നടിയെ ആക്രമിച്ച കേസില്‍ മെമ്മറി കാര്‍ഡ് ചോര്‍ന്നതില്‍ അന്വേഷണ റിപ്പോര്‍ട്ട് റദ്ദാക്കണമെന്ന ഹരജിയില്‍ വിധി തിങ്കളാഴ്ച. അതിജീവിത നല്‍കിയ ഉപഹരജിയിലാണ് ഹൈക്കോടതി സിംഗിള്‍ ബെഞ്ച് തിങ്കളാഴ്ച വിധി പറയുന്നത്. എറണാകുളം പ്രിന്‍സിപ്പല്‍ സെഷന്‍സ് കോടതിയുടെ വസ്തുതാ അന്വേഷണ റിപ്പോര്‍ട്ട് റദ്ദാക്കണമെന്നാണ് അതിജീവിത നല്‍കിയ ഉപഹരജിയിലെ പ്രധാന ആവശ്യം.
കോടതി മേല്‍നോട്ടത്തില്‍ ഐജി റാങ്കില്‍ കുറയാത്ത ഉദ്യോഗസ്ഥര്‍ കേസന്വേഷിക്കണമെന്നും ഹരജിയില്‍ പറയുന്നുണ്ട്. കേസിലെ പ്രധാന തെളിവായ മെമ്മറി കാര്‍ഡ് കസ്റ്റഡിയിലെടുക്കുന്ന സമയത്ത് മൂന്ന് തവണ നിയമവിരുദ്ധമായി പരിശോധിച്ചുവെന്നാണ് കണ്ടെത്തല്‍. എഫ്‌ഐആര്‍ രജിസ്റ്റര്‍ ചെയ്ത് കൃത്യമായ അന്വേഷണം നടത്തണമെന്ന് ഉപഹരജിയില്‍ ആവശ്യപ്പെട്ടു.