നോയിഡ: ഓഫീസിലെത്തിയ വയോധികനെ ഒരു മണിക്കൂര്‍ കാത്തുനിര്‍ത്തിയതിന് ഉദ്യോഗസ്ഥരെ നിര്‍ത്തി ജോലി ചെയ്യിച്ച് ശിക്ഷ നല്‍കി സിഇഓ. ഉത്തര്‍പ്രദേശിലെ നോയിഡ അതോറിറ്റിയുടെ കീഴിലുള്ള റസിഡന്‍ഷ്യല്‍ പ്ലോട്ട് ഡിപ്പാര്‍ട്ടുമെന്റ് ഓഫീസിലാണ് സംഭവം. സംഭവത്തിന്റെ ദൃശ്യങ്ങള്‍ സാമൂഹികമാധ്യമങ്ങളില്‍ പ്രചരിച്ചതോടെയാണ് വിഷയം പുറംലോകം അറിഞ്ഞത്. സി.ഇ.ഓ.യെ പിന്തുണച്ചും വിമര്‍ശിച്ചും സാമൂഹികമാധ്യമങ്ങളില്‍ ആളുകള്‍ രംഗത്തെത്തിയിട്ടുണ്ട്.

സ്ഥലമിടപാടമായി ബന്ധപ്പെട്ട് ദിവസേന ആയിരത്തോളം ആളുകള്‍ വന്നുപോകുന്നയിടമാണ് ഓഫീസിലെ സെക്ടര്‍ 6. ഇവിടെ ഉദ്യോഗസ്ഥര്‍ സ്ഥിരമായി ഇത്തരത്തില്‍ പെരുമാറുന്നത് ശ്രദ്ധയില്‍പെട്ടതിനെ തുടര്‍ന്നാണ് ഈ ശിക്ഷാ നടപടിയിലേക്ക് നീങ്ങിയതെന്ന് നോയിഡ അതോറിറ്റി സി.ഇ.ഓ. ലോകേഷ് എം. പറഞ്ഞു.

‘ഉദ്യോഗസ്ഥരുടെ നിരുത്തരവാദിത്തപരമായ സമീപനംകൊണ്ട് ഓഫീസില്‍ എത്തുന്നവര്‍ക്ക് വലിയ ബുദ്ധിമുട്ടുണ്ടാവുന്നുണ്ട്. അതിനെക്കുറിച്ച് വ്യാപകമായി പരാതികള്‍ കിട്ടിയതിന്റെ അടിസ്ഥാനത്തിലാണ് എല്ലാ ഓഫീസിലും സി.സി.ടി.വി. ഘടിപ്പിച്ചത്. അവയെല്ലാം ഞാന്‍ കൃത്യമായി പരിശോധിക്കുന്നുമുണ്ട്. അങ്ങനെയാണ് ഈ സംഭവം ശ്രദ്ധയില്‍പെട്ടത്. ആ വയസായ മനുഷ്യന്‍ ഒരുമണിക്കൂറില്‍ കൂടുതലായി അവിടെ നില്‍ക്കുന്നുണ്ടായിരുന്നു. ഉടന്‍തന്നെ ഓഫീസിലേക്ക് വിളിച്ച് അദ്ദേഹത്തിന്റെ പേപ്പറുകള്‍ എത്രയുംവേഗം ശരിയാക്കി നല്‍കാന്‍ ആവശ്യപ്പെട്ടു,’ ലോകേഷ് ഹിന്ദുസ്ഥാന്‍ ടൈംസിനോട് ഇങ്ങനെ പറഞ്ഞു.

‘പേപ്പര്‍ ശരിയാക്കണം എന്ന ആവശ്യം മാത്രമാണ് ഉദ്യോഗസ്ഥര്‍ മുഖവിലയ്‌ക്കെടുത്തത്, അല്ലാതെ മുന്നിലുള്ളവരോട് മനുഷ്യത്വത്തോടെ പെരുമാറണം എന്ന് അവര്‍ അപ്പോഴും മനസിലാക്കിയില്ല. ആ വൃദ്ധനോട് ഇരിക്കാന്‍ പോലും അവര്‍ ആവശ്യപ്പെട്ടില്ല. ഓഫീസിലെ ഉത്തരവാദിത്തപ്പെട്ട ഉദ്യോഗസ്ഥന്‍ പോലും ഇത് കണ്ടില്ലെന്ന് നടിച്ചിരിക്കുകയായിരുന്നു. ഉടന്‍ തന്നെ ഞാന്‍ ആ ഓഫീസിലെത്തി. അവര്‍ ചെയ്തതില്‍ തെറ്റില്ല എന്ന സമീപനം എടുത്തതോടെയാണ് ആ വൃദ്ധന്‍ അനുഭവിച്ച വിഷമം അവരും മനസിലാക്കണം എന്ന് ഞാന്‍ തീരുമാനിച്ചത്,’ ലോകേഷ് പറഞ്ഞു.

’20 മിനിറ്റ് എഴുന്നേറ്റ് നിന്ന് ജോലി ചെയ്താല്‍ മതിയെന്ന് ഞാന്‍ അവരോട് പറഞ്ഞു. ആ 20 മിനിറ്റ്, അവിടെ എത്തിയ പരാതിക്കാരോട് ഉദ്യോഗസ്ഥര്‍ സംസാരിച്ചതും പേപ്പര്‍ വര്‍ക്കുകള്‍ ചെയ്തതുമെല്ലാം എഴുന്നേറ്റ് നിന്നുകൊണ്ട് തന്നെയാണ്,’ ഇത്, ജനങ്ങളോടുള്ള അവരുടെ സമീപനത്തില്‍ ചെറിയ മാറ്റമെങ്കിലും വരുത്തുമെന്നാണ് പ്രതീക്ഷിക്കുന്നതെന്നും ലോകേഷ് പറഞ്ഞു. അതേസമയം, സി.ഇ.ഓ.യെ പ്രകീര്‍ത്തിച്ചും പരിഹസിച്ചും നിരവധി ആളുകള്‍ രംഗതതെത്തിയിട്ടുണ്ട്.

ഡല്‍ഹി: നീറ്റ് പരീക്ഷ ഓണ്‍ലൈന്‍ ആക്കാന്‍ ശിപാര്‍ശ. ദേശീയ പരീക്ഷ രംഗത്ത് സമൂലം മാറ്റം നിര്‍ദ്ദേശിച്ച കെ രാധാകൃഷ്ണന്‍ കമ്മിറ്റി റിപ്പോര്‍ട്ടിലാണ് ശിപാര്‍ശ നല്‍കിയത്. വിഷയത്തില്‍ ആരോഗ്യമന്ത്രാലയവുമായി ചര്‍ച്ച നടത്തും. എന്‍ടിഎയില്‍ സമൂല മാറ്റവും റിപ്പോര്‍ട്ടില്‍ സൂചിപ്പിച്ചിട്ടുണ്ട്. എന്‍ടിഎ ദേശീയതലത്തിലെ പ്രവേശന പരീക്ഷകള്‍ മാത്രം നടത്തണമെന്നാണ് നിര്‍ദേശം.

ചെന്നൈ: ചെന്നൈ വിമാനത്താവളത്തില്‍ 1.7 കിലോ സ്വര്‍ണം കസ്റ്റംസ് പിടികൂടി. ദുബൈ ചെന്നൈ എയര്‍ ഇന്ത്യ വിമാനത്തിലെ കാബിന്‍ ക്രൂവും യാത്രക്കാരനുമാണ് പിടിയിലായത്. കാബിന്‍ ക്രൂ അംഗത്തിന്റെ അടി വസ്ത്രത്തില്‍ ഒളിപ്പിച്ചാണ് സ്വര്‍ണ്ണം കടത്താന്‍ ശ്രമിച്ചത്.

ഞായറാഴ്ച പുലര്‍ച്ചെ വിമാനം ചെന്നൈയില്‍ ലാന്‍ഡ് ചെയ്തതിന് പിന്നാലെ കാബിന്‍ ക്രൂ അംഗത്തെ കസ്റ്റംസ് എയര്‍ ഇന്റലിജന്‍സ് യൂനിറ്റ് തടയുകയായിരുന്നു. തുടര്‍ന്ന് നടത്തിയ പരിശോദനയില്‍ പേസ്റ്റ് രൂപത്തിലാക്കിയ ഒരു കോടിയോളം രൂപ വിലമതിക്കുന്ന സ്വര്‍ണം അടി വസ്ത്രത്തില്‍ ഒളിപ്പിച്ച നിലയില്‍ കണ്ടെത്തുകയായിരുന്നു.

തുടര്‍ന്ന് നടത്തിയ ചോദ്യം ചെയ്യലിലാണ് അതേ വിമാനത്തിലുണ്ടായിരുന്ന ഒരു യാത്രക്കാരനാണ് സ്വര്‍ണം തനിക്ക് കൈമാറിയതെന്ന് കാബിന്‍ ക്രൂ അംഗം വെളിപ്പെടുത്തിയത്. രണ്ടു പേരെയും കസ്റ്റഡിയിലെടുത്തെങ്കിലും പേര് വിവരങ്ങള്‍ ഇതുവരെ പുറത്തിവിട്ടിട്ടില്ല.

എയര്‍പോര്‍ട്ടിലെ ഗ്രൗണ്ട് സ്റ്റാഫുകളെ ഉപയോഗിച്ചുള്ള സ്വര്‍ണ കടത്തിന് തടയിട്ടതോടെയാണ് കാബിന്‍ ക്രൂവിനെ ഉപയോഗപ്പെടുത്തിയുള്ള പുതിയ രീതിയെന്ന് അന്വേഷണ ഉദ്യോഗസ്ഥര്‍ പറയുന്നു. ഇത് തന്റെ ആദ്യത്തെ ശ്രമമാണെണ് കാബിന്‍ ക്രൂ അംഗം മൊഴി നല്‍കിയെങ്കിലും അന്വേഷണ ഉദ്യോഗസ്ഥര്‍ വിശ്വാസത്തിലെടുത്തില്ല.