കോഴിക്കോട്: പുതിയ രാഷ്ട്രീയ പാര്‍ട്ടി രൂപീകരിച്ച് സംഘപരിവാര്‍ പാളയത്തിലേക്ക് ചേക്കാറാനിരിക്കുന്ന നടന്‍ ദേവന്റെ പുതിയ വീഡിയോ സോഷ്യല്‍ മീഡിയയില്‍ വൈറലാവുന്നു. റിപ്പോര്‍ട്ടര്‍ ചാനലിന് നല്‍കിയ അഭിമുഖത്തിന്റെ വീഡിയോയാണ് വൈറലാവുന്നത്. അഭിമുഖത്തിനിടെ പ്രധാനമന്ത്രി മോദിയെ പുകഴ്ത്തുന്ന ദേവന്‍ തുടര്‍ന്നുള്ള ചോദ്യങ്ങള്‍ക്ക് മുന്നില്‍ ഉത്തരമില്ലാതെ പരുങ്ങുന്നതാണ് വിഡിയോയില്‍ കാണുന്നത്.
മോദി ഇന്ത്യയിലെ ഏറ്റവും കരുത്തനായ പ്രധാനമന്ത്രിയാണ് എന്നാണ് ദേവന്റെ വാദം. മോദി ഇന്ത്യയുടെ യശസ്സുയര്‍ത്തിയെന്നും ദേവന്‍ അവകാശപ്പെടുന്നു. എന്നാല്‍ മോദി രാജ്യത്തിന് വേണ്ടി വ്യതസ്തമായി എന്ത് ചെയ്തുവെന്നായിരുന്നു അഭിമുഖക്കാരന്റെ ചോദ്യം. ഒരുപാട് കാര്യങ്ങള്‍ ചെയ്തുവെന്നായിരുന്നു ദേവന്റെ മറുപടി. എന്നാല്‍ മോദി ചെയ്ത എന്തെങ്കിലും ഒരു കാര്യം എടുത്തുപറയാന്‍ ആവര്‍ത്തിച്ച് ആവശ്യപ്പെട്ടെങ്കിലും മറുപടി പറയാന്‍ അദ്ദേഹത്തിനായില്ല.
അതേസമയം താന്‍ ബിജെപിയില്‍ ചേരില്ലെന്നും മോദിയുടെ നയങ്ങളോട് യോജിപ്പാണെന്നും അദ്ദേഹം ആവര്‍ത്തിച്ചു. കഴിഞ്ഞ ദിവസമാണ് പുതിയ രാഷ്ട്രീയപാര്‍ട്ടി രൂപീകരിച്ച് ദേവന്‍ രംഗത്ത് വന്നത്. ഇതിനെക്കുറിച്ച് വിശദീകരിക്കാനെത്തിയപ്പോഴാണ് മോദിയെ പുകഴ്ത്തി കുടുങ്ങിയത്.