത് കൊണ്ടുപോകും വഴി പകര്‍ത്തിയ ദൃശ്യങ്ങളാണിതെന്നാണ് വിവരം.
പ്രതിക്ക് ഹെല്‍മെറ്റും ഉണ്ടായിരുന്നില്ല. മെയിന്‍പുരി പൊലീസ് സംഭവം ശരിയാണെന്ന് സ്ഥിരീകരിച്ചിട്ടുണ്ട്. ബൈക്കോടിക്കുമ്പോള്‍ കാറ്റടിച്ച് തണുപ്പ് സഹിക്കാന്‍ വയ്യാതായതിനാല്‍ പ്രതിയെ വണ്ടിയോടിപ്പിക്കുകയായിരുന്നു എന്ന് കോണ്‍സ്റ്റബിളും സമ്മതിച്ചു. സംഭവം അന്വേഷിച്ച് ആവശ്യമായ നടപടികള്‍ സ്വീകരിക്കുമെന്ന് മെയിന്‍പുരി പൊലീസ് പ്രസ്താവനയില്‍ അറിയിച്ചു.
പ്രതിയെ ബൈക്ക് ഓടിപ്പിച്ചതിനേക്കാള്‍ അയാള്‍ ഹെല്‍മെറ്റ് ധരിക്കാത്തത് സംബന്ധിച്ചാണ് സോഷ്യല്‍ മീഡിയയില്‍ വിമര്‍ശനങ്ങള്‍ ഉയരുന്നത്.