Sports

ഖത്തറിലുണ്ടാവില്ല ഇവര്‍

Published

7 years ago

May 22, 2018

മോസ്‌ക്കോ: ലോകകപ്പില്‍ പന്ത് തട്ടാന്‍ ആഗ്രഹിക്കാത്ത താരങ്ങളില്ല. നാല് ലോകകപ്പ് കളിച്ച് മൂന്ന് തവണ കപ്പ് സ്വന്തമാക്കിയ ഫുട്‌ബോള്‍ രാജാവ് പെലെ ഇപ്പോഴും പറയാറുണ്ട് ലോകകപ്പാണ് തന്നെ ആഗോള താരമാക്കിയതെന്ന്. പോര്‍ച്ചുഗലുകാരന്‍ യുസേബിയോ, ഡച്ചുകാരന്‍ യോഹാന്‍ ക്രൈഫ്, ജര്‍മനിയുടെ ഫ്രാന്‍സ് ബെക്കന്‍ ബോവര്‍, കൊളംബിയയുടെ കുസൃതിക്കാരന്‍ ഗോള്‍ക്കീപ്പര്‍ റെനോ ഹ്വിഗിറ്റ, കാമറൂണിന്റെ വെറ്ററന്‍ താരം റോജഡര്‍ മില്ല, തുടങ്ങിയവരെല്ലാം ലോകത്തിന് പ്രിയപ്പെട്ടവരായത് ലോകകപ്പിലൂടെയാണ്. 1986 ലെ ലോകകപ്പില്‍ ലോകത്തോളം ഉയര്‍ന്നു അര്‍ജന്റീനക്കാരന്‍ ഡിയാഗോ അര്‍മാന്‍ഡോ മറഡോണ. സൈനുദ്ദീന്‍ സിദാന്‍ എന്ന ഫ്രഞ്ച് പ്രതിഭയെ ഇപ്പോഴും കാല്‍പ്പന്ത് ലോകം നെഞ്ചിലേറ്റുന്നത് 1998 ലെ ലോകകപ്പ് ഫൈനലിലെ മികവിലാണ്. ലയണല്‍ മെസി ഇപ്പോഴും പറയാറുണ്ട് ലോകകപ്പ് കൂടി തനിക്ക് വേണമെന്ന്. കൃസ്റ്റിയാനോ റൊണാള്‍ഡോയുടെ സ്വപ്‌നം ലോകകപ്പാണ്. കഴിഞ്ഞ ലോകകപ്പില്‍ കൊളംബിയക്കെതിരായ മല്‍സരത്ില്‍ പരുക്കേറ്റ് പിടഞ്ഞ് പുറത്തായപ്പോള്‍ നെയ്മര്‍ കരഞ്ഞത് സ്വന്തം നാട്ടിലെ ലോകകപ്പ് മല്‍സരങ്ങള്‍ നഷ്ടമാവുന്ന വേദനയിലായിരുന്നു. ജിയാന്‍ ലുക്കാ ബഫണ്‍ പറയുന്നു 2006 ലെ ആ ജര്‍മന്‍ രാത്രി മറക്കാനാവില്ലെന്ന്. എപ്പോഴും എല്ലാവര്‍ക്കും ലോകകപ്പ് കളിക്കാനാവില്ലല്ലോ… നാല് ലോകകപ്പിന് ശേഷം 1970 ല്‍ പെലെ എന്ന ഇതിഹാസം മെക്‌സിക്കോയിലെ അസ്‌റ്റെക്ക് സ്‌റ്റേഡിയം വിട്ടത് നിറഞ്ഞ നേത്രങ്ങളോടെയാണ്. മറഡോണ 86 ലെ നേട്ടത്തിന് ശേഷം 94ല്‍ വില്ലനായി കരഞ്ഞ് മടങ്ങി. സിദാന്റെ മടക്കം ഒരു ഫുട്‌ബോള്‍ പ്രേമിയും ആഗ്രഹിക്കാത്ത തരത്തിലായിരുന്നു. 2006 ലെ ഫൈനലില്‍ കപ്പിന് തൊട്ടരികില്‍ ഇറ്റലിക്കാരന്‍ മാര്‍ക്കോ മറ്റരേസിയെ ഇടിച്ചു വീഴ്ത്തി ചുവപ്പുമായി പുറത്ത്. ബഫണിന്റെ വേദന അവസാന ലോകകപ്പില്‍ പന്ത് തട്ടാനായില്ലല്ലോ എന്നതാണ്. റൊണാള്‍ഡോ എന്ന ബ്രസീല്‍ ഇതിഹാസം 98 ലെ ആ ഫൈനല്‍ രാത്രിയില്‍ തോറ്റ് മടങ്ങിയ വേദന പലവട്ടം പങ്ക് വെച്ചിട്ടുണ്ട്.
ഇത്തവണ റഷ്യയിലും വേദനയുടെ മുഹൂര്‍ത്തങ്ങള്‍ ഉറപ്പാണ്. മെസിക്കും കൃസ്റ്റിയാനോക്കും ഇനി ഒരു ലോകകപ്പ് ഉണ്ടോ എന്ന് വ്യക്തമല്ല. മെസി മുപ്പതിലും കൃസ്റ്റിയാനോ 33 ലും നില്‍ക്കുന്നു. 45 വയസുള്ള ഈജിപ്ഷ്യന്‍ ഗോള്‍ക്കീപ്പര്‍ റഷ്യയില്‍ കളിക്കാന്‍ വരുമ്പോള്‍ ഇവര്‍ക്ക് മുന്നില്‍ ഇനിയും അവസരങ്ങളുണ്ട്. പക്ഷേ ലോക ഫുട്‌ബോളില്‍ നിറഞ്ഞ് നിന്ന് നാലു പേര്‍ എന്തായാലും 2022 ലെ ഖത്തര്‍ ലോകകപ്പിനുണ്ടാവില്ല. തന്റെ അഞ്ചാം ലോകകപ്പ് കളിച്ച് ചരിത്രത്തില്‍ ഇടം നേടുന്ന മെക്‌സിക്കോയുടെ റാഫേല്‍ മാര്‍ക്കസ്, 2010 ല്‍ സ്‌പെയിനിന് കപ്പ് സമ്മാനിച്ച ഗോള്‍ നേടിയ ആന്ദ്രെ ഇനിയസ്റ്റ, അര്‍ജന്റീനയുടെ പിന്‍നിരയിലെ ശക്തന്‍ ഹാവിയര്‍ മസ്‌ക്കരാനോ, ഓസ്‌ട്രേലിയയുടെ ഗോളടി യന്ത്രം ടിം കാഹില്‍ എന്നിവര്‍ ഖത്തറിലേക്ക് എന്തായാലുമില്ല. റഷ്യയോട് ഇവര്‍ ഗുഡ് ബൈ പറയുന്നത് വേദനിക്കുന്ന ഹൃദയവുമായിട്ടായിരിക്കും.
ലോകകപ്പില്‍ അഞ്ച് തവണ പന്ത് തട്ടാന്‍ സാക്ഷാല്‍ പെലെക്ക് പോലുമായിട്ടില്ല. മെക്‌സിക്കോയുടെ അന്റോണിയോ കാര്‍ബജാലും ജര്‍മനിയുടെ ലോത്തര്‍ മത്തേവൂസും കഴിഞ്ഞാല്‍ അഞ്ചിന്റെ ആ റെക്കോര്‍ഡ് മാര്‍ക്കസിനാണ്. 2002 ലെ കൊറിയ-ജപ്പാന്‍ ലോകകപ്പില്‍ നായകന്റെ ആം ബാന്‍ഡുമായി കളിക്കാനിറങ്ങിയതാണ് മാര്‍ക്കസ്. 2006 ല്‍ ജര്‍മനിയില്‍, 2010 ല്‍ ദക്ഷിണാഫ്രിക്കയില്‍, 2014 ല്‍ ബ്രസീലില്‍-ഇനി റഷ്യയിലും മാര്‍ക്കസ് കളിക്കുമ്പോള്‍ പ്രായം 39. 16 ലോകകപ്പ് മല്‍സരങ്ങളാണ് ഇതിനകം കളിച്ചത്. 2010 ലെ ദക്ഷിണാഫ്രിക്കന്‍ ലോകകപ്പിലെ ഉദ്ഘാടന മല്‍സരത്തില്‍ ആതിഥേയരായ ദക്ഷിണാഫ്രിക്കക്കെതിരെ മെക്‌സിക്കോയുടെ സമനില ഗോള്‍ നേടിയത് മാര്‍ക്കസായിരുന്നു.
34 വയസാണ് ഇനിയസ്റ്റയുടെ പ്രായം. ബാര്‍സിലോണയോട് ഈ സീസണില്‍ വിടപറയുന്നു അദ്ദേഹം. 2006 ലെ ജര്‍മന്‍ ലോകകപ്പിലാണ് അദ്ദേഹം തുടങ്ങിയത്. മൂന്ന് ലോകകപ്പുകള്‍ പിന്നിട്ടപ്പോല്‍ 2010 ലെ ചരിത്രനേട്ടം ഈ മധ്യനിരക്കാരനൊപ്പമാണ്. പത്ത് ലോകകപ്പ് മല്‍സരങ്ങള്‍ രാജ്യത്തിനായി കളിച്ചു. ഓസീസിന് ലോകകപ്പില്‍ വലിയ റെക്കോര്‍ഡില്ല. പക്ഷേ ഓസീസ് അവസാനമായി കളിച്ച മൂന്ന് ലോകകപ്പിലും ടിം കാഹില്‍ എന്ന ശക്തനുണ്ടായിരുന്നു. റഷ്യയിലും അദ്ദേഹമുണ്ട്. കഴിഞ്ഞ ലോകകപ്പില്‍ ഡച്ചുകാരെ ഞെട്ടിച്ച ആ ഗോള്‍ ഫുട്‌ബോള്‍ ലോകം മറക്കില്ല. എട്ട് ലോകകപ്പ് മല്‍സരങ്ങളാണ് 38 കാരനായ കാഹില്‍ കളിച്ചത്.
അര്‍ജന്റീനക്കാരന്‍ മസ്‌ക്കരാനോക്ക് അപൂര്‍വ്വമായ ഒരു റെക്കോര്‍ഡുണ്ട്. മൂന്ന് ലോകകപ്പില്‍ പന്ത് തട്ടിയ അദ്ദേഹം അര്‍ജന്റീനയുടെ എല്ലാ മല്‍സരങ്ങളിലും പൂര്‍ണസമയം കളിച്ച താരമാണ്. 16 മല്‍സരങ്ങളാണ് ലോകകപ്പില്‍ 33 കാരന്‍ കളിച്ചത്. ഒരു പരിശീലകനും അദ്ദേഹത്തെ സബ്സ്റ്റിറ്റിയൂട്ട് ചെയ്തിട്ടില്ല. ഈ നാല് പേരും റഷ്യയില്‍ അവസാന ലോകകപ്പ്് കളിക്കുമ്പോള്‍ എല്ലാവരും മോഹിക്കുന്നത് കപ്പടിച്ച് വിടുപറയാനാണ്. ആര്‍ക്കായിരിക്കും ആ ഭാഗ്യം…?

Sports

ബുംറയെ കണക്കിന് പ്രഹരിച്ച് ഓസീസിന്റെ 19കാരന്‍ സാം കോണ്‍സ്റ്റാസ്

65 പന്തില്‍ രണ്ടു സിക്‌സും ആറു ഫോറുമടക്കം 60 റണ്‍സാണ് താരം അടിച്ചെടുത്തത്

Published

10 hours ago

December 26, 2024

webdesk18

മെല്‍ബണ്‍: ബോക്‌സിങ് ഡേ ടെസ്റ്റില്‍ ഇന്ത്യയെ വിറപ്പിച്ച് 19കാരനായ അരങ്ങേറ്റക്കാരന്‍ സാം കോണ്‍സ്റ്റാസ്. ഇന്ത്യന്‍ പേസ് നിരയിലെ ഏറ്റവും അപകടകാരിയായ ബോളര്‍ ജസ്പ്രീത് ബുംറയെ ഭയലേശമന്യേ നേരിട്ടാണ് യുവതാരം ടെസ്റ്റ് ക്രിക്കറ്റില്‍ വരവറിയിച്ചത്. ഓസീസിനായി ഇന്ന് അരങ്ങേറ്റം കുറിച്ച സാം കന്നി മത്സരത്തിന്റെ സങ്കോചങ്ങളൊന്നുമില്ലാതെ അര്‍ധ സെഞ്ച്വറി കുറിച്ചു.

ബുംറ ഉള്‍പ്പെടെയുള്ള ഇന്ത്യന്‍ ബൗളര്‍മാരെ അനായാസം നേരിട്ട് കോണ്‍സ്റ്റാസ് അതിവേഗം ടീം സ്‌കോര്‍ ഉയര്‍ത്തുന്നത് തലവേദനയാകുമെന്ന് കണ്ടതോടെ വിരാട് കോഹ്ലി പ്രകോപിപ്പിക്കാന്‍ ശ്രമിച്ചത് മത്സരത്തില്‍ വാക്കുതര്‍ക്കത്തിനിടയാക്കി. മത്സരത്തിന്റെ പത്താം ഓവറിലാണ് സംഭവം. സ്‌ട്രൈക്കേഴ്‌സ് എന്‍ഡിലേക്ക് നടന്നുനീങ്ങുന്ന കോന്‍സ്റ്റാസിന്റെ തോളില്‍ കോഹ്ലി മനപൂര്‍വം തട്ടിയതാണ് തര്‍ക്കത്തിനു കാരണമായത്. കോഹ്ലിയുടെ അനാവശ്യ പ്രകോപനത്തോട് ബാറ്റുകൊണ്ടാണ് യുവതാരം മറുപടി നല്‍കിയത്. 19കാരനായ അരങ്ങേറ്റക്കാരനോട് തര്‍ക്കിച്ചതോടെ കോഹ്ലിയുടെ നിലവാരം താഴ്ന്നുവെന്നാണ് വിമര്‍ശകര്‍ ചൂണ്ടിക്കാട്ടുന്നത്.

ആദ്യ ഓവറില്‍ ബുംറയുടെ പന്തുകള്‍ ശ്രദ്ധയോടെ നേരിട്ടെങ്കിലും പിന്നീടങ്ങോട്ട് കണ്ടത് കോണ്‍സ്റ്റാസിന്റെ അഴിഞ്ഞാട്ടമാണ്. മത്സരത്തിന്റെ ഏഴാം ഓവറില്‍ ബുംറ ആദ്യമായി 19കാരന്റെ ബാറ്റിന്റെ ചൂടറിഞ്ഞു. ആദ്യ പന്ത് ബൗണ്ടറി കടത്തിയ താരം, രണ്ടാം പന്ത് സിക്‌സും പറത്തി. ബുംറയുടെ ടെസ്റ്റ് കരിയറിലെ ഒരിക്കലും മറക്കാനാകാത്ത തിരിച്ചടി. 2021നുശേഷം ടെസ്റ്റില്‍ ബുംറയുടെ പന്തില്‍ ആദ്യമായാണ് ഒരുതാരം സിക്‌സടിക്കുന്നത്. അതും ഒരു അരങ്ങേറ്റക്കാരന്‍.

ബുംറ നാലു വര്‍ഷത്തിനിടെ ടെസ്റ്റില്‍ 4448 പന്തുകള്‍ എറിഞ്ഞെങ്കിലും ഒരാള്‍ക്കുപോലും സിക്‌സ് നേടാന്‍ കഴിഞ്ഞിരുന്നില്ല. 11ാം ഓവറിലും ബുംറ യുവതാരത്തിന്റെ ബാറ്റിന്റെ ചൂടറിഞ്ഞു. ഒരു സിക്‌സും രണ്ടു ഫോറുമടക്കം 18 റണ്‍സാണ് താരം അടിച്ചെടുത്തത്. ഇന്ത്യന്‍ ബൗളര്‍മാരുടെ പന്തുകളില്‍ സാഹസിക ഷോട്ടുകള്‍ ഉള്‍പ്പെടെ അനായാസം കളിച്ച താരം 52 പന്തില്‍ അര്‍ധ സെഞ്ച്വറിയിലെത്തി. 65 പന്തില്‍ രണ്ടു സിക്‌സും ആറു ഫോറുമടക്കം 60 റണ്‍സെടുത്ത താരത്തെ രവീന്ദ്ര ജദേജ എല്‍.ബി.ഡബ്ല്യുവില്‍ കുരുക്കിയാണ് പുറത്താക്കിയത്.

Cricket

ഐസിസി ടെസ്റ്റ് ബൗളര്‍മാരുടെ റാങ്കിങ്ങില്‍ ഒന്നാം സ്ഥാനം നിലനിര്‍ത്തി ബുംറ

ടെസ്റ്റില്‍ ഒരു ഇന്ത്യന്‍ ബൗളറുടെ ഏറ്റവും ഉയര്‍ന്ന റേറ്റിങ് പോയന്റെന്ന ആര്‍. അശ്വിന്റെ റെക്കോഡിനൊപ്പമെത്താനും ബുംറയ്ക്കായി.

Published

22 hours ago

December 25, 2024

webdesk13

ബോര്‍ഡര്‍ ഗവാസ്‌ക്കര്‍ പരമ്പരയിലെ മികച്ച പ്രകടനത്തിലൂടെ റെക്കോഡ് റേറ്റിങ് പോയന്റുമായി ഐസിസി ടെസ്റ്റ് ബൗളര്‍മാരുടെ റാങ്കിങ്ങില്‍ ഒന്നാം സ്ഥാനം നിലനിര്‍ത്തി ജസ്പ്രീത് ബുംറ.

ടെസ്റ്റില്‍ ഒരു ഇന്ത്യന്‍ ബൗളറുടെ ഏറ്റവും ഉയര്‍ന്ന റേറ്റിങ് പോയന്റെന്ന ആര്‍. അശ്വിന്റെ റെക്കോഡിനൊപ്പമെത്താനും ബുംറയ്ക്കായി. 904 റേറ്റിങ് പോയന്റാണ് ഇപ്പോള്‍ ബുംറയ്ക്കുള്ളത്. താരത്തിന്റെ കരിയര്‍ ബെസ്റ്റ് റേറ്റിങ് കൂടിയാണിത്.

ബ്രിസ്‌ബെയ്‌നിലെ ഗാബ ടെസ്റ്റില്‍ 9 വിക്കറ്റ് വീഴ്ത്തിയ പ്രകടനത്തോടെ 14 റേറ്റിങ് പോയന്റാണ് താരത്തിന് ലഭിച്ചത്. ഇതോടെയാണ് 904 റേറ്റിങ് പോയന്റിലേക്ക് ബുംറ എത്തിയത്. 2016 ഡിസംബറിലാണ് അശ്വിന്‍ 904 റേറ്റിങ് പോയന്റ് നേടിയത്.

മൂന്ന് ടെസ്റ്റുകളില്‍ നിന്ന് 10.90 ശരാശരിയില്‍ 21 വിക്കറ്റുകളാണ് ബുംറ നേടിയത്. ബോര്‍ഡര്‍ഗവാസ്‌കര്‍ ട്രോഫി ചരിത്രത്തില്‍ മറ്റൊരു ബൗളറും ആദ്യ മൂന്ന് ടെസ്റ്റുകള്‍ക്ക് ശേഷം ഇതുവരെ 15 വിക്കറ്റില്‍ കൂടുതല്‍ നേടിയിട്ടില്ല. നിലവില്‍ രണ്ടാം സ്ഥാനത്തുള്ള ദക്ഷിണാഫ്രിക്കയുടെ കാഗിസോ റബാദയ്ക്ക് 856 പോയന്റ് മാത്രമാണുള്ളത്.

ഇതോടൊപ്പം ഏഷ്യന്‍ പേസ് ബൗളര്‍മാരില്‍ 900 റേറ്റിങ് പോയന്റ് നേടുന്ന മൂന്നാമത്തെ മാത്രം താരമാണ് ബുംറ. പാക് താരങ്ങളായ ഇമ്രാന്‍ ഖാനും വഖാര്‍ യൂനിസുമാണ് ഇതിനു മുമ്പ് ഈ നേട്ടം സ്വന്തമാക്കിയവര്‍.

Football

ലാലീഗയില്‍ റയലിന്റെ കുതിപ്പ് തുടരുന്നു; സെവിയ്യയെ നാല് ഗോളുകള്‍ക്ക് തകര്‍ത്തു

സെവിയ്യക്കായി ഇസാക് റൊമേരോ(35), ഡോഡി ലുകെന്‍ബാകിയോ(85) എന്നിവര്‍ സെവിയ്യക്ക് വേണ്ടി ലക്ഷ്യം കണ്ടു.

Published

3 days ago

December 23, 2024

webdesk13

സ്വന്തം തട്ടകമായ സാന്റിയാഗോ ബെര്‍ണാബ്യൂവില്‍ റയല്‍ മാഡ്രിഡിന് തിളക്കമാര്‍ന്ന ജയം. സെവിയ്യയെ 4-2നാണ് തകര്‍ത്തത്. കിലിയന്‍ എംബാപെ(10), ഫെഡറികോ വാല്‍വെര്‍ഡെ(20), റോഡ്രിഗോ(34), ബ്രഹിം ഡിയസ്(53) എന്നിവരാണ് ആതിഥേയര്‍ക്കായി ഗോള്‍ നേടിയത്. സെവിയ്യക്കായി ഇസാക് റൊമേരോ(35), ഡോഡി ലുകെന്‍ബാകിയോ(85) എന്നിവര്‍ സെവിയ്യക്ക് വേണ്ടി ലക്ഷ്യം കണ്ടു.

ജയത്തോടെ ബാഴ്‌സലോണയെ മറികടന്ന് റയല്‍ പോയന്റ് ടേബിളില്‍ രണ്ടാംസ്ഥാനത്തേക്കുയര്‍ന്നു. 18 മത്സരത്തില്‍ 12 ജയവുമായി 40 പോയന്റാണ് റയലിനുള്ളത്. ഒരു മത്സരം അധികം കളിച്ച ബാഴ്‌സ 38 പോയന്റുമായി മൂന്നാമതാണ്. 18 മാച്ചില്‍ 12 ജയവുമായി 41 പോയന്റുള്ള സിമിയോണിയുടെ അത്‌ലറ്റികോ മാഡ്രിഡാണ് തലപ്പത്ത്.

സ്വന്തം തട്ടകത്തില്‍ തുടക്കം മുതല്‍ മികച്ച നീക്കങ്ങളുമായി കളംനിറഞ്ഞ ലോസ് ബ്ലാങ്കോസ് പത്താംമിനിറ്റില്‍ തന്നെ വലകുലുക്കി. റോഡ്രിഗോയുടെ അസിസ്റ്റില്‍ കിലിയന്‍ എംബാപെ വെടിയുണ്ട ഷോട്ട് പായിച്ചു. സെവിയ്യ ഗോള്‍കീപ്പറെ അനായാസം മറികടന്നു പോസ്റ്റിലേക്ക്. സീസണിലെ താരത്തിന്റെ പത്താം ഗോളാണിത്. 20ാം മിനിറ്റില്‍ കമവിംഗയില്‍ നിന്ന് ലഭിച്ച പന്തുമായി മുന്നേറിയ ഫെഡറികോ വാല്‍വെഡയുടെ ബുള്ളറ്റ് ഷോട്ട് തടഞ്ഞുനിര്‍ത്താന്‍ സെവിയ്യ ഗോളിക്കായില്ല. 34ാം മിനിറ്റില്‍ കൗണ്ടര്‍ അറ്റാക്കിലൂടെ റയല്‍ മൂന്നാം ഗോളും കണ്ടെത്തി.

ഇത്തവണ ലൂക്കാസ് വാസ്‌ക്വസിന്റെ അസിസ്റ്റില്‍ റോഡ്രിഗോയാണ് വലകുലുക്കിയത്. എന്നാല്‍ തൊട്ടടുത്ത മിനിറ്റില്‍ ആദ്യ ഗോള്‍ മടക്കി സന്ദര്‍ശകര്‍ പ്രതീക്ഷ കാത്തു. സാഞ്ചസിന്റെ അസിസ്റ്റില്‍ ഇസാക് റൊമേരോയാണ് ആദ്യ ഗോള്‍ മടക്കിയത്. രണ്ടാം പകുതിയില്‍ കിലിയന്‍ എംബാപെയുടെ അസിസ്റ്റില്‍ റയലിനായി ബ്രഹിം ഡയസ് നാലാം ഗോളും നേടി പട്ടിക പൂര്‍ത്തിയാക്കി. എന്നാല്‍ 85ാം മിനിറ്റില്‍ ഫെര്‍ണാണ്ടസിന്റെ അസിസ്റ്റില്‍ ഡോഡി ലുകെബാകിയോയിലൂടെ രണ്ടാം ഗോള്‍ നേടി.