കണ്ണൂര്‍ കൊട്ടിയൂരില്‍ അങ്കണവാടിയില്‍ രാജവെമ്പാല. ഒറ്റപ്ലാവ് ഈസ്റ്റിലെ അങ്കണവാടിയിലാണ് ഇന്നലെ വൈകീട്ട് രാജവെമ്പാലയെ കണ്ടത്. മഴ കാരണം കുട്ടികളെ നേരത്തെ വിട്ടിരുന്നു. ഹെല്‍പ്പര്‍ അടുക്കള വൃത്തിയാക്കുമ്പോള്‍ പാല്‍പ്പാത്രത്തിനടുത്ത് അനക്കം കണ്ട് നോക്കുമ്പോഴാണ് പാമ്പിനെ കണ്ടത്. ഉടന്‍ തന്നെ വിവരം വനംവകുപ്പിനെ അറിയിക്കുകയായിരുന്നു. വനം വകുപ്പ് എത്തി പാമ്പിനെ പിടികൂടി. കുട്ടികള്‍ ഇല്ലാതിരുന്നാല്‍ വലിയ അപകട സാഹചര്യമാണ് ഒഴിവായത്. സമാനമായ മറ്റൊരു സംഭവത്തില്‍ ദേശമംഗലത്ത് വീട്ടുമുറ്റത്ത് നിന്നും മലപാമ്പിനെ പിടികൂടി. ദേശമംഗലം തലശ്ശേരി തെക്കെ വയ്യാട്ട് കാവില്‍ നൗഫലിന്റെ വീട്ട് മുറ്റത്തെ ചെടികള്‍ക്കിടയിലാണ് 8 അടിയോളം നീളമുള്ള മലമ്പാമ്പിനെ കണ്ടത്.

നാട്ടുകാര്‍ പാമ്പിനെ പിടികൂടി ഫോറസ്റ്റ് സ്റ്റേഷനില്‍ ഏല്‍പ്പിച്ചു. ജൂലൈ രണ്ടാം വാരത്തില്‍ കണ്ണൂര്‍ കേളകത്തും കൊട്ടിയൂരിലുമായി രണ്ട് രാജവെമ്പാലകളെ പിടികൂടിയിരുന്നു. കേളകം പൂക്കുണ്ട് കോളനിക്കടുത്ത് റോഡില്‍ നിന്നാണ് ഒരു രാജവെമ്പാലയെ പിടികൂടിയത്. കൊട്ടിയൂര്‍ പന്നിയാംമലയിലെ പൊട്ടക്കിണറ്റിലാണ് ഒരു രാജവെമ്പാലയെ കണ്ടെത്തിയത്. കിണറ്റിലെ മാളത്തില്‍ കയറിയ രാജവെമ്പാലയെ മാളം പൊളിച്ച് പുറത്തെത്തിച്ച് പിടികൂടുകയായിരുന്നു.
പന്നിയാം മലയിലെ സ്വകാര്യ വ്യക്തിയുടെ പൊട്ടകിണറ്റിലും രാജവെമ്പാലയെ കണ്ടെത്തിയിരുന്നു. ഇതേ തുടര്‍ന്ന് വനപാലകരും റെസ്‌ക്യൂ ടീം അംഗങ്ങളും രാജവെമ്പാലയെ പിടികൂടാന്‍ ശ്രമിച്ചിരുന്നുവെങ്കിലും സാധിച്ചില്ല.

അടുത്ത ദിവസം രാവിലെ കിണറിനുള്ളിലെ മാലിന്യത്തിന് മുകളില്‍ പാമ്പ് കിടപ്പുണ്ടെന്ന വിവരം ലഭിച്ചതോടെ വനംവകുപ്പിലെ താല്കാലിക ജീവനക്കാരന്‍ ബിനോയ് കൂമ്പുങ്കല്‍, റെസ്‌ക്യൂ ടീം അംഗങ്ങളായ തോമസ്,ഫൈസല്‍ വിളക്കോട് എന്നിവര്‍ സ്ഥലത്തെത്തി. കമ്പുകള്‍ ഉപയോഗിച്ച് പാമ്പിനെ പുറത്തെത്തിക്കാന്‍ ശ്രമിച്ചുവെങ്കിലും പരാജയപ്പെട്ടു. ഇതിനിടെ പാമ്പ് കിണറ്റിലെ മാളത്തില്‍ കയറിയതോടെ റസ്‌ക്യൂ അംഗങ്ങള്‍ മാളം പൊളിച്ച് കമ്പുകള്‍ ഉപയോഗിച്ച് പാമ്പിനെ പുറത്തെത്തിച്ച് പിടികൂടുകയായിരുന്നു. കേളകം പഞ്ചായത്തില്‍ പൂക്കുണ്ട് കോളനിക്ക് സമീപം പാലത്തിങ്കല്‍ സാജന്റെ വീടിന് മുന്‍വശത്തെ റോഡില്‍ നിന്നാണ് രാജവെമ്പാലയെ പിടികൂടിയത്. മണത്തണ സെക്ഷന്‍ ഫോറസ്റ്റ് ഓഫീസര്‍ സി ആര്‍ മഹേഷിന്റെ നിര്‍ദ്ദേശത്തെ തുടര്‍ന്ന് റെസ്‌ക്യൂ അംഗം ഫൈസല്‍ വിളക്കോട്, വാച്ചര്‍ കുഞ്ഞുമോന്‍ കണിയാംഞ്ഞാലില്‍ എന്നിവര്‍ ചേര്‍ന്നാണ് പാമ്പിനെ പിടികൂടിയത്.