അബുദാബി: അബുദാബി കേരള സോഷ്യല്‍ സെന്റര്‍ കേരളോത്സവത്തിന് 30ന് തുടക്കമാകും. മൂന്നുദിവസം നീണ്ടുനില്‍ക്കുന്ന കേരളോത്സവം പ്രവാസികളുടെ കലാസാംസ്‌കാരിക ആഘോഷമാക്കി മാറ്റുന്നതിനുള്ള ഒരുക്കങ്ങള്‍ പൂര്‍ത്തിയായതായി കെഎസ്‌സി ഭാരവാഹികള്‍ വാര്‍ത്താ സമ്മേളനത്തില്‍ അറിയിച്ചു.
ഗൃഹാതുരത്വം വിളിച്ചോതുന്ന, കേരള തനിമയുള്ള ഭക്ഷണ വിഭവങ്ങള്‍ ലഭ്യമാകുന്ന നാടന്‍ തട്ടുകടകള്‍, പ്രശസ്തരായ കലാകാരന്‍മാര്‍ പങ്കെടുക്കുന്ന നൃത്ത സംഗീത പരിപാടികള്‍, വനിതകള്‍ ഉള്‍പ്പെടുന്ന ചെണ്ട മേളം, കുട്ടികള്‍ക്കായി അണിയിച്ചൊരുക്കിയ വിവിധങ്ങളായ കളികള്‍, സയന്‍സ് കോര്‍ണര്‍, പുസ്തക മേള, മറ്റു വാണിജ്യ സ്റ്റാളുകള്‍, എന്നിവയാണ് കേരളോത്സവത്തിന്റെ പ്രധാന ആകര്‍ഷണം.
സ്വദേശികളും വിദേശികളുമായ പതിനായിരത്തിലേറെപേര്‍ കേരളോത്സവത്തിന് എത്തിച്ചേരുമെന്നാണ് കണക്കുകൂട്ടുന്നത്.
പരിപാടിയിലേക്കുള്ള പ്രവേശന കൂപ്പണില്‍ നടക്കുന്ന നറുക്കെടുപ്പിലെ ആദ്യവിജയിക്ക് 20 പവന്‍ സ്വര്‍ണ്ണം സമ്മാനമായി ലഭിക്കും. കൂടാതെ 100 പേര്‍ക്ക് വിലപിടിപ്പുള്ള മറ്റു സമ്മാനങ്ങളുമുണ്ടായിരിക്കും.
കോവിഡിന്റെ രണ്ടു വര്‍ഷത്തെ ഇടവേളയ്ക്കു ശേഷമാണ് കേരളോത്സവം വീണ്ടുമെത്തുന്നത്. കേരള സോഷ്യല്‍ സെന്ററിന്റെ സുവര്‍ണ്ണ ജൂബിലി വര്‍ഷം കുടിയായ ഈ വര്‍ഷത്തെ കേരളോത്സവത്തിനു വലിയ പ്രാധാന്യമുണ്ടെന്ന് ഭാരവാഹികള്‍ പറഞ്ഞു.
കേരള സോഷ്യല്‍ സെന്റര്‍ സംഘടിപ്പിക്കുന്ന ”പതിനൊന്നാമത് ഭരത് മുരളി നാടകോത്സവം ജനുവരി 13 ന് അരങ്ങേറും.
പ്രസിഡന്റ് കൃഷ്ണകുമാര്‍ വിപി, ജനറല്‍ സെക്രട്ടറി ഷെറീന്‍ വിജയന്‍, ട്രഷറര്‍ നികേഷ്, കണ്‍വീനര്‍ അഡ്വ. അന്‍സാരി, റോയ് ഐ വര്‍ഗ്ഗീസ്, അഹല്യ ഹോസ്പിറ്റല്‍ ഗ്രൂപ്പ് സീനിയര്‍ മാനേജര്‍ സൂരജ് പ്രഭാകര്‍ എന്നിവര്‍ വാര്‍ത്താസമ്മേളനത്തില്‍ സംബന്ധിച്ചു.