കോഴിക്കോട്: ഫറൂഖ് കോളജില്‍ കെ.കെ മുഹമ്മദിനെ ആദരിക്കുന്ന ചടങ്ങില്‍ നിന്ന് മുസ്ലിംലീഗ് നേതാവ് പി.കെ അബ്ദുറബ്ബ് എം.എല്‍.എ പിന്‍വാങ്ങി. സംഘപരിവാര്‍ അനുകൂല പുരാവസ്തു ഗവേഷകനും അവരുടെ വേദികളിലെ സ്ഥിരം സാന്നിധ്യവുമാണ് കെ.കെ മുഹമ്മദ്. സര്‍ സയ്യിദ് ദിനാചരണത്തിന്റെ ഭാഗമായി ശനിയാഴ്ച ഫറൂഖ് കോളജില്‍ നടക്കുന്ന ചടങ്ങില്‍ കെ.കെ മുഹമ്മദിനെ ആദരിക്കുന്ന ചടങ്ങില്‍ നിന്നാണ് അബ്ദുറബ്ബ് വിട്ടുനില്‍ക്കുന്നത്. കേരള ഗവര്‍ണര്‍ അടക്കമുള്ള പ്രമുഖ വ്യക്തികള്‍ ചടങ്ങില്‍ പങ്കെടുക്കുന്നുണ്ട്.
അയോധ്യയില്‍ ഉല്‍ഖനനം നടത്തിയ ബി ബി ലാലിന്റെ നേതൃത്വത്തിലുള്ള സംഘത്തില്‍ കെ.കെ മുഹമ്മദ് ഉണ്ടായിരുന്നില്ലെന്നതിന് അലിഗഡ് മുസ്ലിം യൂനിവേഴ്‌സിറ്റി ചരിത്രവിഭാഗം പ്രഫസര്‍ സെയ്ദ് അലി റിസ്‌വി തെളിവുകള്‍ പുറത്തുവിട്ടിരുന്നു. ഇതേതുടര്‍ന്നാണ് അബ്ദുറബ്ബിന്റെ പിന്മാറ്റം.
അലിഗഡ് സര്‍വ്വകലാശാലയിലെ പൂര്‍വ്വ വിദ്യാര്‍ഥിയായ പി.കെ അബ്ദുറബ്ബ് എം.എല്‍.എയെയാണ് അധ്യക്ഷനായി നിശ്ചയിച്ചിരുന്നത്. കേരളത്തിലെ എ.എം.യു ( അലിഗഡ് മുസ്ലിം യൂനിവേഴ്‌സിറ്റി) അലുംനി ആണ് പരിപാടിയുടെ സംഘാടകര്‍. പരിപാടിക്കെതിരെ എം.എസ്.എഫ് രംഗത്തെത്തിയിട്ടുണ്ട്. സംഘപരിവാര്‍ വേദികളിലെ സ്ഥിരം സാന്നിധ്യവും ബാബരി വിഷയത്തിലുള്‍പ്പെടെ സംഘപരിവാര്‍ നിലപാടുകളെ പിന്തുണക്കുന്ന വാദങ്ങളുയര്‍ത്തിയ കെ.കെ മുഹമ്മദിനെ ആദരിക്കുന്നതിനെതിരെ അലിഗഢ് വിദ്യാര്‍ഥി സംഘടനകള്‍ തന്നെ പ്രതിഷേധവുമായി രംഗത്തെത്തിയിട്ടുണ്ട്.