മണിപ്പൂരില്‍ കലാപസാഹചര്യം കത്തിച്ചു നിര്‍ത്തുന്നതില്‍ ബിജെപിക്കു ഗൂഢതാല്‍പര്യമുണ്ടെന്നും രാജധര്‍മം പാലിക്കാത്തതിനുള്ള ശിക്ഷയില്‍നിന്നു പ്രധാനമന്ത്രി നരേന്ദ്ര മോദിക്ക് ഒഴിഞ്ഞുമാറാനാകില്ലെന്നും കോണ്‍ഗ്രസ് അധ്യക്ഷനും രാജ്യസഭാ പ്രതിപക്ഷ നേതാവുമായ മല്ലികാര്‍ജുന്‍ ഖാര്‍ഗെ. മണിപ്പൂരില്‍ വീണ്ടും കലാപം പൊട്ടിപ്പുറപ്പെട്ട സാഹചര്യം ചൂണ്ടിക്കാട്ടിയാണ് കോണ്‍ഗ്രസിന്റെ വിമര്‍ശനം.

കത്തുന്ന മണിപ്പൂരിലെ തീപ്പെട്ടിക്കൊള്ളിയാണു ബിജെപിയെന്നു ഖാര്‍ഗെ വിമര്‍ശിച്ചു. ‘കലാപം തുടങ്ങിയ ശേഷം മോദി മണിപ്പുര്‍ സന്ദര്‍ശിച്ചിട്ടില്ല. മോദി ഒടുവില്‍ മണിപ്പൂരില്‍ പോയത് 2022ലാണ്. അവിടെ കലാപം തുടങ്ങിയത് 2023 മേയ് 3നും. 600ല്‍ പരം ദിനങ്ങള്‍ കഴിഞ്ഞു. മുഖ്യമന്ത്രി പരസ്യമായി മാപ്പു പറഞ്ഞെങ്കിലും മോദിയുടെ അസാന്നിധ്യം സൗകര്യപൂര്‍വം മറന്നു കളഞ്ഞു’ ഖാര്‍ഗെ പറഞ്ഞു.

ഗുജറാത്തിലെ പോര്‍ബന്ദറില്‍ ഹെലികോപ്റ്റര്‍ തകര്‍ന്നു. മൂന്നുപേര്‍ മരിച്ചു. കോസ്റ്റ് ഗാര്‍ഡ് ഹെലികോപ്റ്റര്‍ ആണ് തകര്‍ന്നത്. പതിവ് പരിശീലന പറക്കലിനിടയാണ് അപകടം നടന്നത്. പൈലറ്റ് അടക്കം നാലുപേര്‍ ഹെലികോപ്റ്ററില്‍ ഉണ്ടായിരുന്നു. അപകടത്തിന് പിന്നിലെ കാരണം ഇതുവരെ അറിവായിട്ടില്ല, അന്വേഷണം ആരംഭിച്ചിട്ടുണ്ട്. ധ്രുവ് ഹെലികോപ്റ്റര്‍ അപകടത്തില്‍പ്പെടുമ്പോള്‍ പതിവ് യാത്രയിലായിരുന്നു.

കരസേനയും നാവികസേനയും വ്യോമസേനയും ചേര്‍ന്ന് പ്രവര്‍ത്തിപ്പിക്കുന്ന എഎല്‍എച്ച് ധ്രുവ് ഹെലികോപ്റ്ററില്‍ രണ്ട് വര്‍ഷം മുമ്പ് നിരവധി പിഴവുകള്‍ കണ്ടെത്തിയിരുന്നു. ചില ഘടകങ്ങളില്‍ രൂപകല്പന, മെറ്റലര്‍ജി പ്രശ്‌നങ്ങള്‍ ഉണ്ടായിരുന്നു.

ഇന്ത്യന്‍ നേവി, ഐഎഎഫ്, ആര്‍മി, കോസ്റ്റ് ഗാര്‍ഡ് എന്നിവയ്ക്ക് ആകെ 325 എഎല്‍എച്ച് ധ്രുവ് ഹെലികോപ്റ്ററുകള്‍ ഉണ്ട്, അവയെല്ലാം അപകട സംഭവങ്ങളെത്തുടര്‍ന്ന് സാങ്കേതിക പരിശോധനയ്ക്ക് വിധേയമാക്കിയിട്ടുണ്ട്.

യുപിയില്‍ യോഗി ആദിത്യനാഥിന്റെ നേതൃത്വത്തിലുള്ള ബി.ജെ.പി ഭരണത്തിന് കീഴില്‍ ഉത്തര്‍പ്രദേശില്‍ പ്രതിദിനം 50,000 പശുക്കളെ കശാപ്പ് ചെയ്യുന്നുണ്ടെന്ന ആരോപണവുമായി ബി.ജെ.പി എം.എല്‍.എ. ലോണി എം.എല്‍.എ നന്ദ് കിഷോറാണ് ഗുജറാണ് ആരോപണം ഉന്നയിച്ച് രംഗത്തെത്തിയത്.

നമ്മുടെ സര്‍ക്കാറിന് കീഴില്‍ പ്രതിദിനം 50,000 പശുക്കളെയാണ് കശാപ്പ് ചെയ്യുന്നത്. പശുക്ഷേമത്തിന് വേണ്ടിയുള്ള ഫണ്ട് ഉദ്യോഗസ്ഥര്‍ കൊള്ളയടിക്കുകയാണെന്നും അദ്ദേഹം ആരോപിച്ചു. എല്ലായിടത്തും കൊള്ളയാണ് നടക്കുന്നതെന്നും അദ്ദേഹം പറഞ്ഞു. ഗാസിയാബാദില്‍ മാധ്യമപ്രവര്‍ത്തകരോട് സംസാരിക്കുകയായിരുന്നു അദ്ദേഹം.

ഇക്കാര്യം മുഖ്യമന്ത്രി യോഗി ആദിത്യനാഥിന്റെ ശ്രദ്ധയില്‍പ്പെടുത്തണമെന്നും അദ്ദേഹം ആവശ്യപ്പെട്ടു. എം.എല്‍.എമാര്‍ക്ക് ഇക്കാര്യത്തില്‍ ആശങ്കയുണ്ട്. യോഗി ആദിത്യനാഥിന്റെ അനുവാദത്തോടെയാണോ ഇതെല്ലാം നടക്കുന്നതെന്നും ചിലര്‍ക്ക് സംശയമുണ്ട്. പൊലീസ് കോണ്‍സ്റ്റബിള്‍മാര്‍ കൈക്കൂലി വാങ്ങുന്നതിന്റെ വിഡിയോയും എം.എല്‍.എ പങ്കുവെച്ചിട്ടുണ്ട്.

അഴിമതിക്കാരായ ഈ ഉദ്യോഗസ്ഥര്‍ക്കെതിരെ നടപടിയെടുത്താല്‍ ബി.ജെ.പിക്ക് 403 സീറ്റുകളില്‍ 375 എണ്ണത്തില്‍ വിജയിക്കാനാവുമെന്ന് അദ്ദേഹം പറഞ്ഞു. അഴിമതി ഇനിയും വെച്ചുപൊറുപ്പിക്കാനാവില്ലെന്ന് അദ്ദേഹം കൂട്ടിച്ചേര്‍ത്തു. അതേസമയം, എം.എല്‍.എയുടെ വിഡിയോക്കെതിരെ വിമര്‍ശനവുമായി എസ്.പി അധ്യക്ഷന്‍ അഖിലേഷ് യാദവ് രംഗത്തെത്തി. ബി.ജെ.പിക്കുള്ളിലെ പോരാട്ടം മൂലം പൊതുജനക്ഷേമം അവഗണിക്കപ്പെടുകയാണെന്നും അദ്ദേഹം പറഞ്ഞു. അഴിമതിയുടെ വിഹിതം പറ്റുന്നതിന് വേണ്ടിയാണ് ഇത് നടക്കുന്നതെന്നും അദ്ദേഹം പറഞ്ഞു.