india

കോണ്‍ഗ്രസ് അധ്യക്ഷ തിരഞ്ഞെടുപ്പ്; പ്രചാരണത്തിന് തുടക്കം

ണ്‍ഗ്രസ് അധ്യക്ഷ സ്ഥാനത്തേക്കുള്ള തിരഞ്ഞെടുപ്പിന്റെ ചിത്രം തെളിഞ്ഞതിനു പിന്നാലെ പ്രചാരണത്തിന് തുടക്കം കുറിച്ച് നേതാക്കള്‍

Published

2 years ago

October 3, 2022

Test User

ന്യൂഡല്‍ഹി: കോണ്‍ഗ്രസ് അധ്യക്ഷ സ്ഥാനത്തേക്കുള്ള തിരഞ്ഞെടുപ്പിന്റെ ചിത്രം തെളിഞ്ഞതിനു പിന്നാലെ പ്രചാരണത്തിന് തുടക്കം കുറിച്ച് നേതാക്കള്‍. നേതാക്കളെ നേരില്‍ കണ്ടാണ് ശശി തരൂരും മല്ലി്കാര്‍ജുന ഖാര്‍ഗെയും വോട്ടഭ്യര്‍ത്ഥിക്കുന്നത്. ഡല്‍ഹിയിലെ പ്രതിനിധികളുമായാണ് ഖാര്‍ഗെ ഇന്നലെ കൂടിക്കാഴ്ചകള്‍ നടത്തിയത്. മഹാരാഷ്ട്രയിലായിരുന്നു തരൂരിന്റെ ഇന്നലത്തെ പ്രചാരണം. കോണ്‍ഗ്രസിലെ ജനാധിപത്യത്തിന്റെ വിജയമായാണ് തെരഞ്ഞെടുപ്പിനെ വ്യാഖ്യാനിക്കുന്നത്. ശശി തരൂരും ഖാര്‍ഗെയും തമ്മിലുള്ളത് ജനാധിപത്യ മൂല്യങ്ങള്‍ ഉയര്‍ത്തിപ്പിടിച്ചുള്ള പോരാട്ടമാണ്.

സംവാദത്തിന് താല്‍പര്യം പ്രകടിപ്പിച്ച് തരൂര്‍

ന്യൂഡല്‍ഹി: കോണ്‍ഗ്രസ് പ്രസിഡണ്ട് തിരഞ്ഞെടുപ്പിന് കളമൊരുങ്ങിയതിനു പിന്നാലെ മത്സര രംഗത്തുള്ള മുതിര്‍ന്ന നേതാവ് മല്ലികാര്‍ജ്ജനു ഖാര്‍ഗെയുമായി പരസ്യ സംവാദത്തിന് താല്‍പര്യം പ്രകടിപ്പിച്ച് ശശി തരൂര്‍ എം.പി. വാര്‍ത്താ ഏജന്‍സിയുമായി നടത്തിയ അഭിമുഖത്തിനിടെയാണ് അടുത്തിടെ നടന്ന ബ്രിട്ടീഷ് പ്രധാനമന്ത്രി തിരഞ്ഞെടുപ്പില്‍ സ്ഥാനാര്‍ത്ഥികള്‍ തമ്മില്‍ നടന്ന ടെലിവിഷന്‍ സംവാദത്തിന്റെ മാതൃക ആഗ്രഹിക്കുന്നതായി തരൂര്‍ പറഞ്ഞത്. പ്രസിഡണ്ട് സ്ഥാനത്തേക്ക് നടക്കുന്നത് സഹപ്രവര്‍ത്തകര്‍ക്കിടയിലെ സൗഹൃദ മത്സരമാണെന്ന തന്റെ മുന്‍ വാദം തരൂര്‍ ആവര്‍ത്തിക്കുകയും ചെയ്തു. ഗാന്ധി – നെഹ്‌റു കുടുംബത്തിന് കോ ണ്‍ഗ്രസ് പ്രവര്‍ത്തകരുടെ മനസ്സില്‍ പ്രത്യേക സ്ഥാനമുണ്ട്. അത് വൈകാരികമാണ്. വെല്ലുവിളികളെ അതിജീവിക്കാ ന്‍ കോണ്‍ഗ്രസില്‍ സമൂല മാറ്റം അനിവാര്യമാണ്. കാര്യക്ഷമമായ നേതൃത്വത്തിന്റെയും സംഘടനാ നവീകരണത്തിന്റെയും അപര്യാപ്തതയാണ പ്രധാന വെല്ലുവിളി.

കോണ്‍ഗ്രസിനെ പോലെ ഒരു വലിയ സംഘടനയെ നയിക്കാന്‍ കഴിയുമെന്ന് ആത്മവിശ്വാസമുണ്ടോ എന്ന ചോദ്യത്തിന്, വലിയ സംഘടനയെ നയിച്ച് തനിക്ക് അനുഭവ സമ്പത്തുണ്ടെന്നായിരുന്നു തരൂരിന്റെ മറുപടി. യു.എന്‍ അണ്ടര്‍ സെക്രട്ടറിയായിരുന്ന കാലത്ത് യു.എന്‍ പബ്ലിക് ഇന്‍ഫര്‍മേഷന്‍ വകുപ്പിന്റെ ചുമതല കൂടി വഹിച്ചിരുന്നു. ലോകത്തിന്റെ വിവിധ ഭാഗങ്ങളിലായി 77 ഓഫീസുകളും 800 ജീവനക്കാരുമുള്ള സംഘടനയാണിത്. ആള്‍ ഇന്ത്യാ പ്രഫഷണല്‍ കോണ്‍ഗ്രസ് സ്ഥാപിച്ചതും തന്റെ നേതൃത്വത്തിലായിരുന്നു. 20 സംസ്ഥാനങ്ങളിലായി 10,000ത്തിലധികം അംഗങ്ങളുണ്ടായിരുന്നു സംഘടനയിലെന്നും തരൂര്‍ കൂട്ടിച്ചേര്‍ത്തു.

ദളിത് നേതാവായല്ല,മത്സരിക്കുന്നത് കോണ്‍ഗ്രസ് നേതാവായി: ഖാര്‍ഗെ

ന്യൂഡല്‍ഹി; കോണ്‍ഗ്രസ് അധ്യക്ഷ സ്ഥാനത്തേക്കുള്ള തിരഞ്ഞെടുപ്പില്‍ ദളിത് നേതാവായി മാത്രമല്ല, കോണ്‍ഗ്രസ് നേതാവായി തന്നെയാണ് മത്സരിക്കുന്നതെന്ന് മല്ലികാര്‍ജ്ജുന ഖാര്‍ഗെ. മുതിര്‍ന്ന പാര്‍ട്ടി നേതാക്കളുടെ സമ്മര്‍ദ്ദത്തെതുടര്‍ന്നാണ് താന്‍ മത്സര രംഗത്തെത്തിയതെന്നും ഖാര്‍ഗെ പറഞ്ഞു. ഡല്‍ഹിയില്‍ മാധ്യമങ്ങളോട് സംസാരിക്കുകയായിരുന്നു അദ്ദേഹം.

സോണിയാ ഗാന്ധി, രാഹുല്‍ഗാന്ധി, പ്രിയങ്കാ ഗാന്ധി എന്നിവര്‍ മത്സരിക്കില്ലെന്ന് തീര്‍ത്തു പറഞ്ഞ സാഹചര്യത്തിലാണ് മുതിര്‍ന്ന നേതാക്കള്‍ മത്സരിക്കണമെന്ന ആവശ്യം പാര്‍ട്ടിയില്‍ ഉയര്‍ന്നത്. ഇതിന്റെ തുടര്‍ച്ചയായാണ് തന്നിലേക്ക് ഈ ദൗത്യം എത്തിയത്. ഏതെങ്കിലും വ്യക്തിക്ക് എതിരെയല്ല ഈ പോരാട്ടം, കോണ്‍ഗ്രസ് മുന്നോട്ടുവെക്കുന്ന ആശയങ്ങള്‍ക്കു വേണ്ടിയാണ്. താന്‍ പ്രസിഡണ്ട് സ്ഥാനത്തെത്തിയാല്‍ നിലവിലുള്ള അവസ്ഥ തുടരുമോ മാറ്റം വരുമോ എന്ന് തീരുമാനിക്കേണ്ടത് കോണ്‍ഗ്രസ് പ്രതിനിധികളാണ്. ഒരു വ്യക്തിയല്ല തീരുമാനം എടുക്കേണ്ടത്. എല്ലാവരോടും കൂടിയാലോചിച്ച് തീരുമാനം എടുക്കുന്നതാണ് തന്റെ ശൈലിയെന്നും ഖാര്‍ഗെ കൂട്ടിച്ചേര്‍ത്തു. മഹാത്മാഗാന്ധിയുടേയും ലാല്‍ ബഹദൂര്‍ ശാസ്ത്രിയുടേയും ജന്മദിനത്തിലാണ് താനീ പോരാട്ടത്തിന് തുടക്കം കുറിക്കുന്നത്. ഞാന്‍ ഉയര്‍ത്തിപ്പിടിച്ചിട്ടുള്ള ആശയങ്ങള്‍ക്കും മൂല്യങ്ങള്‍ക്കു വേണ്ടി എല്ലാ കാലത്തും പോരാടിയിട്ടുണ്ട്. അതിന്റെ തുടര്‍ച്ച തന്നെയാണീ പോരാട്ടവും. ചില മൂല്യങ്ങളും ആശയങ്ങളും മുന്നോട്ടു കൊണ്ടുപോകാന്‍ കൂടിയാണ് ഈ പോരാട്ടമെന്നും ഖാര്‍ഗെ പറഞ്ഞു.മാധ്യമങ്ങളുടെ ചോദ്യത്തിന് മറുപടി നല്‍കവെയാണ്, ദളിത് നേതാവായി മാത്രമല്ല, കോണ്‍ഗ്രസ് നേതാവായി തന്നെയാണ് മത്സരിക്കുന്നതെന്ന് ഖാര്‍ഗെ പറഞ്ഞത്.

ഈ മാസം 17നാണ് കോണ്‍ഗ്രസ് പ്രസിഡണ്ട് തിരഞ്ഞെടുപ്പ് നടക്കുന്നത്. 19നാണ് വോട്ടെണ്ണല്‍. 29 സംസ്ഥാനങ്ങളിലേയും ഒമ്പത് കേന്ദ്ര ഭരണ പ്രദേശങ്ങളിലേയും ഡി.സി.സി ഭാരവാഹികള്‍ തൊട്ട് മുകളിലേക്കുള്ള 9000 കോണ്‍ഗ്രസ് നേതാക്കള്‍ക്കാണ് തിരഞ്ഞെടുപ്പില്‍ വോട്ടവകാശമുള്ളത്.

crime

കുഴല്‍ക്കിണര്‍ തര്‍ക്കത്തെ തുടര്‍ന്ന് മധ്യപ്രദേശില്‍ പഞ്ചായത്ത് പ്രസിഡന്റും കുടുംബവും ദളിത് യുവാവിനെ അടിച്ചുകൊന്നു

ഗ്രാമത്തിലെ സർപഞ്ചും കുടുംബവും ചേർന്നാണ് ആക്രമണം നടത്തിയത്.

Published

23 hours ago

November 27, 2024

webdesk13

കുഴൽക്കിണറുമായി ബന്ധപ്പെട്ട തർക്കവുമായി ബന്ധപ്പെട്ട് മധ്യപ്രദേശിൽ പഞ്ചായത്ത് പ്രസിഡന്റും കുടുംബവും ദളിത് യുവാവിനെ അടിച്ച് കൊന്നതായി റിപ്പോർട്ട്. മധ്യപ്രദേശിലെ ശിവപുരി ജില്ലയിലാണ് 30 കാരനെ വടിയും ഉപയോഗിച്ച് മർദിച്ച് കൊലപ്പെടുത്തിയത്. ഇരയായ നാരദ് ജാതവ് ചൊവ്വാഴ്ച വൈകുന്നേരം ഇൻദർഗഢ് ഗ്രാമത്തിലെ മാതൃസഹോദരൻ്റെ വീട് സന്ദർശിക്കാൻ എത്തിയതായിരുന്നു.

ഗ്രാമത്തിലെ സർപഞ്ചും കുടുംബവും ചേർന്നാണ് ആക്രമണം നടത്തിയത്. കുഴൽക്കിണറിന്റെയും വീട്ടിലേക്കുള്ള വഴിയുടെയും പേരിലാണ് ആക്രമണം നടത്തിയതെന്ന് പൊലീസ് പറഞ്ഞു.

വൈകുന്നേരം 4 മണിയോടെ കുഴൽക്കിണർ പൈപ്പ് ലൈനുമായി ബന്ധപ്പെട്ട് വഴക്കുണ്ടാവുകയായിരുന്നു. പൈപ്പ് നാരദ് നീക്കം ചെയ്തതിനെ ചൊല്ലിയുണ്ടായ തർക്കം പ്രതികളുമായി വാക്കേറ്റത്തിലേക്ക് നയിച്ചു. തുടർന്ന് സർപഞ്ച് പദം ധക്കാട്, സഹോദരൻ മോഹർ പാൽ ധക്കാട്, മകൻ അങ്കേഷ് ധക്കാട്, മറ്റ് കുടുംബാംഗങ്ങൾ എന്നിവർ നാരദിനെ വളഞ്ഞിട്ട് ആക്രമിക്കാൻ ആക്രമിക്കുകയായിരുന്നു. നാരദ് മരണത്തിന് കീഴടങ്ങുന്നത് വരെ അക്രമികൾ മർദിച്ചുവെന്ന് ദൃക്‌സാക്ഷികൾ പറഞ്ഞു.

ജാതവിന്റെ കൊലപാതകം ആസൂത്രിതമാണെന്ന് കുടുംബം ആരോപിച്ചു. വർഷങ്ങളായി ഇരു കുടുംബങ്ങൾ തമ്മിൽ തർക്കമുണ്ടെന്നും ഇതിന് പിന്നാലെയാണ് ജാതവിന്റെ കൊലപാതകമെന്നും കുടുംബം പറഞ്ഞു. സംഭവത്തിൻ്റെ ഒരു വീഡിയോ ബുധനാഴ്ച വൈറലായിരുന്നു. ഒന്നിലധികം ആളുകൾ ജാതവിനെ ആവർത്തിച്ച് ആക്രമിക്കുന്നത് വീഡിയോയിൽ കാണാം. ജാതവിന്റെ മൃതദേഹം പോസ്റ്റ്‌മോർട്ടത്തിനായി ജില്ലാ മെഡിക്കൽ കോളേജിലേക്ക് കൊണ്ടുപോയി.

കൊലപാതകം പുറത്തുവന്നതിന് പിന്നാലെ, ബി.ജെ.പി സംസ്ഥാനത്തെ നിയമലംഘനത്തിലേക്ക് തള്ളിവിട്ടെന്ന് കോൺഗ്രസ് ഭരണകക്ഷിയായ ബി.ജെ.പിയെ കടന്നാക്രമിച്ചു. ‘ഒരു വശത്ത് രാജ്യം മുഴുവൻ ഭരണഘടനാ ദിനം ആഘോഷിക്കുന്നു, ജനങ്ങൾ ബാബാ സാഹിബ് അംബേദ്കറുടെ ആശയങ്ങളെക്കുറിച്ച് സംസാരിക്കുന്നു, മറുവശത്ത്, ബിജെപി ഭരണത്തിന് കീഴിൽ ഒരു ദളിത് സഹോദരനെ തല്ലിക്കൊന്നു,’ കോൺഗ്രസ് പറഞ്ഞു.

india

രാജ്യ തലസ്ഥാനത്തെ സ്‌കൂളില്‍ മുസ്‌ലിം, ദലിത് വിദ്യാര്‍ഥികളെ നഗ്നരാക്കി മര്‍ദിച്ച് ജയ്ശ്രീറാം വിളിപ്പിച്ചതായി പരാതി

ഇങ്ങനെ മര്‍ദനം നേരിട്ട വിദ്യാര്‍ഥികളില്‍ പലരും ആത്മഹത്യയുടെ വക്കിലാണെന്നും അഗര്‍വാള്‍ ചൂണ്ടിക്കാട്ടുന്നു

Published

24 hours ago

November 27, 2024

webdesk13

ഡല്‍ഹിയിലെ നന്ദ് നഗ്രിയിലെ സര്‍വോദയ ബാല വിദ്യാലയത്തില്‍ മുസ്‌ലിം, ദലിത് വിദ്യാര്‍ഥികള്‍ക്കു നേരെ കടുത്ത വംശീയാതിക്രമം നടക്കുന്നതായി പരാതി. ഡല്‍ഹിയിലെ അഭിഭാഷകനും വിദ്യാഭ്യാസ പ്രവര്‍ത്തകനുമായ അശോക് അഗര്‍വാളാണ് ഇതുസംബന്ധിച്ച് നവംബര്‍ 13ന് ഡല്‍ഹി മുഖ്യമന്ത്രി അതിഷി മര്‍ലേനയടക്കമുള്ള ഉന്നതര്‍ക്ക് പരാതി നല്‍കിയത്. മുസ്‌ലിം, ദലിത് വിദ്യാര്‍ഥികളെ ബാത്‌റൂമിലേക്ക് കൊണ്ടുപോയി വസ്ത്രങ്ങളുരിഞ്ഞ് ക്രൂരമായി മര്‍ദിച്ചതായും നിര്‍ബന്ധിപ്പിച്ച് ജയ് ശ്രീറാം വിളിപ്പിച്ചതായും പരാതിയിലുണ്ട്. ഇങ്ങനെ മര്‍ദനം നേരിട്ട വിദ്യാര്‍ഥികളില്‍ പലരും ആത്മഹത്യയുടെ വക്കിലാണെന്നും അഗര്‍വാള്‍ ചൂണ്ടിക്കാട്ടുന്നു. ദ വയര്‍ ആണ് ഇതു സംബന്ധിച്ച വാര്‍ത്ത റിപ്പോര്‍ട്ട് ചെയ്തത്.

സ്‌കൂളിലെ അധ്യാപകരായ ആദര്‍ശ് വര്‍മ, വികാസ് കുമാര്‍ എന്നിവര്‍ ചേര്‍ന്നാണ് മുസ്‌ലിം വിദ്യാര്‍ഥികള്‍ക്കു നേരെ അതിക്രമം നടത്തുന്നതും നിര്‍ബന്ധിച്ച് ജയ് ശ്രീറാം വിളിപ്പിക്കുന്നതുമെന്നും അഗര്‍വാള്‍ പറഞ്ഞു.

നിരവധി വിദ്യാര്‍ഥികള്‍ പരാതിയുമായി വന്നതോടെയാണ് അഗര്‍വാള്‍ മുഖ്യമന്ത്രിക്കും ഡല്‍ഹി ലഫ്. ഗവര്‍ണര്‍ക്കും ഡല്‍ഹി വിദ്യാഭ്യാസ മന്ത്രിക്കും ഇതുസംബന്ധിച്ച് തുറന്ന കത്തെഴുതിയത്. ജീവന് തന്നെ അപകടമുള്ളതിനാല്‍ പരാതി പറഞ്ഞിരിക്കുന്ന വിദ്യാര്‍ഥികളാരും അവരുടെ വ്യക്തിത്വം വെളിപ്പെടുത്തിയിട്ടില്ല. പൊളിറ്റിക്കല്‍ സയന്‍സ് പഠിപ്പിക്കുന്ന ആദര്‍ശ് ശര്‍മയും പി.ടി അധ്യാപകനായ വികാസ് കുമാറും സ്‌കൂള്‍ ടോയ്‌ലറ്റില്‍ കൊണ്ടുപോയി നിര്‍ബന്ധിച്ച് കുട്ടികളുടെ വസ്ത്രമുരിയുന്നു. നഗ്‌ന വിഡിയോ എടുക്കുമെന്നും അത് പ്രചരിപ്പിക്കുമെന്നും അവര്‍ ഭീഷണിപ്പെടുത്തിയതോടെയാണ് അതിക്രമങ്ങള്‍ പുറത്തുപറയാന്‍ കുട്ടികള്‍ ഭയന്നത്.

പത്താംക്ലാസിലെയും പ്ലസ്ടുവിലെയും മുസ്‌ലിം, ദലിത് വിദ്യാര്‍ഥികളെയാണ് ഇവര്‍ ലക്ഷ്യമിട്ടിരിക്കുന്നത്. ഈ വിദ്യാര്‍ഥികളെ എപ്പോഴും ക്ലാസിലെ പിന്‍സീറ്റിലാണ് ഇരുത്താറുള്ളത്. മുന്‍നിരജാതിക്കാരായ വിദ്യാര്‍ഥികളാണ് മുന്‍സീറ്റില്‍ ഇരിപ്പിടം ലഭിക്കാറുള്ളത്. ഇത്രയും നീചമായ വിവേചനം കാണിക്കുന്ന അധ്യാപകരെ സ്‌കൂളില്‍ നിന്ന് പുറത്താക്കണമെന്നാണ് ആവശ്യം. മാത്രമല്ല, ഡല്‍ഹിയിലെ ഒരുന്നതനും തന്നെ തടയാനാകില്ലെന്നും ശര്‍മ വിദ്യാര്‍ഥികളെ ഭീഷണിപ്പെടുത്തിയിട്ടുണ്ട്. അതിനാല്‍ പരാതി കൊടുത്തിട്ടും കാര്യമുണ്ടാകില്ലെന്നും പറഞ്ഞു. വിദ്യാര്‍ഥികളെ തോല്‍പിക്കുമെന്നും ശര്‍മ ഭീഷണിപ്പെടുത്തി.

ദലിത്, മുസ്‌ലിം വിദ്യാര്‍ഥികളെ ജാതീയമായി നിരന്തരം അധിക്ഷേപിക്കുന്നതും അധ്യാപകരുടെ പതിവാണ്. ദലിത് വിഭാഗക്കാരായ വിദ്യാര്‍ഥികള്‍ തൊഴിലാളികളുടെ മക്കളാണെന്നും ഉന്നതജാതിക്കാരെ സേവിക്കുകയാണ് അവരുടെ ജോലിയെന്നും പറയുകയുണ്ടായി. എന്തുകൊണ്ടാണ് മുല്ലമാര്‍ നമ്മുടെ രാജ്യം വിട്ട് പോകാത്തത് എന്നാണ് മുസ്‌ലിം വിദ്യാര്‍ഥികളെ അധിക്ഷേപിച്ച് പറയാറുള്ളത്. പഠിപ്പിക്കുന്നതിനിടെ നിരക്ഷരരും താഴ്ന്ന ജാതിക്കാരും മൃഗങ്ങളും സ്ത്രീകളും മര്‍ദിക്കപ്പെടേണ്ടവരാണെന്ന തുളസീദാസിന്റെ കുപ്രസിദ്ധമായ വാചകങ്ങളും ആദര്‍ശ് ഇടക്കിടെ ഉപയോഗിക്കാറുണ്ടെന്നും വിദ്യാര്‍ഥികള്‍ പറയുന്നു.

2023ല്‍ ഇതു സംബന്ധിച്ച് പരാതി നല്‍കാന്‍ വിദ്യാര്‍ഥികളുടെ സംഘടനയായ കലക്ടീവ് സ്റ്റുഡന്‍സ് ശ്രമം നടത്തിയിരുന്നു. നമസ്‌തെ എന്നതിനു പകരം വിദ്യാര്‍ഥികളെ ജയ് ശ്രീറാം വിളിപ്പിക്കാന്‍ ശര്‍മ ശ്രമിച്ചതിനു പിന്നാലെയായിരുന്നു അത്. പരാതിക്കു ശേഷം മറ്റൊരു സര്‍ക്കാര്‍ സ്‌കൂളിലെ പ്രിന്‍സിപ്പല്‍ അന്വേഷണം നടത്തി. പരാതി ഇല്ലാതാക്കാനും വിദ്യാര്‍ഥികളെ നിശ്ശബ്ദരാക്കാനും മാത്രമേ ആ അന്വേഷണം കൊണ്ട് സാധിച്ചുള്ളൂ.

ഈ അധ്യാപകര്‍ പഠിപ്പിക്കാനായി പലപ്പോഴും ക്ലാസുകളില്‍ വരാറില്ലെന്നും സി.സി.ടി.വി ദൃശ്യങ്ങള്‍ പരിശോധിച്ചാല്‍ ഇക്കാര്യം വ്യക്തമാകുമെന്നും പരാതിയിലുണ്ട്. കത്തിനെ കുറിച്ച് ഉന്നത തലത്തിലുള്ള വിശദമായ അന്വേഷണം വേണമെന്നാണ് അഗര്‍വാള്‍ മുഖ്യമന്ത്രിയോട് അഭ്യര്‍ഥിച്ചത്. സ്‌കൂളിലെ 2500 വിദ്യാര്‍ഥികളില്‍ പകുതിയിലേറെയും മുസ്‌ലിം, പിന്നാക്ക വിഭാഗങ്ങളില്‍ നിന്നുള്ളവരാണ്. ഇവര്‍ക്ക് മറ്റ് സ്‌കൂളുകളിലേക്ക് ട്രാന്‍സ്ഫറും ലഭിക്കാറില്ല.

india

സംഭാലിലേക്ക് പുറപ്പെട്ട മുസ്‌ലിം ലീഗ് എം.പിമാരെ തടഞ്ഞ് യോഗി ആദിത്യനാഥിന്റെ പൊലീസ്

ഗാസിയാബാദില്‍ വെച്ചാണ് എം.പിമാരെ യു.പി പൊലീസ് തടഞ്ഞത്. ഇവിടെ നിന്ന് രണ്ട് ജില്ലകള്‍ കൂടി പിന്നിട്ടു വേണം സംഭലിലെത്താന്‍.

Published

1 day ago

November 27, 2024

webdesk13

ഉത്തര്‍പ്രദേശിലെ സംഘര്‍ബാധിത മേഖലയായ സംഭലിലേക്ക് പോകാന്‍ ശ്രമിച്ച മുസ്‌ലിം ലീഗ് എം.പിമാരെ തടഞ്ഞ് യോഗി ആദിത്യനാഥിന്റെ പൊലീസ്. ഗാസിയാബാദില്‍ വെച്ചാണ് എം.പിമാരെ യു.പി പൊലീസ് തടഞ്ഞത്. ഇവിടെ നിന്ന് രണ്ട് ജില്ലകള്‍ കൂടി പിന്നിട്ടു വേണം സംഭലിലെത്താന്‍.

എന്നാല്‍ സംഭലില്‍ നിന്ന് 130 കിലോമീറ്റര്‍ അകലെയുള്ള ഗാസിയാബാദ് ജില്ലയിലെ സജ്ജരാസി ടോള്‍ പ്ലാസയില്‍ വെച്ചു തന്നെ എം.പിമാരെ പൊലീസ് സന്നാഹം തടയുകയായിരുന്നു. ജനാധിപത്യപരമായിട്ട് കാര്യങ്ങള്‍ അറിയാനുള്ള പാര്‍ലമെന്റ് അംഗങ്ങളുടെ സ്വാതന്ത്രത്തെ തടഞ്ഞുകൊണ്ട് യു.പിയില്‍ യോഗി ആദിത്യനാഥിന്റെ സര്‍ക്കാരിന്റെ ഭീകരത പൊലീസിലൂടെ തെളിഞ്ഞു.

രണ്ടുവാഹനങ്ങളിലായാണ് എം.പിമാരുടെ സംഘം സംഭലിലേക്ക് പുറപ്പെട്ടത്. ഇ.ടി. മുഹമ്മദ് ബഷീര്‍, അബ്ദുസ്സമദ് സമദാനി, ഹാരിസ് ബീരാന്‍, നവാസ് ഗനി, പി.വി. അബ്ദുൽ വഹാബ് എന്നീ എം.പിമാരാണ് സംഘത്തിലുണ്ടായിരുന്നത്. സംഘര്‍ഷ മേഖലയായതിനാല്‍ പോകാന്‍ അനുവാദം തരാന്‍ സാധിക്കില്ലെന്നാണ് എം.പിമാരോട് പൊലീസ് പറഞ്ഞത്. അതേസമയം, തടഞ്ഞത് തെറ്റായ നടപടിയാണെന്നും പൊലീസുമായി സംഘര്‍ഷത്തിനില്ലെന്നും ഇ.ടി. മുഹമ്മദ് ബഷീര്‍ എം.പി വ്യക്തമാക്കി.