കൊച്ചി നഗരത്തില്‍ പട്ടാപകല്‍ കാല്‍ലക്ഷത്തിലേറെ വിലയുള്ള നായക്കുട്ടിയെ തട്ടിക്കൊണ്ടുപോയതായി പരാതി. തൃകാക്കര കെന്നഡിമുക്കില്‍ താമസിക്കുന്ന ആന്‍സി ആനന്ദിന്റെ 3 വയസ്സ് പ്രായമുളള ബീഗിള്‍ ഇനത്തില്‍പ്പെട്ട നായക്കുട്ടിയെയാണ് നഷ്ടപ്പെട്ടത്. റോഡിലേക്ക് ഇറങ്ങിയോടിയ നായക്കുട്ടിയെ 2 യുവാക്കള്‍ കാറിലെത്തി പിടിച്ചുകൊണ്ടുപോയെന്നാണ് വിവരം.
കഴിഞ്ഞ ദിവസം ഉച്ചയ്ക്കാണ് കേസിനാസ്പദമായ സംഭവം. വീടിന്റെ തുറന്ന് കിടന്ന ഗേറ്റിലൂടെ നായക്കുട്ടി പുറത്ത് ചാടുകയായിരുന്നു. ഇവിടെ നിന്ന് റോഡിലൂടെ കുറച്ച് ദൂരം ഓടിയ നായക്കുട്ടിയെ കണ്ടതോടെ വാഹനങ്ങള്‍ നിര്‍ത്തിയതോടെ ചെറിയ ഗതാഗത കുരുക്കായി. സമീപത്തു നിന്നുളള കുടുംബാരോഗ്യ കേന്ദ്രത്തിന് മുന്നില്‍ വച്ച് നായയെ കണ്ടെന്ന് വീട്ടമ്മ പറഞ്ഞു. ഇതിനിടയില്‍ വെളള കാറിലെത്തിയ 2 യുവാക്കള്‍ നായക്കുട്ടിയെ തട്ടിക്കൊണ്ടുപോയതായി ദൃക്‌സാക്ഷികള്‍ പറയുന്നു.
ഇതോടെ കടുത്ത ആശങ്കയിലായ കുടുംബം പൊലീസില്‍ പരാതി നല്‍കുകയായിരുന്നു. പരാതിയെ തുടര്‍ന്ന് സമീപത്തെ സി.സി.ടി.വി ആശ്രയിച്ച് യുവാക്കളെത്തിയ കാര്‍ കണ്ടെത്താനുള്ള ശ്രമത്തിലാണ് പൊലീസ്. സമൂഹമാധ്യമങ്ങളിലും വിവരം പങ്കുവെച്ച കുടുംബം പ്രതീക്ഷയോടെ കാത്തിരിക്കുകയാണ്.