ബലിപെരുന്നാളിനെതിരെ സോഷ്യല്‍ മീഡിയയില്‍ പോസ്റ്റിട്ട സി.പി.എം ലോക്കല്‍ സെക്രട്ടറിയെ പുറത്താക്കി. കോഴിക്കോട് പുതുപ്പാടിയിലെ ലോക്കല്‍ സെക്രട്ടറി ഷൈജലിനെതിരെയാണ് നടപടി. ബലിപെരുന്നാളുമായി ബന്ധപ്പെട്ട് പ്രാദേശിക വാട്സ്ആപ്പ് ഗ്രൂപ്പിലെ ഷൈജലിന്റെ പരാമര്‍ശത്തിനെതിരെ വലിയ പ്രതിഷേധമുയര്‍ന്നിരുന്നു.
പുതുപ്പാടിയിലെ വിവിധ രാഷ്ട്രീയപ്പാര്‍ട്ടി പ്രതിനിധികളും പഞ്ചായത്ത് മെമ്പര്‍മാരുമൊക്കെയുള്ള ഗ്രൂപ്പിലാണ് ഷൈജല്‍ വിവാദ പരാമര്‍ശം നടത്തിയത്. പുതുപ്പാടി ഗ്രാമപഞ്ചായത്ത് മെമ്പറായ വ്യക്തി ബലിപെരുന്നാള്‍ ആശംസ നേര്‍ന്നുകൊണ്ട് ഇട്ട പോസ്റ്റിന് താഴെയാണ് ഷൈജല്‍ ബലിപെരുന്നാളിനെ വിമര്‍ശിച്ച് കുറിപ്പിട്ടത്.
ഷൈജലിനെതിരെ മുസ്ലിം ലീഗ് താമരശ്ശേരി പൊലീസില്‍ പരാതി നല്‍കിയിരുന്നു. മതസ്പര്‍ദ്ധ വളര്‍ത്തുന്ന പരാമര്‍ശമാണ് ഷൈജല്‍ നടത്തിയതെന്ന് ആരോപിച്ചാണ് പരാതി. വിവിധ മതസംഘടനകളും ഷൈജലിന്റെ പരാമര്‍ശത്തിനെതിരെ രംഗത്തുവന്നിരുന്നു. വിവാദമായതോടെ ഷൈജല്‍ ഖേദപ്രകടനം നടത്തിയിരുന്നു.