തിരുവനന്തപുരത്ത് പോക്സോ കേസിലെ പ്രതി ബ്ലേഡ് വിഴുങ്ങിയതായി സംശയം. പൂജപ്പുര ജയിലില്‍ നിന്നും കൊല്ലം ഫാസ്റ്റ് ട്രാക്ക് കോടതിയിലേക്ക് കൊണ്ടുപോകുന്ന വഴിയാണ് ബ്ലേഡ് വിഴുങ്ങിയെന്ന് പ്രതി പൊലീസിനോട് പറയുന്നത്. ഇതേതുടര്‍ന്ന് പ്രതിയെ തിരുവനന്തപുരം മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചു.
ചൊവ്വാഴ്ച രാവിലെ പത്തരയോടെയാണ് സംഭവം. രണ്ട് പൊലീസുകാരുടെ സുരക്ഷയില്‍ തമ്പാനൂരില്‍ നിന്ന് കെഎസ്ആര്‍ടിസി ബസിലാണ് പ്രതിയെ കൊല്ലത്തേയ്ക്ക് കൊണ്ടുപോയത്. എന്നാല്‍ താന്‍ ബ്ലേഡ് വിഴുങ്ങിയെന്ന്് പ്രതി പൊലീസുകാരോട് പറഞ്ഞു. പക്ഷേ കോടതിയില്‍ ഹാജരാകാതിരിക്കാനുള്ള പ്രതിയുടെ തന്ത്രമാണെന്നാണ് പൊലീസ് ആദ്യം വിചാരിച്ചത്്. തുടര്‍ന്ന് പൊലീസുകാര്‍ ജയില്‍ അധികൃതരുമായി ബന്ധപ്പെട്ടു.
അടുത്തുള്ള പൊലീസ് സ്റ്റേഷനില്‍ ഹാജരാക്കാനുള്ള നിര്‍ദേശപ്രകാരം പൊലീസുകാര്‍ പ്രതിയെ കഴക്കൂട്ടം സ്റ്റേഷനില്‍ എത്തിച്ചു. അവിടെ നിന്നും പിഎച്ച്സിയിലേക്ക് കൊണ്ടുപോയ പ്രതിയെ പിന്നീട് മെഡിക്കല്‍ കോളേജ് ആശുപത്രിയിലേക്ക് പ്രവേശിപ്പിക്കുകയായിരുന്നു.