രാജകീയ പേരും വന്‍ താര നിരയുണ്ടായിട്ടും റോയല്‍ ചലഞ്ചേഴ്‌സ് ബംഗളൂരുവിനും കിങ്‌സ് ഇലവന്‍ പഞ്ചാബിനും ഐ.പി.എല്‍ കിരീടത്തില്‍ ഇതുവരെ മുത്തമിടാനായിട്ടില്ല. വമ്പന്‍ പ്രതീക്ഷളുമായി എത്തി ടൂര്‍ണമെന്റിനൊടുവില്‍ ആരാധകരെ നിരാ ശരാക്കുന്ന സ്ഥിതി ഇത്തവണയുണ്ടാവില്ലെന്ന സൂചനയാണ് ബാംഗ്ലൂര്‍ റോയല്‍ ചലഞ്ചേഴ്‌സ് ടീം നല്‍കുന്നത്. പരിചയ സമ്പന്നരും യുവ നിരയും അണിനിരക്കുന്ന സന്തുലിത ടീമാണ് ഇത്തവണ ആര്‍.സി.ബിയുടേത്. വിരാട് കോഹ്‌ലി തന്നെയാണ് നായക കുപ്പായത്തില്‍. ഡിവില്ലിയേഴ്‌സ്, ഡികോക്ക്, മനന്‍ വോറ, സര്‍ഫ്രാസ് ഖാന്‍, പാര്‍ഥിവ് പട്ടേല്‍ എന്നിവരാണ് ബാറ്റിങിലെ കരുത്ത്. ഓള്‍റൗണ്ടര്‍മാരായ മൊയീന്‍ അലി, ക്രിസ് വോക്‌സ്, കോറി ആന്‍ഡേഴ്‌സന്‍, ഗ്രാന്‍ഡ്‌ഹോം എന്നിവരടങ്ങുന്നതാണ് ടീമിന്റെ ഓള്‍റൗണ്ട് നിര. ബോളിങിലും കരുത്തരുണ്ട്. ടി സൗത്തി നയിക്കുന്ന ബോളിങ് നിരയില്‍ ഉമേഷ് യാദവ്, മുഹമ്മദ് സിറാജ്, സ്പിന്നര്‍ യൂസ്‌വേന്ദ്ര ചാഹല്‍, വാഷിങ്ടണ്‍ സുന്ദര്‍, മുരുകന്‍ അശ്വിന്‍ എന്നിവരാണ് പ്രമുഖര്‍.
പോയ സീസണുകളില്‍ ചെന്നൈയുടെ വിജയങ്ങള്‍ക്ക് ചുക്കാന്‍ പിടിച്ച ആര്‍.അശ്വിനാണ് ഇത്തവണ പഞ്ചാബ് കിങ്‌സ് ഇലവനെ നയിക്കുന്നത്. സെവാഗാണ് മെന്ററുടെ റോളില്‍. ഏറെക്കാലം ബംഗളൂരിന്റെ ജഴ്‌സിയണിഞ്ഞ ക്രിസ് ഗെയ്‌ലും ഇത്തവണ പഞ്ചാബിനൊപ്പമാണ്. ഡേവിഡ് മില്ലറും ആരോണ്‍ ഫിഞ്ചും യുവ്‌രാജ് സിങും കെ.എല്‍ രാഹുലും കൂടി ബാറ്റിങ് നിരയില്‍ ചേരുമ്പോള്‍ വലിയ പ്രതീക്ഷകളാണ് ആരാധകര്‍ക്ക്. ക്യാപ്റ്റന്‍ അശ്വിന്‍ തന്നെ നയിക്കുന്ന ബോളിങ് നിരയും ശക്തമാണ്. അക്ഷര്‍ പട്ടേലും അഫ്ഗാന്റെ മുജീബ് സദ്രാനുമാണ് അശ്വിന്റെ സ്പിന്‍ പങ്കാളികള്‍. ഓസീസ് പേസര്‍ ആന്‍ഡ്രു ടൈയും ഓള്‍റൗണ്ടര്‍ മാര്‍ക്കസ് സ്‌റ്റോയ്‌നിസും നയിക്കുന്ന പേസ് നിരയും മോശമല്ല. ബെന്‍ ഡ്വാര്‍ഷൂയിസും അങ്കിത് രാജ്പുത്തും ബരീന്ദര്‍ സ്രാനും മോഹിത് ശര്‍മയും ഉള്‍പ്പെടുന്നതോടെ ബോളിങ് നിര പൂര്‍ണം.
ഒരു ഇടവേളക്ക് ശേഷം ഗൗതം ഗംഭീര്‍ നായകനായി തിരിച്ചെത്തുന്ന ഡെല്‍ഹി ഡെയര്‍ഡെവിള്‍സിനും കിരീടത്തില്‍ കുറഞ്ഞതൊന്നും മതിയാവില്ല. ഇതുവരെ ഐ.പിഎല്‍ കിരീടം നേടാത്ത മൂന്നിലൊരു ടീം ഡല്‍ഹിയാണ്. ഒറ്റക്ക് മത്സരം ജയിപ്പിക്കാന്‍ കെല്‍പ്പുള്ളവരുടെ സംഘമാണ് ഡല്‍ഹിയുടേത്. കോളിന്‍ മണ്‍റോ, ജാസണ്‍ റോയ്, ഗ്ലെന്‍ മാക്‌സ്‌വെല്‍, ട്രെന്റ് ബോള്‍ട്ട്, ക്രിസ് മോറിസ്, ഡാന്‍ ക്രിസ്റ്റ്യന്‍ എന്നീ താരങ്ങളുടെ സാനിധ്യം ടീമിന് ഏറെ ഗുണകരമാവും. ശ്രേയസ് അയ്യര്‍, ഋഷഭ് പന്ത്, പൃഥ്വി ഷാ, നമന്‍ ഓജ, അമിത് മിശ്ര, ജയന്ത് യാദവ്, മുഹമ്മദ് ഷമി, ഷഹബാസ് നദീം, വിജയ് ശങ്കര്‍, അഭിഷേക് ശര്‍മ തുടങ്ങിയവരാണ് റിക്കി പോണ്ടിങ് പരിശീലകനാവുന്ന ടീമിലെ മറ്റു ശ്രദ്ധേയ താരങ്ങള്‍. പരിക്കിനെ തുടര്‍ന്ന് ലീഗില്‍ നിന്ന് പിന്‍മാറിയ ദക്ഷിണാഫ്രിക്കന്‍ പേസര്‍ കഗീസോ റബാഡയുടെ അസാനിധ്യം ടീമിന് ക്ഷീണമാവുമെന്നുറപ്പ്.
2016ല്‍ ഐ.പി.എല്‍ കിരീടം നേടിയ സണ്‍റൈസേഴ്‌സ് ഹൈദരാബാദ് ശക്തമായ താര നിരയുമായാണ് പുതിയ സീസണിനെത്തുന്നത്. ബോള്‍ ചുരണ്ടല്‍ വിവാദത്തെ തുടര്‍ന്ന് സ്ഥാനം തെറിച്ച ഡേവിഡ് വാര്‍ണറിന് പകരം ന്യൂസിലാന്റ് ക്യാപ്റ്റന്‍ കെയ്ന്‍ വില്യംസാണ് ടീമിനെ നയിക്കുക. ഭുവനേശ്വര്‍ കുമാറും ശിഖര്‍ ധവാനും റാഷിദ് ഖാനും മുഹമ്മദ് നബിയും സിദ്ധാര്‍ഥ് കൗളും പോലുള്ള മിന്നും താരങ്ങളിലാണ് ടീമിന്റെ പ്രതീക്ഷ. മനീഷ് പാണ്ഡെ, വൃദ്ധിമാന്‍ സാഹ, യൂസഫ് പഠാന്‍, ഷാക്കിബ് ഹസന്‍, ബ്രാത്ത്‌വെയ്റ്റ്, അലക്‌സ് ഹെയ്ല്‍സ് എന്നീ താരങ്ങള്‍ ബാറ്റിങിലും ക്രിസ് ജോര്‍ഡനും ബില്ലി സ്റ്റാന്‍ലേക്കും സന്ദീപ് ശര്‍മയും ബോളിങിലും ടീമിന് കരുത്താകും. ബോളിങില്‍ കരുത്ത് പ്രകടിപ്പിക്കുന്ന ബേസില്‍ തമ്പി, സച്ചിന്‍ ബേബി എന്നീ രണ്ടു മലയാളി താരങ്ങളുടെ സാനിധ്യവും ടീമിന് മുതല്‍കൂട്ടാവും.