മലപ്പുറം എടക്കര മൂത്തേടത്ത് കാട്ടാനയുടെ ആക്രമണത്തില്‍ മരിച്ച സരോജിനിയുടെ സംസ്‌കാരം ഇന്ന്. മഞ്ചേരി മെഡിക്കല്‍ കോളജിലെ പോസ്റ്റുമോര്‍ട്ടത്തിന് ശേഷം മൃതദേഹം നിലമ്പൂര്‍ താലൂക്ക് ആശുപത്രിയിലേക്ക് മാറ്റി. രാവിലെ എട്ടരയോടെ മൃതദേഹം ബന്ധുക്കള്‍ക്ക് വിട്ടുനല്‍കും.

ഇന്നലെ രാവിലെയാണ് ഉച്ചക്കുളം ഊരില്‍ നിന്ന് മാടിനെ മേയ്ക്കാന്‍ കാട്ടിലേക്ക് പോയ സരോജിനിയെ കാട്ടാന ആക്രമിക്കുന്നത്. തുടരെയുള്ള കാട്ടാന ആക്രമണത്തില്‍ പ്രതിഷേധിച്ച് ഇന്ന് നിലമ്പൂര്‍ നിയോജക മണ്ഡലത്തില്‍ എസ്ഡിപിഐ ഹര്‍ത്താല്‍ പ്രഖ്യാപിച്ചിരുന്നു. രാവിലെ ആറ് മുതല്‍ വൈകിട്ട് ആറുമണി വരെയാണ് ഹര്‍ത്താല്‍.

നെയ്യാറ്റിന്‍കര ഗോപന്‍ സ്വാമിയുടെ കല്ലറ ഉടന്‍ തുറന്ന് പരിശോധിക്കും. പ്രദേശത്ത് പൊലീസ് കനത്ത് സുരക്ഷ ഏര്‍പ്പെടുത്തി. അതിരാവിലെ തന്നെ ബന്ധപ്പെട്ട ഉദ്യോഗസ്ഥര്‍ സ്ഥലത്തെത്തി കല്ലറ പൊളിക്കാനുള്ള നടപടി ക്രമങ്ങള്‍ ആരംഭിച്ചു. അതേസമയം സ്ഥലത്ത് മാധ്യമങ്ങള്‍ക്ക് നിയന്ത്രണം ഏര്‍പ്പെടുത്തിയിട്ടുണ്ട്. മാധ്യമങ്ങള്‍ 200 മീറ്റര്‍ അകലെ നില്‍ക്കണമെന്നാണ് പോലിസ് നിര്‍ദേശം. സ്ഥലത്ത് 150ലധികം പൊലീസുകാരെയാണ് വിന്യസിച്ചിട്ടുള്ളത്.

ഉന്നത ഉദ്യോഗസ്ഥരും ഫോറന്‍സിക് സംഘവും എത്തിച്ചേരുന്നതോടെ കല്ലറ പൊളിക്കല്‍ ആരംഭിക്കും. ഉച്ചയ്ക്ക് മുമ്പ് നടപടിക്രമങ്ങള്‍ പൂര്‍ത്തിയാക്കാനാണ് ധാരണ. ആളുകളുടെ പ്രവേശനം നിരോധിച്ചിട്ടുണ്ട്. ആവശ്യമെങ്കില്‍ കുടുംബത്തെ കരുതല്‍ തടങ്കലില്‍ വെക്കാനും ചര്‍ച്ചയില്‍ ധാരണയായി.

കല്ലറ പൊളിക്കുന്നത് തടയണമെന്നാവശ്യപ്പെട്ട് കുടുംബം ഹൈക്കോടതിയില്‍ ഹര്‍ജി നല്‍കിയിരുന്നു. എന്നാല്‍ കഴിഞ്ഞ ദിവസം കോടതി അത് തള്ളി. ഈ സാഹചര്യത്തിലാണ് കല്ലറ പൊളിക്കാന്‍ തീരുമാനമായത്.

സമാധിയായെന്ന് കുടുംബം അവകാശപ്പെടുന്ന ഗോപന്റെ മരണസര്‍ട്ടിഫിക്കറ്റ് കോടതി ആവശ്യപ്പെട്ടിരുന്നു. മരണ സര്‍ട്ടിഫിക്കറ്റ് ഇല്ലെങ്കില്‍ അസ്വഭാവിക മരണമായി കണക്കാക്കേണ്ടിവരുമെന്നും കോടതി വ്യക്തമാക്കിയിരുന്നു. കല്ലറ തുറക്കുന്നത് അന്വേഷണത്തിന്റെ ഭാഗമാണെന്നും കോടതി പറഞ്ഞിരുന്നു. എഫ്ഐആര്‍ രജിസ്റ്റര്‍ ചെയ്യാനും കല്ലറ തുറക്കാനും പൊലീസിന് അധികാരമുണ്ടെന്നും കോടതി വ്യക്തമാക്കി.

ജനകീയ പ്രതിഷേധങ്ങൾക്ക് മുന്നിൽ ഇനിയും സർക്കാറിന് മുട്ട് മടക്കേണ്ടി വരുമെന്ന് മുസ്ലിംലീഗ് സംസ്ഥാന ജനറൽ സെക്രട്ടറി അഡ്വ. പി.എം.എ സലാം പറഞ്ഞു. വന നിയമ ഭേദഗതി ഉപേക്ഷിക്കാനുള്ള സർക്കാർ തീരുമാനത്തിൽ പ്രതികരിക്കുകയായിരുന്നു അദ്ദേഹം. കർഷകരുടെ ആശങ്കകൾ പരിഗണിക്കാതെ ഫോറസ്റ്റ് രാജ് നടപ്പാക്കാനുള്ള നീക്കമാണ് വന നിയമ ഭേദഗതിയിലൂടെ സർക്കാർ നടത്തിയത്. കാട്ടാന ആക്രമണത്തിൽ നിരന്തരം മനുഷ്യർ മരിക്കുകയും വന്യമൃഗങ്ങളുടെ ശല്യം കാരണം കോടിക്കണക്കിന് രൂപയുടെ കൃഷിഭൂമി നശിക്കുകയും ചെയ്യുന്ന സാഹചര്യത്തിൽ വീണ്ടും കർഷകരെയും സാധാരണക്കാരെയും ദ്രോഹിക്കുന്ന നിയമ ഭേദഗതിയിൽനിന്ന് പിന്തിരിയണമെന്ന് മുസ്ലിംലീഗും യു.ഡി.എഫും ആവശ്യപ്പെട്ടിരുന്നു. ജനകീയ പ്രതിഷേധത്തെ തുടർന്ന് നീക്കം ഉപേക്ഷിച്ചിരിക്കുകയാണ്.

ജനവിരുദ്ധ നിയമങ്ങൾ കൊണ്ടുവരികയും പ്രതിഷേധമുണ്ടാകുമ്പോൾ പിൻവലിക്കുകയും ചെയ്യുക എന്നത് സർക്കാർ പതിവാക്കിയിരിക്കുകയാണ്. വഖഫ് നിയമനങ്ങളുടെ വിഷയത്തിലും പ്ലസ് വൺ സീറ്റ്, സിൽവർ ലൈൻ തുടങ്ങിയ വിഷയങ്ങളിലും ഈ യൂ ടേൺ കണ്ടതാണ്. -പി.എം.എ സലാം പറഞ്ഞു. എല്ലാ നിയമവും മനുഷ്യരുടെ നിലനിൽപിനും പുരോഗതിക്കും വേണ്ടിയാണ് നിർമ്മിക്കേണ്ടത്. മനുഷ്യനെ ദ്രോഹിക്കാനുള്ള ഏത് നിയമത്തിനെതിരെയും പ്രതിഷേധം ഉയരുമെന്നും സർക്കാരിന് പിന്തിരിയേണ്ടി വരുമെന്നും അദ്ദേഹം കൂട്ടിച്ചേർത്തു.