പഴയനായകനെ തേടിയെത്തി ഒരു കൂട്ടം നായികമാര്‍

ചലച്ചിത്രമേളയുടെ തിരക്കുകള്‍ക്കിടയില്‍ പഴയനായകന്‍ മധുവിനെ തേടിയെത്തി ഒരു കൂട്ടം നായികമാര്‍. തിരുവനന്തപുരത്തെ വീട്ടിലെത്തിയാണ് പഴയകാലത്തെ നായികമാര്‍ മധുവിനെ കണ്ടത്. കെആര്‍ വിജയ, രാജശ്രീ, ഹേമ ചൗധരി, റോജ രമണി, ഉഷാ കുമാരി, റീന, ഭവാനി എന്നിവരാണ് നവധി പിന്നിട്ട നടന്റെ വീട്ടിലെത്തിയത്.

ആദരവിന്റെ പൊന്നാടയും സ്‌നേഹത്തിന്റെ പൂക്കളും നല്‍കി നായികമാര്‍ മധുവിനെ ആദരിച്ചു. ഒരാള്‍ പറഞ്ഞുതീരുമ്പോള്‍ അടുത്തയാള്‍ സംസാരിച്ചുതുടങ്ങി പഴയകാലത്തെ ഓര്‍മകളും അനുഭവങ്ങളും പങ്കുവച്ച് നായകന് ചുറ്റും നായികമാര്‍ ഒത്തുകൂടി. അങ്ങനെ ഏറെ നേരം അവരുടെ ഓര്‍മ പുതുക്കല്‍ നീണ്ടുനിന്നു. വര്‍ത്തമാനങ്ങളും മധുര ഓര്‍മകളും കഥകളും കൊണ്ട് സ്വീകരണമുറി നിറഞ്ഞിരുന്നു.

തന്നെ കാണാനായി ഇവരെല്ലാം വന്നതില്‍ വളരെയധികം സന്തോഷമുണ്ടെന്ന് നായികമാരെ സന്ദര്‍ശിച്ചതിന് ശേഷം മധു മാദ്ധ്യമങ്ങളോട് പ്രതികരിച്ചു. ചോദ്യങ്ങള്‍ക്കെല്ലാം മധു തനത് ശൈലയിയില്‍ മറുപടിയും നല്‍കി. കഥാപാത്രങ്ങള്‍ക്ക് മാത്രമല്ല, ഓര്‍മ്മള്‍ക്കും പ്രായമാവില്ലല്ലോ എന്ന ഓര്‍മപ്പെടുത്തലുമായി പ്രിയ നടനെ കണ്ട് അവര്‍ മടങ്ങി.