തൃത്താല കണ്ണനൂരില്‍ യുവാവിനെ വെട്ടികൊന്നു. ഓങ്ങല്ലൂര്‍ കൊണ്ടൂര്‍ക്കര സ്വദേശി അന്‍സാര്‍ ആണ് മരിച്ചത്. കാറിലെത്തിയ സംഘം കത്തികൊണ്ട് വെട്ടിയെന്നാണ് പ്രാഥമിക നിഗമനം.
പട്ടാമ്പി തൃത്താല റോഡില്‍ കരിമ്പനക്കടവില്‍ റോഡില്‍ രക്തക്കറ കണ്ടതിനെ തുടര്‍ന്നാണ് നാട്ടുകാര്‍ വിവരം പൊലീസില്‍ അറിയിച്ചത്. തുടര്‍ന്ന് പൊലീസ് പരിശോധന നടത്തുന്നതിനിടെ റോഡില്‍ രക്തക്കറയും ഉപേക്ഷിക്കപ്പെട്ട നിലയില്‍ ഒരു കാറും കണ്ടെത്തി.
കാറിനുള്ളില്‍ നിന്ന് കത്തിയുടെ കവറും കണ്ടെടുത്തു. ഇതിനിടെ പട്ടാമ്പി സ്വകാര്യ ആശുപത്രിയില്‍ കഴുത്ത് മുറിഞ്ഞ നിലയില്‍ ചികിത്സക്കെത്തിയ യുവാവ് മരണപ്പെടുകയായിരുന്നു.
തന്നെ സുഹൃത്ത് വെട്ടി പരിക്കേല്‍പ്പിച്ചതായി ആശുപത്രി അധികൃതരോട് അന്‍സാര്‍ പറഞ്ഞു. ഓങ്ങല്ലൂര്‍ കൊണ്ടൂര്‍ക്കര സ്വദേശി അന്‍സാര്‍ എന്നാണ് ആശുപത്രി അധികൃതര്‍ക്ക് യുവാവ് നല്‍കിയ അഡ്രസ്സ്. തൃത്താല പൊലീസ് വിശദമായ അന്വേഷണം ആരംഭിച്ചു.