സംസ്ഥാന സ്‌കൂള്‍ കായിക മേളയില്‍ ഓവറോള്‍ ചാമ്പ്യന്‍മാരായി തിരുവനന്തപുരം. 1935 പോയിന്റ് നേടിയാണ് തിരുവനന്തപുരം ഒന്നാം സ്ഥാനത്തെത്തിയത്. 848 പോയിന്റുകള്‍ നേടി തൃശൂര്‍ ജില്ലയാണ് രണ്ടാം സ്ഥാനം നേടിയത്. 824 പോയിന്റുമായി മലപ്പുറം മൂന്നാം സ്ഥാനത്തിന് അര്‍ഹരായി.

എന്നാല്‍ അത്ലറ്റിക്സില്‍ മലപ്പുറം ജില്ലയാണ് ചാമ്പ്യന്മാര്‍. മലപ്പുറം അത്‌ലറ്റിക്‌സില്‍ കിരീടം നേടുന്നത് ചരിത്രത്തില്‍ ആദ്യമായാണ്.

നേരത്തെ, ഗെയിംസ് വിഭാഗത്തില്‍ 1,213 പോയിന്റുമായി തിരുവനന്തപുരം കിരീടം നേടിയിരുന്നു. മേളയിലെ അത്‌ലറ്റിക്‌സ് ആന്‍ഡ് ഗെയിംസ് വിഭാഗങ്ങളില്‍ തിരുവനന്തപുരം ജില്ല മറ്റ് ജില്ലകളെ അപേക്ഷിച്ച് ബഹുദൂരം മുമ്പിലായിരുന്നു.

എറണാകുളം മഹാരാജാസ് ഗ്രൗണ്ടില്‍ വൈകിട്ട് നാലിന് മുഖ്യമന്ത്രി പിണറായി വിജയന്‍ സമാപന സമ്മേളനം ഉദ്ഘാടനം ചെയ്യും. മന്ത്രി വി ശിവന്‍ കുട്ടി അധ്യക്ഷനാകും. നടന്‍ വിനായകന്‍, ഫുട്ബോള്‍ താരം ഐഎം വിജയന്‍ എന്നിവര്‍ പങ്കെടുക്കും.

വഖഫ് വിവാദ പരാമര്‍ശം സംബന്ധിച്ചുള്ള ചോദ്യം ചോദിച്ചത് ഇഷ്ടപ്പെടാത്തതിനാല്‍ മാധ്യമപ്രവര്‍ത്തകനെ ഭീഷണിപ്പെടുത്തി കേന്ദ്രമന്ത്രി സുരേഷ് ഗോപി. 24  ന്യൂസ് മാധ്യമപ്രവര്‍ത്തകനായ അലക്‌സ് റാം മുഹമ്മദിനെയാണ് സുരേഷ് ഗോപി റൂമില്‍ വിളിച്ചുവരുത്തി ഭീഷണിപ്പെടുത്തിയത്.

വഖഫ് കിരാത പരാമര്‍ശത്തില്‍ ചോദ്യം ചോദിച്ചതിനാണ് സുരേഷ് ഗോപി മാധ്യമപ്രവര്‍ത്തകനെ ഭീഷണിപ്പെടുത്തിയത്. ശേഷം മാധ്യമപ്രവര്‍ത്തകനെ ഒറ്റയ്ക്ക് മുറിയിലേക്ക് വിളിച്ചുവരുത്തിയ സുരേഷ് ഗോപി ചോദ്യത്തിന് ഉത്തരം നല്‍കാന്‍ സൗകര്യമില്ലെന്നും കാണിച്ചുതരാമെന്നും പറഞ്ഞു. ഇവ വീഡിയോയില്‍ പകര്‍ത്താന്‍ സുരേഷ് ഗോപിയുടെ ഗണ്‍മാന്‍ ശ്രമിക്കുകയും ചെയ്തു.

വയനാട്ടിലെ തെരഞ്ഞെടുപ്പ് റാലിക്കിടെയാണ് വഖഫ് വിവാദ പരാമര്‍ശം സുരേഷ് ഗോപി നടത്തിയത്. ഒരു ബോര്‍ഡ് പ്രവര്‍ത്തിക്കുന്നുണ്ട്, അതിന്റെ പേര് പറയാന്‍ ആഗ്രഹിക്കുന്നില്ല നാല് ആംഗലേയ ഭാഷയില്‍ ഒതുങ്ങുന്ന ഒരു കിരാതമുണ്ട്’ എന്നായിരുന്നു സുരേഷ് ഗോപിയുടെ വിവാദ പ്രസ്താവന. തങ്ങള്‍ക്ക് മുനമ്പത്തെ സുഖിപ്പിച്ച് ഒന്നും നേടേണ്ട. അമിത് ഷാ അയച്ച ഒരു വീഡിയോ ഇവിടെ പ്രചരിപ്പിക്കുമെന്നുമായിരുന്നു സുരേഷ് ഗോപി വിവാദ പരാമര്‍ശം നടത്തിയത്.

രാഷ്ട്രീയത്തില്‍ സ്‌നേഹം എന്ന വാക്കിന് ഏറെ സ്ഥാനമുണ്ടെന്ന് വയനാട് തന്നെ പഠിപ്പിച്ചുവെന്ന് രാഹുല്‍ ഗാന്ധി പറഞ്ഞു. വെറുപ്പിനെ അതിജീവിക്കാനുള്ള ആയുധമാണ് സ്നേഹമാണെന്ന് വയനാട്ടിലെത്തിയതിന് ശേഷമാണ് തനിക്ക് മനസിലായതെന്നും അദ്ദേഹം പറഞ്ഞു.
വയനാട്ടിലെത്തിയപ്പോള്‍ ആളുകള്‍ തന്നെ കെട്ടിപ്പിടിക്കുകയും ചുംബിക്കുകയും സ്‌നേഹിക്കുന്നുവെന്ന് പറയുകയും ചെയ്യുന്നുവെന്ന് സുല്‍ത്താന്‍ ബത്തേരിയില്‍ റോഡ് ഷോയില്‍ സംസാരിക്കവെ രാഹുല്‍ പറഞ്ഞു.

വയനാടിന്റെ സ്നേഹത്തിന് നന്ദി പറഞ്ഞ് പ്രിയങ്ക ഗാന്ധി. താന്‍ ഉടന്‍ മടങ്ങിയെത്തുമെന്ന് മലയാളത്തില്‍ വോട്ടര്‍മാര്‍ക്ക് ഉറപ്പ് നല്‍കിയതോടെ റോഡ്ഷോ കാണാനെത്തിയ പതിനായിരങ്ങള്‍ ആര്‍പ്പുവിളിച്ചു. ഐ ലവ് വയനാട് എന്ന് എഴുതിയ ടീ ഷര്‍ട്ട് ധരിച്ചാണ് രാഹുല്‍ ഗാന്ധി ചടങ്ങില്‍ പങ്കെടുത്തത്. ഉപതെരഞ്ഞെടുപ്പ് പ്രചാരണം അവസാനിക്കുന്നതിന് മണിക്കൂറുകള്‍ക്ക് മുമ്പ് സുല്‍ത്താന്‍ ബത്തേരിയില്‍ നടന്ന റോഡ്‌ഷോയിലാണ് രാഹുലും പ്രിയങ്കയും സംസാരിച്ചത്.

ഇന്ന് വൈകീട്ട് തിരുവമ്പാടിയില്‍ നടക്കുന്ന പ്രിയങ്ക ഗാന്ധിയുടെ തെരഞ്ഞെടുപ്പ് കൊട്ടിക്കലാശത്തിലും രാഹുല്‍ ഗാന്ധി പങ്കെടുക്കും. റോഡ് ഷോയില്‍ കോണ്‍ഗ്രസിന്റെയും ലീഗിന്റെയും മറ്റു യു.ഡി.എഫ് ഘടകകക്ഷികളുടെയും പതാകകളുമായി നൂറുകണക്കിന് പ്രവര്‍ത്തകര്‍ പങ്കെടുത്തു.