നെയ്യാറ്റിന്‍കര ഗോപന്‍ സ്വാമിയുടെ പോസ്റ്റുമോര്‍ട്ടം കഴിഞ്ഞു. ഉടന്‍ മൃതദേഹം പുറത്തേക്ക് കൊണ്ടുവരും. മൃതദേഹം ബന്ധുക്കള്‍ക്ക് വിട്ടുനല്‍കും. മൃതദേഹവുമായി ബന്ധുക്കള്‍ നെയ്യാറ്റിന്‍കര ആറലുംമൂട്ടിലെ വീട്ടിലേക്ക് പോകും.

ഇന്ന് രാവിലെയാണ് വിവാദമായ ഗോപന്‍ സ്വാമിയുടെ കല്ലറ തുറന്നത്. സംഭവസ്ഥലത്ത് പൊലീസ് കനത്ത സുരക്ഷ ഏര്‍പ്പെടുത്തിയിരുന്നു. മൃതദേഹത്തിന്റെ നെഞ്ചുവരെ പൂജാ ദ്രവ്യങ്ങള്‍ നിറച്ച നിലയിലായിരുന്നു. അരഭാഗം വരെ അഴുകിയ നിലയിലായിരുന്നു. കല്ലറയില്‍ പുലര്‍ച്ചെയും പൂജകള്‍ നടന്നിരുന്നു.

കല്ലറയില്‍ ഇരിക്കുന്ന നിലയിലാണ് മൃതദേഹം കണ്ടെത്തിയത്. ആറരയോടെ പൊലീസ് നടപടിക്രമങ്ങള്‍ ആരംഭിച്ചു. സമാധി പരിസരം ടാര്‍പോളിന്‍ വച്ച് മറച്ചിരുന്നു.
ഒരുക്കങ്ങള്‍ പൂര്‍ത്തിയായതോടെ ഫോറന്‍സിക് സംഘവും പിന്നാലെ സബ് കലക്ടറും എത്തി. മൃതദേഹം പുറത്തെടുത്ത് ഇന്‍ക്വസ്റ്റ് നടപടികള്‍ പൂര്‍ത്തിയാക്കി. ശേഷം പോസ്റ്റുമോര്‍ട്ടത്തിനായി തിരുവനന്തപുരം മെഡിക്കല്‍ കോളേജിലേക്ക് കൊണ്ടുപോയി.

കല്ലറ പൊളിച്ച് പരിശോധന നടത്തുന്നത് അന്വേഷണത്തിന്റെ ഭാഗമാണെന്ന് ഹൈക്കോടതി പറഞ്ഞിരുന്നു. കല്ലറ പൊളിക്കാനുള്ള ആര്‍ഡിഒയുടെ ഉത്തരവ് സ്റ്റേ ചെയ്യണമെന്ന കുടുംബത്തിന്റെ ആവശ്യവും ഹൈക്കോടതി തള്ളി. ഗോപന്‍ സ്വാമിയുടെ മരണ സര്‍ട്ടിഫിക്കറ്റ് എവിടെയെന്നായിരുന്നു കോടതി കുടുംബത്തോട് ചോദിച്ചത്. മരണ സര്‍ട്ടിഫിക്കറ്റ് ഇല്ലാത്ത്പക്ഷം അസ്വാഭാവിക മരണമാകുമെന്നും കോടതി പറഞ്ഞിരുന്നു.

കലാഭവന്‍ മണിയുടെ സഹോദരന്‍ ആര്‍ എല്‍ വി രാമകൃഷ്ണന്‍ അസിസ്റ്റന്റ് പ്രൊഫസറായി ഇന്ന് കലാമണ്ഡലത്തില്‍ ജോലിയില്‍ കയറും. ഭരതനാട്യ വിഭാഗം അസിസ്റ്റന്റ് പ്രൊഫസറായാണ് ആര്‍ എല്‍ വി രാമകൃഷ്ണന് നിയമനം കിട്ടിയിട്ടുള്ളത്. ചരിത്രത്തിലാദ്യമായാണ് നൃത്ത അധ്യാപനത്തിനായി പുരുഷനെ നിയമിക്കുന്നത്.

കലാമണ്ഡലത്തിന്റെ അഭിമുഖത്തിലും മികച്ച പ്രകടനം കാഴ്ച വെക്കാന്‍ ആര്‍ എല്‍ വി രാമകൃഷ്ണന് കഴിയുകയും ഇതോടെ ജോലി നേടാനും കഴിഞ്ഞു. നേരത്തെ പുരുഷന്‍മാര്‍ മോഹിനിയാട്ടം അവതരിപ്പിക്കുന്നതുമായി ബന്ധപ്പെട്ട് ആര്‍ എല്‍ വി രാമകൃഷ്ണനെതിരെ നര്‍ത്തകി സത്യഭാമ രംഗത്തുവന്നിരുന്നു. എന്നാല്‍ വിഷയം വന്‍ വിവാദമാവുകയാണ് ഉണ്ടായത്. ആര്‍ എല്‍ വി രാമകൃഷ്ണനെ പിന്തുണ നല്‍കി നിരവധി പേര്‍ രംഗത്തെത്തിയിരുന്നു.

കണ്ണൂരില്‍ വിവാഹ ആഘോഷത്തിനിടെ പടക്കം പൊട്ടിച്ച ശബ്ദം കേട്ട് കുഞ്ഞിന് ആരോഗ്യനില ഗുരുതരം. കണ്ണൂര്‍ തൃപ്പങ്ങോട്ടൂരിലാണ് സംഭവം. 22 മാസം മാത്രം പ്രായമുള്ള കുഞ്ഞിനെ കണ്ണൂര്‍ ആശുപത്രിയില്‍ പ്രവേശിപ്പിച്ചു. കുഞ്ഞിന് അപസ്മാരമുണ്ടായിരുന്നതായും ബന്ധുക്കള്‍ പറയുന്നു.

ഞായറാഴ്ച രാത്രി 10 മണിയോടെയാണ് സംഭവം. പെട്ടന്നുണ്ടായ ശബ്ദത്തെ തുടര്‍ന്ന് കുഞ്ഞ് വായയും കണ്ണ് തുറന്ന നിലയിലായി. കുറച്ച് സമയം എടുത്തതിനു ശേഷമാണ് സ്വാഭാവിക നിലയിലേക്ക് കുഞ്ഞ് എത്തിയത്. തിങ്കളാഴ്ചയായിരുന്നു കല്യാണം. അന്ന് വൈകിട്ടും സമാനമായ രീതിയില്‍ വലിയ പടക്കം പൊട്ടിച്ചു.

അപസ്മാരത്തെ തുടര്‍ന്ന് തൃപ്പങ്ങോട്ടൂര്‍ സ്വദേശികളായ അഷ്‌റഫ്- റഫാന ദമ്പതികളുടെ കുഞ്ഞ് തീവ്രപരിചരണ വിഭാഗത്തില്‍ ചികിത്സയിലാണ്. രണ്ട് ദിവസങ്ങളിലായി സമീപത്തെ വീട്ടില്‍ നടന്ന വിവാഹാഘോഷത്തിനിടെയാണ് ഉഗ്രശേഷിയുളള പടക്കങ്ങള്‍ ഉപയോഗിച്ചത്. ശബ്ദം കേട്ട് കുഞ്ഞിന്റെ ജീവന്‍ നഷ്ടെപ്പെട്ടന്നാണ് ആദ്യം കരുതിയതെന്നും പൊട്ടിക്കരുതെന്ന് പറഞ്ഞിട്ടും സമീപവാസികള്‍ കേട്ടില്ലെന്നും കുഞ്ഞിനെ പരിചരിക്കുന്ന സ്ത്രീ പറയുന്നു.