കാറപകടത്തെ തുടര്‍ന്ന് ചിത്സയില്‍ കഴിയുന്ന ഇന്ത്യന്‍ ക്രിക്കറ്റ് താരം റിഷഭ് പന്തിന് പ്ലാസ്റ്റിക്ക് സര്‍ജറിക്കുവേണ്ടി ഡല്‍ഹിയിലേക്ക് മാറ്റുമെന്ന് പുതിയ റിപ്പോര്‍ട്ട്. റിഷഭ് നിലവില്‍ ഡെറാഡൂണിലെ മാക്‌സ് ആശുപത്രിയിലാണ് ചികിത്സിക്കുന്നത്. ആവശ്യമെങ്കില്‍ താരത്തെ ഡല്‍ഹിയിലേക്ക് എയര്‍ലിഫ്റ്റ് ചെയ്യുമെന്നാണ് ഡല്‍ഹി ക്രിക്കറ്റ് അസോസിയേഷന്‍ ഡയറക്ടര്‍ ശ്യാം ശര്‍മ പറഞ്ഞു. താരത്തിന് കാലിലും നെറ്റിയിലും പുറത്തുമാണ് ഗുരുതരമായി പരിക്കേറ്റത്. റിഷഭിന്റെ ഇപ്പോഴത്തെ ആരോഗ്യനില തൃപ്തികരമാണെന്ന് ആശുപത്രി അധികൃതര്‍ അറിയിച്ചു.
വെള്ളിയാഴ്ച്ച പുലര്‍ച്ചെ 5.30ന് ഡല്‍ഹി-ഹരിദ്വാര്‍ ഹൈവേയില്‍വെച്ചാണ് റിഷഭ് പന്തിന് അപകടം സംഭവിച്ചത്. താരം സഞ്ചരിച്ച കാര്‍ ഡിവൈഡറിലിടിച്ച് തീപിടിക്കുകയായിരുന്നു. ഉറങ്ങിപോയതാകാം അപകടത്തിന് കാരണമെന്ന് ഉത്തരാഖണ്ഡ് ഡി.ജി.പി അശോക് കുമാറിനെ ഉദ്ധരിച്ച് ദേശീയമാധ്യമങ്ങള്‍ റിപ്പോര്‍ട്ട് ചെയ്യുന്നു. ഉറങ്ങിയതിനെ തുടര്‍ന്ന് കാറിന്റെ നിയന്ത്രണം നഷ്ടപ്പെടുകയും തുടര്‍ന്ന് റോഡിലെ ഡിവൈഡറില്‍ ഇടിക്കുകയുമായിരുന്നു. എന്നാല്‍ റോഡില്‍ മൂടല്‍മഞ്ഞ് ഇല്ലായിരുന്നെന്നും അതിനാല്‍ അപകടകാരണം അതല്ല എന്നുമാണ് പൊലീസ് പറയുന്നത്.