അബുദാബി: അബുദാബി മാര്‍ത്തോമ യുവജനസഖ്യം പരിസ്ഥിതി വാരാചരണത്തോടനുബന്ധിച്ച് വിവിധ പരിപാടികള്‍ സംഘടിപ്പിച്ചു. മുസഫ ദേവാലയ അങ്കണത്തില്‍ നടന്ന ചടങ്ങുകള്‍ ഇടവക വികാരി റവ. ജിജു ജോസഫ് ഉദ്ഘാടനം ചെയ്തു. പരിസ്ഥിതി വാരാചരണ സന്ദേശം ഫാദര്‍ ബോബി ജോസ് കട്ടയ്ക്കാട് നല്‍കി.
കഴിഞ്ഞ ഒരു വര്‍ഷമായി നടപ്പാക്കിവരുന്ന പ്ലാസ്റ്റിക് ഉപയോഗത്തിനെതിരെയുള്ള ബോധവല്‍ക്കരണത്തിന്റെ ഈ വര്‍ഷത്തെ പ്രവര്‍ത്തനങ്ങള്‍ റവ അജിത്ത് ഈപ്പന്‍ തോമസ് ഉദ്ഘാടനം ചെയ്തു. ഇതോടനുബന്ധിച്ച് മുസഫ ദേവാലയ അങ്കണത്തില്‍ ജൈവ പച്ചക്കറി കൃഷി ഈ വര്‍ഷവും നടപ്പാക്കുവാനും കൃഷി ഉത്പന്നങ്ങള്‍ ഇടവക ജനങ്ങള്‍ക്ക് ലഭ്യമാക്കുവാനുമുള്ള ക്രമീകരണങ്ങള്‍ നടന്നുവരുന്നു.
കൃഷിയെ പുതിയ തലമുറയ്ക്ക് പരിചയപ്പെടുത്തി കൊടുക്കുന്നതിനും പരിസ്ഥിതിയോട് കൂടുതല്‍ ഇണങ്ങി ജീവിക്കുന്നതിന്റെ ആവശ്യകതയെക്കുറിച്ചുള്ള വിവിധ ബോധവല്‍ക്കരണ സെമിനാറും സംഘടിപ്പിച്ചു. ശ്രീ ജോബിന്‍ വര്‍ഗീസ് നേതൃത്വം നല്‍കി.
പ്രവര്‍ത്തനങ്ങള്‍ക്ക് കണ്‍വീനര്‍ സോണി വാളക്കുഴി നേതൃത്വം നല്‍കി വരുന്നു. യുവജനസഖ്യം സെക്രട്ടറി അനില്‍ ബേബി വൈസ് പ്രസിഡന്റ് രഞ്ജു വര്‍ഗീസ്, വനിതാ സെക്രട്ടറി മീനു രാജന്‍, ട്രഷറര്‍ ആശിഷ് ജോണ്‍ ശാമുവേല്‍, ശ്രീ സിസിന്‍ മത്തായി, കമ്മറ്റി അംഗങ്ങള്‍ തുടങ്ങിയവര്‍ നേതൃത്വം നല്‍കി.