ബാങ്ക് അക്കൗണ്ട് മരവിപ്പിക്കാന്‍ വ്യാജ പരാതികളും കാരണമാകുന്നുവെന്നതിന് കൂടുതല്‍ തെളിവുകള്‍ പുറത്ത്. പരപ്പനങ്ങാടി സ്വദേശിയായ മുഹമ്മദ് റാഫിക്കെതിരെ പരാതി നല്‍കിയെന്ന് ഗുജറാത്ത് പൊലീസ് പറഞ്ഞ വ്യക്തിയെ വിളിച്ചപ്പോള്‍ ലഭിച്ചത് പരാതിയെക്കുറിച്ച്‌ ഒന്നും അറിയില്ലെന്ന മറുപടിയാണ്.
മൂന്നാഴ്ച മുമ്പാണ് മുഹമ്മദ് റാഫിയുടെ ഇസാഫ് ബാങ്ക് മലപ്പുറം ബ്രാഞ്ചിലെ അക്കൗണ്ട് മരപ്പിച്ചതായി അറിയിപ്പ് ലഭിച്ചത്. 50,000 രൂപയുള്ള അക്കൗണ്ട് മരവിപ്പിച്ചതിന് കാരണമായി പറഞ്ഞത് ഗുജറാത്തില്‍ നിന്ന് പരാതി ലഭിച്ചു എന്നാണ്. അരവിന്ദ് ദവേ എന്നയാളാണ് പരാതി നല്‍കിയതെന്ന് ബാങ്കില്‍ നിന്ന് ലഭിച്ച രേഖ പറയുന്നു. അതിലുള്ള നമ്ബറില്‍ മുഹമ്മദ് റാഫി സുഹൃത്തിന്റെ സഹായത്തോടെ ബന്ധപ്പെട്ടു. എന്നാല്‍ പരാതിക്കാരനെന്ന് ഗുജറാത്ത് പൊലീസ് പറയുന്നയാളെ വിളിച്ചപ്പോള്‍ അയാള്‍ക്ക് പരാതിയെക്കുറിച്ച്‌ ഒന്നും അറിയില്ല.
സംശയാസ്പദമെന്ന് ഗുജറാത്ത് പൊലീസ് പറയുന്ന തുക 12,150 രൂപയാണ്. അത്തരമൊരു തുക തന്നെ റാഫിയുടെ അക്കൗണ്ടില്‍ വന്നിട്ടില്ല. ഇക്കാര്യം പരാതി രജിസ്റ്റര്‍ ചെയ്ത പൊലീസ് സ്റ്റേഷനിലെ ഉദ്യോഗസ്ഥനെ അറിയിച്ചപ്പോള്‍ മറുപടിയൊന്നും ഉണ്ടായതുമില്ല. അക്കൗണ്ട് മരവിപ്പിക്കല്‍ സംഭവങ്ങള്‍ പിന്നില്‍ വ്യാപക തട്ടിപ്പുണ്ടെന്ന് തെളിയിക്കുകയാണ് മുഹമ്മദ് റാഫിയുടെ അനുഭവം.