അബൂദാബി : വിശക്കുന്നവന് അന്നം ഊട്ടിയ ഗുബൈശ റുബയ്യ സഈദ് അല്‍കിത്ബിക്ക് പ്രശംസയുമായി അബുദാബി കിരീടവകാശിയും യുഎഇ സായുധസേനാ ഉപസര്‍വ സൈന്യാധിപനുമായ ഷെയ്ഖ് മുഹമ്മദ് ബ്ന്‍ സായിദ് അല്‍ നഹ്യാന്‍. വീടിനു സമീപമുള്ള പൊലീസ് ചെക്ക് പോയന്റില്‍ ജോലി ചെയ്യുന്നവര്‍ക്കെല്ലാം ഭക്ഷണമുണ്ടാക്കി എത്തിക്കുന്ന റുബയ്യ, പ്രാതലും ഉച്ചയൂണും അത്താഴവുമെല്ലാം വിശക്കുന്നവര്‍ക്കു ഉദാരമായി നല്‍കുന്നു.
മൂന്നു നേരം മനുഷ്യരെ ഊട്ടുന്ന ഗുബൈശയുടെ പുണ്യ പ്രവൃത്തിയറിഞ്ഞ് ഷെയ്ഖ് മുഹമ്മദ് ബ്ന്‍ സായിദ് അവരെ ടെലഫോണില്‍ വിളിച്ച് സന്തോഷമറിയിക്കുകയായിരുന്നു. ‘ഇത് എന്റെ കടമയാണ്. നിര്‍ബന്ധമായ കടമകള്‍ക്കപ്പുറമൊന്നും ഞാന്‍ ചെയ്തിട്ടില്ല. അവര്‍ ഞങ്ങളുടെ കുടുംബമാണ്’ ഇതാണു ഇതേ കുറിച്ച് മാധ്യമങ്ങളോട് റുബയ്യ പറഞ്ഞത്. പരപ്രേരണയില്ലാത്ത പുണ്യപ്രവൃത്തിയെ പ്രശംസിച്ചും പ്രാര്‍ഥിച്ചുമുള്ള ശൈഖ് മുഹമ്മദിന്റെ വാക്കുകള്‍ ഹൃദയത്തില്‍ സന്തോഷവും സംതൃപ്തിയും നല്‍കിയതായി ഗുബൈഷ പറഞ്ഞു.നമ്മുടെ സ്ത്രീസമൂഹത്തിലെ മാതൃകയാണു ഗുബൈശയെന്നു ഷെയ്ഖ് മുഹമ്മദ് പിന്നീട് ട്വീറ്റും ചെയ്തു.
അല്‍ഐനിലെ ശുവൈബ് മേഖലയിലാണു ഗുബൈശയും കുടുംബവും താമസിക്കുന്നത്. സമീപത്തുള്ള സുരക്ഷാ പരിശോധന കേന്ദ്രത്തിലെ ജോലിക്കാര്‍ക്കാണു പ്രതിഫലമാഗ്രഹിക്കാതെ ഈ ഉമ്മ മാസങ്ങളായി ഭക്ഷണം നല്‍കുന്നത്.
അതിഥികളെ ആദരിക്കുന്ന അറബ് കേളിക്ക് ആധുനിക കാലത്തും പോറലേറ്റിട്ടില്ലെന്ന് ഈ ഉമ്മ തെളിയിക്കുന്നു.